ኣብ ሊብያ ክሳቐዩ ዝጸንሑ ስደተኛታት ብወተሃደራዊት ነፋሪት ናብ ጥልያን ተወሲዶም::

ኢትዮጵያ፡ ኤርትራን ሶማሊያን ዝመበቆሎም ኣብ ኣዚዩ ዘስካሕክሕ ጸገም ወዲቖም ዝጸንሑ 162 ስደተኛታት ትማሊ ካብቲ ኣብ ሊብያ ተዓጽዮም ክሳቐይሉ ዝጸንሑ መዳጎኒ፡ ብወተሃደራዊት ጀት ናብ ጥልያን ተወሲዶም። እቶም ናብቲ ኣብ ጥልያን ዝርከብ መዓስከር ሓይሊ ኣየር ፖመትሲያ ብወተሃደራዊት ጀት ዝተወስዱ ስደተኛታት፡ ስንኩላን፡ ሰቡኡተን ዝጠፍኡወን ኣንስቲ፥ በይኖም ተዓጽዮም ዝጸንሑ ሕጻናትን ይርከብዎም። ናይ ጥልያን ሚኒስተር ዉሽጢ ሃገር ማርኮ ሚኒቲ ኣብቲ እዋን ኣብ ዘስምዖ ዘረባ “ካብ ሊቢያ ናብ ጥሊያን ንፈለማ ሓዲሽ መተሓላለፊ ኮሪዶር ተኸፊቱ” ኢሉ። ናይ ዉዱብ ሕቡራት ቤት ጽሕፈት ጉዳያት ስደተኛታት ከምዝገልጾ፡ ኣብ ሊብያ 18 ሺሕ ስደተኛታት ተዳጉኖም ኣብ ከቢድ ስቓይ ይርከቡ ኣለዉ። ካብዚኣቶም ነቶም 10 ሺሕ ስደተኛታት ኣብዚ ዝመጽእ ሳምንታት ብክልተ እብረ ክውሰዱ እዮም።