நியூயார்க் நகரிலிருந்து புறப்பட்டு இலண்டன் நகரம் சென்ற பிரிட்டிஷ் ஏர்வேஸ் (British Airways) போயிங் (Boeing) 747-436 விமானம், மணிக்கு 1,327 கிமீ என்ற வேகத்தை எட்டி சாதனை புரிந்துள்ளது. அதற்குக் காரணம், சியாரா புயல். புயலின் வேகமான காற்று விமானத்தை விரைவாகப் பறக்க வைத்துள்ளது. வழமையாக 6 மணி 38 நிமிடங்கள் எடுக்கும் இந்த விமான பயணம், 4 மணி 56 நிமிடத்திலேயே ஹீத்ரோ (Heathrow) விமான நிலையத்தை சென்றடைந்தது.
இதற்கு முன்னர், இதே பயணத்தை 5 மணி 13 நிமிடங்களில் பறந்து நோர்வே விமானம் (Norwegian Boeing 787-9 Dreamliner) சாதனை புரிந்திருந்தது குறிப்பிடத்தக்கது.
இவையெல்லாம், ஒலியின் வேகத்திலும் குறைவான வேகத்தில் பறக்கும் விமானங்கள் செய்த சாதனை. தற்போது செயலிழந்துள்ள கொன்கோர்ட் (Concord) விமானங்கள், நியூயார்க் நகரிலிருந்து புறப்பட்டு 2 மணி 53 நிமிடங்களில் இலண்டன் நகரை சென்றடையும் வல்லமை கொண்டிருந்தன. ஆனால், நவீன பயணி விமானங்கள் ஒலியின் வேகத்தின் 85% வேகத்தில் தான் பயணிக்கின்றன என்பது நோக்கத்தக்கது.
