சிட்னியின் வடமேற்கு பகுதியிலுள்ள Carlingford Court பல்பொருள் அங்காடிக்கு அருகாமையில் கடந்த வியாழக்கிழமை மதியம்11.20 மணியளவில் இடம்பெற்ற இந்தச் சம்பவத்தில், இலங்கையைப் பூர்வீகமாகக் கொண்ட கெல்வின் விஜயவீர என்ற 17 வயது மாணவன் பலியாகியுள்ளார்.
Carlingford Court பகுதியில் வாகனம் ஓட்டிவந்த தொண்ணூறு வயது மூதாட்டி ஒருவர், கட்டுப்பாட்டினை இழந்து அருகிலிருந்த மரமொன்றுடன் மோதி, அப்பகுதியால் நண்பர்களுடன் நடந்து சென்றுகொண்டிருந்த கெல்வின் விஜயவீரவை மோதினார் என்று கூறப்படுகிறது. மரத்துடன் மோதிய வேகத்தில் மூதாட்டியின் வாகனம் கெல்வின் விஜயவீரவை இழுத்துச் சென்று எதிர்வீட்டில் நிறுத்திவைக்கப்பட்டிருந்த வாகனத்தோடு சேர்த்து மோதியிருக்கிறது.
சம்பவம் இடம்பெற்றபோது, அப்பகுதியில் தனது வாகனத்தை வீட்டு மூற்றத்தில் பழுது பார்த்துக்கொண்டிருந்தவர் இந்த விபத்தை நேரடியாகக் கண்டிருக்கிறார். உடனடியாக அவசர சேவைகளுக்கு அறிவிக்கப்பட்டதையடுத்து, விரைந்து வந்த பொலீஸார், கெல்வின் விஜயவீரவின் சடலத்தை, எதிர்வீட்டில் நின்றுகொண்டிருந்த வாகனத்துக்குக் கீழிருந்து மீட்டிருக்கிறார்கள்.
கெல்வினோடு நடந்து சென்றுகொண்டிருந்த இன்னொரு நண்பர் படுகாயங்களுடன் சிட்னி Westmead வைத்தியசாலையில் சேர்க்கப்பட்டார். வாகன ஓட்டியான தொண்ணூறு வயது மூதாட்டிக்கு சம்பவத்தில் எந்தக் காயங்களும் ஏற்படாதபோதும், சோதனைகளுக்காக வைத்தியசாலைக்குக் கொண்டுசெல்லப்பட்டார்.
Carlingford High School மாணவனான கெல்வின் விஜயவீரவின் மரணத்தினால் அவரது குடும்பத்தினரும் பாடசாலை நண்பர்களும் பெரும் அதிர்ச்சிக்கு உள்ளாகியுள்ளனர்.
Readers seeking crisis support can contact Lifeline on 13 11 14.More information and support with mental health is available at Beyond Blue.org.au
and on 1300 22 4636.
SBS தமிழ் ஒலிபரப்பை திங்கள், புதன், வெள்ளி மற்றும் ஞாயிறு ஆகிய நாட்களில் இரவு 8 மணிக்கு SBS Radio 2 வழியாக கேட்கலாம்.உங்களது பிரதேசத்துக்குரிய அலைவரிசை என்னவென்று தெரிந்துகொள்ள எமது tune in பக்கத்திற்குச் செல்லுங்கள்.டிஜிட்டல் வானொலியில் செவிமடுக்க ‘SBS Radio’ எனத் தேடுங்கள்.
