விக்டோரியாவில் கடந்த 24 மணிநேரத்தில் 403 பேருக்கு COVID-19 தொற்று உறுதிப்படுத்தப்பட்ட அதேநேரம் மேலும் 5 பேர் மரணமடைந்துள்ளனர்.
மரணமடைந்தவர்களில் 50 வயதுகளிலுள்ள ஆண் ஒருவரும் அடங்குகிறார்.
ஏனைய நால்வரும் 70, 80 மற்றும் 90 வயதுகளிலுள்ளவர்கள் என குறிப்பிடப்படுகிறது.
இதையடுத்து விக்டோரியாவில் கொரோனாவினால் இறந்தவர்களின் எண்ணிக்கை 49 ஆகவும் ஆஸ்திரேலியாவில் உயிரிழந்தவர்களின் எண்ணிக்கை 133 ஆகவும் உயர்ந்துள்ளது.
விக்டோரியாவில் தொடர்ந்து 18வது நாளாக மூன்று இலக்கங்களில் புதிய தொற்றாளர்கள் இனங்காணப்பட்டுவருகின்றனர்.
தற்போது மாநிலம் முழுவதும் 3630 பேர் கொரோனா வைரஸ் தொற்றுக்கு உள்ளாகியிருக்கும் நிலையில் அதிதீவிர சிகிச்சைப் பிரிவிலுள்ள 40 பேர் உட்பட 201 பேர் மருத்துவமனைகளில் அனுமதிக்கப்பட்டுள்ளனர்.
இதுஒருபுறமிருக்க COVID-19 சோதனை மேற்கொண்டுவிட்டு தம்மை தனிமைப்படுத்திக்கொள்ள வேண்டியநிலையில் உள்ளவர்களுக்கு வேலையில் சம்பளத்துடனான விடுப்பு இல்லையெனில்; விக்டோரிய அரசிடமிருந்து 300 டொலர்கள் புதிய கொடுப்பனவைப் பெற்றுக்கொள்ளமுடியும் என அறிவிக்கப்பட்டுள்ளது.
COVID-19 சோதனையை மேற்கொண்ட பலர் தம்மை தனிமைப்படுத்திக்கொள்ளாமல் வேலைகளுக்குச் சென்றமை விக்டோரியாவில் தொற்றாளர்களின் எண்ணிக்கை அதிகரித்தமைக்கான முக்கிய காரணங்களில் ஒன்று என தெரிவிக்கப்பட்டதையடுத்து அரசு இப்புதிய கொடுப்பனவை அறிமுகப்படுத்தியுள்ளது.
இதுதவிர COVID-19 தொற்று உறுதிப்படுத்தப்பட்டவர்களுக்கு சம்பளத்துடனான விடுப்பு இல்லையெனில் அவர்கள் 1500 டொலர்கள் அரச கொடுப்பனவைப்பெற முடியும் என விக்டோரிய அரசு ஏற்கனவே அறிவித்திருந்தமை குறிப்பிடத்தக்கது.
உங்களுக்கு சளி அல்லது flu அறிகுறிகள் ஏற்பட்டால் வீட்டிலேயே இருங்கள். மற்றும் உங்கள் மருத்துவரை அழைத்து சோதனைக்கு ஏற்பாடு செய்யுங்கள். அல்லது Coronavirus Health Information Hotline-ஐ 1800 020 080 என்ற எண்ணில் தொடர்பு கொள்ளவும்.
கொரோனா வைரஸ் தொற்று ஏற்பட்டால் மிகவும் இலேசான அறிகுறிகள் முதல் நிமோனியா வரை செல்லக்கூடும் என அரச இணையத்தளம் கூறுகின்றது. காய்ச்சல், தொண்டை நோவு, இருமல், உடற்சோர்வு, சுவாசிப்பதில் சிரமம் போன்ற அறிகுறிகள் முக்கியமானவை.
உங்களுக்கு கடுமையான உடல்நலக்குறைவு ஏற்பட்டால் அல்லது சுவாசிப்பதற்கு சிரமம் ஏற்பட்டால் 000 என்ற இலக்கத்தை அழையுங்கள்.
ஒவ்வொருவருக்கிடையிலும் 1.5 மீட்டர் சமூக இடைவெளியைப் பேணுங்கள்.
அரசால் அறிமுகப்படுத்தப்பட்டுள்ள COVIDSafe செயலியை உங்கள் கைபேசியில் தரவிறக்கிக்கொள்ளுங்கள்.
கொரோனா வைரஸ் (COVID-19) குறித்த முக்கிய தகவல்கள் sbs.com.au/coronavirus என்ற எமது இணையத்தில் 63 மொழிகளில் கிடைக்கின்றன.
Share
