དེ་ཡང་ཨོ་སི་ཊོ་ལི་ཡའི་འཕྲོད་བསྟེན་བློན་ཆེན་སྐུ་ཞབས་གྷེ་རིག་ཧན་ཊི་མཆོག་གིས། ད་ལྟའི་ཆར་འཛམ་གླིང་ཁྱོན་དུ་ཏོག་དབྱིབས་ནད་དུག་ཤུགས་རྐྱེན་གྱི་ཚད་གཞི་མྱུར་པོ་ཆགས་བཞིན་ཡོད་སྟབས། ཨོ་སི་ཊོ་ལི་ཡ་འདི་གནས་གཙང་མཚོ་གླིང་ཞིག་ཡིན་པས། དུས་ཚོད་ངེས་ཅན་ཞིག་གི་བར་ས་མཚམས་ཁག་སྒོ་རྒྱག་རྒྱུ་ཧ་ཅང་གལ་ཆེན་པོ་ཆགས་ཡོད་སྐོར་ཉེ་ཆར་རེས་གཟའ་མིག་དམར་ཉིན་ ABC རླུང་འཕྲིན་ལ་འགྲེལ་བརྗོད་གནང་འདུག
ཁོང་གིས་ཏོག་དབྱིབས་ནད་དུག་སྔོན་འགོག་གི་ཁབ་ཅིག་མ་རག་བར་དུ་རྒྱལ་སྤྱིའི་ས་མཚམས་ཁག་སྒོ་རྒྱག་དགོས་པའི་བསམས་ཚུལ་བཏོན་ཡོད་པ་དང་། དེ་བཞིན་ཨོ་སི་ཊོ་ལི་ཡའི་ཆེས་མཐོའི་གསོ་རིག་སློབ་སྟོན་པ་ཞིག་གིས་ཏོག་དབྱིབས་ན་ཚ་ཁྱབ་བརྡལ་ཐད་ཨོ་སི་ཊོ་ལི་ཡའི་མངའ་སྡེ་ཝི་ཊོ་རི་ཡ་ (Victoria) དེ་ནིའུ་སོ་ཐི་ཝལ་ (NSW) མངའ་སྡེ་དང་བསྡུར་ན་འཐུས་ཤོར་མང་པོ་ཕྱིན་ཡོད་སྐོར་གསུངས་འདུག
ཝི་ཊོ་རི་ཡ་མངའ་སྡེའི་ནང་རེས་གཟའ་ཟླ་བ་ཉིན་ཏོག་དབྱིབས་ནད་པ་གསར་པ་གྲངས་ ༡༦ ཐོན་ནས་ཁྱོན་བདུན་ཕྲག་གཅིག་གི་ནང་ཏོག་དབྱིབས་ནད་པ་གསར་པ་གྲངས་ ༡༢༥ ཐོན་ཡོད་སྟབས། བདུན་ཕྲག་གཅིག་གི་ནང་ནད་པ་ལྡབ་གཅིག་འཕར་ཡོད།
ནེའུ་སོ་ཊི་ཝལ་མངའ་སྡེའི་ནང་འདས་པའི་བདུན་ཕྲག་ནང་ནད་པ་གསར་པ་གྲངས་ ༢༢ ཐོན་ཡོད་པ་དང་། མངའ་སྡེ་གཞན་ཁག་གྲངས་འབོར་མར་ཆགས་པའམ་ཁག་ཅིག་ནད་པ་གསར་པའི་གྲངས་ཐོ་ཀླད་ཀོ་ཆགས་ཡོད། ཝི་ཊོ་རི་ཡའི་ནི་ད་ལྟའི་ཆར་ནད་པ་གསར་པ་ཐོན་པའི་གྲངས་འབོར་མཐོ་ཤོས་དེ་ཆགས་ཡོད་པ་དང་། ཉེ་བའི་ཉིན་གྲངས་ ༦ དེ་ནི་འདས་པའི་ཟླ་བ་ ༢ ཙམ་གྱི་ནང་གསར་དུ་ཐོན་པའི་ནད་པའི་གྲངས་འབོར་མཐོ་ཤོས་དེ་ཆགས་ཀྱི་ཡོད་པ་རེད།
ཨོ་སི་ཊོ་ལི་ཡའི་ནུབ་ཕྱོགས་མངའ་སྡེས་ཕྱི་ཟླ་བརྒྱད་པའི་ནང་མངའ་སྡེའི་ས་མཚམས་སྒོ་ཕྱེ་རྒྱུའི་འཆར་གཞི་ཡོད་ཀྱང་། ནེའུ་སོ་ཐི་ཝལ་མངའ་སྡེས་མེལ་བྷོན་དུ་འགྲུལ་བཞུད་བྱ་རྒྱུ་ཉེན་བརྡ་ཞིག་ཆགས་བཞིན་ཡོད། རེས་གཟའ་ཟླ་བ་ཉིན་གསོ་རིག་འགན་འཛིན་བྷ་རན་དྷ་མུར་ཕེ་ Brendan Murphy མཆོག་གིས་ཀྱང་ཉེ་ཆར་ཝི་ཊོ་རི་ཡའི་ནང་ནད་པ་གསར་དུ་འཕར་བཞིན་པའི་གནད་དོན་དེའི་ཐད་འཐུས་ཤོར་དང་མ་འདང་ས་མང་པོ་ཞིག་ཡོད་པ་རེད་བསམས་ཀྱི་འདུག་ཅེས་གསུངས་འདུག
རེས་གཟའ་མིག་དམར་ཉིན་ཨོ་སི་ཊོ་ལི་ཡའི་ལྷོ་ཕྱོགས་མངའ་སྡེས་ཆེད་མཁས་སྨན་པ་ཚོགས་ཆུང་ཞིག་ཝི་ཊོ་རི་ཡར་ཆེད་གཏོང་གིས་དུས་ཡུན་བདུན་ཕྲག་གསུམ་ཙམ་གྱི་རིང་ཝི་ཊོ་རི་ཡའི་ནང་འཕྲོད་བསྟེན་ལས་བྱེད་ཚོར་སྨན་བཅོས་རོགས་རམ་གནང་རྒྱུ་རེད་འདུག
ཨོ་སི་ཊོ་ལི་ཡ་ནུབ་བརྒྱུད་མངའ་སྡེའི་བློན་ཆེན་མཱ་ཁི་མེ་ཁི་གྷོ་ཝང་ Mark McGowan མཆོག་གིས་མངའ་སྡེའི་ས་མཚམས་སྒོ་ཕྱེ་རྒྱུ་དུས་ཚེས་བཟོས་ཡོད་ཀྱང་། མངའ་སྡེ་ནང་ཁུལ་གྱི་ཏོག་དབྱིབས་ནད་དུག་སྔོན་འགོག་དམ་བསྒྲགས་ཁག་ཕྱི་ཟླ་ ༧ ཚེས་ ༡༨ ཉིན་གཞི་ནས་ཕྱིར་བསྡུ་གནང་རྒྱུ་ཡིན་འདུག
དེ་དང་ཆབས་ཅིག་ཨོ་སི་ཊོ་ལི་ཡའི་ནང་སྨན་དཔྱད་ཁང་ནས་མི་སྣ་མ་འདྲ་བ་ཁ་ཤས་ལ་སྨན་ཁབ་བརྟག་དཔྱད་བྱས་པའི་གྲུབ་དོན་དེ་བཞིན་ཕྱི་ཟླ་ ༧ པའི་ཟླ་འཇུག་ཏུ་ཐོན་རྒྱུ་ཡིན་སྐོར་གསུངས་འདུག ཏོག་དབྱིབས་ནད་དུག་སྔོན་འགོག་གི་སྨན་ཁབ་རྒྱག་ས་དང་བླངས་བ་རྣམས་ཨོ་སི་ཊོ་ལི་ཡ་ལྷོ་ཕྱོགས་མངའ་སྡེ་ Adelaide ས་གནས་སུ་བསྡུ་སྐོང་བྱས་ཡོད་འདུག
རོ་ཡོལ་ཨ་དྷེ་ལཱ་དྷི་སྨན་ཁང་ (royal adelaide hospital) གི་ཉམས་ཞིབ་པ་ཚོས་ཏོག་དབྱིབས་ནད་དུག་གི་སྨན་ཁབ་ཚོད་ལྟ་ཆེད་ལོ་གཞོན་བདེ་ཐང་ཅན་གྱི་མི་གྲངས་ ༡༠༠ ཙམ་ཞིག་འཚོལ་བཞིན་ཡོད་འདུག་པ་དང་། ལས་དོན་དེ་འདི་ལོའི་ལོ་མཇུག་ཏུ་ལག་བསྟར་ཐུབ་ཐབས་འབད་བརྩོན་བྱེད་བཞིན་ཡོད་འདུག
ཨོ་སི་ཊོ་ལི་ཡའི་ནང་མི་རྣམས་ངེས་པར་དུ་མི་གཞན་དང་བར་ཐག་རྨིད་ ༡།༥ བཞག་དགོས་པ་དང་། འདུ་འཛོམས་ཚད་བཀག་སྐོར་མངའ་སྡེ་གཞུང་གི་བཀོད་ཁྱབ་བརྟག་དཔྱད་བྱེད་དགོས་པ་ཡིན། ཏོག་དབྱིབས་ནད་དུག་བརྟག་དཔྱད་བྱེད་ས་ཨོ་སི་ཊོ་ལི་ཡའི་ས་གནས་གང་སར་ཡོད། གལ་སྲིད་ཁྱེད་རང་ལ་ཆམ་པ་དང་ཡང་ན་རིམས་ཆམ་ནད་རྟགས་ཐོན་ཚེ། བརྟག་དཔྱད་བཀོད་སྒྲིག་ཆེད་རྒྱལ་ཡོངས་ཏོག་དབྱིབས་ནད་དུག་འཕྲོད་བསྟེན་གནས་ཚུལ་མཁོ་སྤྲོད་ཛ་དྲག་འབྲེལ་གཏུགས་ཨང་གྲངས་ 1800 020 080 ཐོག་ནས་འབྲེལ་བ་བྱེད་དགོས་པ་ཡིན།
ཨོ་སི་ཊོ་ལི་ཡ་གཞུང་གི་ཏོག་དབྱིབས་ནད་དུག་སྔོན་འགོག་ཆེད་མཉེན་ཆས་ COVIDSafe དེ་ཁྱེད་ཀྱི་ཁ་པར་ཐོག་ཕབ་ལེན་བྱེད་ཆོག ཏོག་དབྱིབས་ནད་དུག་སྔོན་འགོག་ཆེད་མཉེན་ཆས COVIDSafe སྐོར་འདི་ནས་གཟིགས་རོགས།
SBS གསར་ཁང་གིས་ཨོ་སི་ཊོ་ལི་ཡའི་ནང་ཏོག་དབྱིབས་ནད་དུག་གི་འཕེལ་རིམ་སྐོར་གནས་ཚུལ་གསར་ཤོས་མཁོ་སྤྲོད་བྱེད་བཞིན་ཡོད། ཏོག་དབྱིབས་ནད་དུག་སྐོར་གསར་འགྱུར་དང་གནས་ཚུལ་ཁག་དྲ་ཚིགས་ sbs.com.au/coronavirus ཐོག་སྐད་ཡིག་ ༦༣ ནང་ཡོད་པ་ཡིན།
