விக்டோரியாவில் கடந்த 24 மணிநேரத்தில் 397 பேருக்கு கொரோனா வைரஸ் தொற்று உறுதிப்படுத்தப்பட்ட அதேநேரம் மேலும் 3 பேர் மரணமடைந்துள்ளனர்.
கடந்த இரண்டு நாட்களாக 723, 627 என்ற அளவில் புதிய தொற்றாளர்களின் எண்ணிக்கை அறிவிக்கப்பட்டுவந்த நிலையில் தற்போது இவ்வெண்ணிக்கை சற்றே குறைவடைந்துள்ளது.
இதேவேளை மரணமடைந்தவர்களில் 2 பெண்களும் ஒரு ஆணும் அடங்குகின்றனர். இவர்கள் தமது 80 மற்றும் 90 வயதுகளிலுள்ளவர்கள் என குறிப்பிடப்படுகிறது.
தற்போது விக்டோரியா முழுவதும் கொரோனா தொற்றுக்குள்ளான 5,919 பேரில் அதிதீவிர சிகிச்சைப்பிரிவிலுள்ள 41 பேர் உட்பட 379 பேர் மருத்துவமனைகளில் சிகிச்சைபெற்று வருகின்றனர்.
விக்டோரியாவில் கொரோனாவினால் இறந்தவர்களின் எண்ணிக்கை 116 ஆக உயர்ந்துள்ளது.
இதுஒருபுறமிருக்க மெல்பேர்ன்வாசிகள் பலர் தற்போது நடைமுறைப்படுத்தப்பட்டுள்ள கட்டுப்பாடுகளை உரியமுறையில் கடைப்பிடிக்கத் தவறுவது மிகுந்த விசனமளிப்பதாக காவல்துறைக்குப் பொறுப்பான அமைச்சர் Lisa Neville தெரிவித்தார்.
நேற்றையதினம் மெல்பேர்னிலிருந்து மூன்றரை மணிநேரம் பயணம்செய்து Wodonga-வுக்கு Big Mac வாங்குவதற்குச் சென்ற நபருக்கு அபராதம் விதிக்கப்பட்டதாக அவர் தெரிவித்தார்.
அதேபோன்று மற்றுமொருவர் மெல்பேர்னிலிருந்து ஒன்றரை மணிநேரம் பயணம் செய்து Ballarat-க்கு காற்றுவாங்கச் சென்றிருந்ததாகவும் இன்னொருவர் Werribee-இலிருந்து ஒருமணிநேரம் பயணம் செய்து Springvale-க்கு உணவுப்பொருட்கள் வாங்குவதற்கு வந்ததாகவும் இவர்கள் இருவருக்கும் அபராதம் விதிக்கப்பட்டதாகவும் Lisa Neville தெரிவித்தார்.
பொதுமக்கள் தாம் வசிக்கும் postcode-க்கு வெளியே அநாவசியமாக சென்றுவருவதைத் தவிர்க்கவேண்டுமென அவர் வலியுறுத்தியுள்ளார்.
உங்களுக்கு சளி அல்லது flu அறிகுறிகள் ஏற்பட்டால் வீட்டிலேயே இருங்கள். மற்றும் உங்கள் மருத்துவரை அழைத்து சோதனைக்கு ஏற்பாடு செய்யுங்கள். அல்லது Coronavirus Health Information Hotline-ஐ 1800 020 080 என்ற எண்ணில் தொடர்பு கொள்ளவும்.
கொரோனா வைரஸ் தொற்று ஏற்பட்டால் மிகவும் இலேசான அறிகுறிகள் முதல் நிமோனியா வரை செல்லக்கூடும் என அரச இணையத்தளம் கூறுகின்றது. காய்ச்சல், தொண்டை நோவு, இருமல், உடற்சோர்வு, சுவாசிப்பதில் சிரமம் போன்ற அறிகுறிகள் முக்கியமானவை.
உங்களுக்கு கடுமையான உடல்நலக்குறைவு ஏற்பட்டால் அல்லது சுவாசிப்பதற்கு சிரமம் ஏற்பட்டால் 000 என்ற இலக்கத்தை அழையுங்கள்.
ஒவ்வொருவருக்கிடையிலும் 1.5 மீட்டர் சமூக இடைவெளியைப் பேணுங்கள்.
அரசால் அறிமுகப்படுத்தப்பட்டுள்ள COVIDSafe செயலியை உங்கள் கைபேசியில் தரவிறக்கிக்கொள்ளுங்கள்.
Share
