ኤርትራ፥ ኣብ ኣብያተ ማእሰርትታታ ንዓመታት ተቐይዶም ዘለውን ዝተቐትሉን ዜጋታት መርመራታት ጌራ ከተፍልጥ ዉዱብ ሕቡራት ሃገራት ሓቲቱ።

ነቲ ኣብዚ ቅሩብ እዋን ኣብ ቀይዲ ዝኣተወ ሚኒስተር ፋይናንስ ዝነበረ ብርሃነ ኣብርሃ ዝርከቦም መንግስቲ ኤርትራ ዝኽሰሰሉ  ብዘይሕጋዊ መስርሕ ብሓይሊታት ጸጥታ ዝተቐትሉን ዝተኣስሩን ብዙሓት ኤርትራዊያን መርመራ ጌሩ ግቡእ መልሲ ክህበሉ እቲ ንሰብኣዊ መሰላት ዝጣበቕ ኣካል ዉዱብ ሕቡራት ሃገራት ብሓሙስ ንኤርትራ ሓቲቱ ክብል ሮይተርስ ካብ ጀኔቫ ጸብጺቡ።

ግዱድ ዕስክርና ናብ ኣገዲድካ ሽቕለት ተቐይሩ ዜጋታት ብዘይ ደሞዝ ወይውን ብዉሑድ ክፍሊት ኣብ ስርሓት ዕደናን ህንጻን ክዋፈሩ የብሎምን ክብል ዉዱብ ሕቡራት ሃገራት ሓቲቱ ኣሎ።

ፍሉይ ናይ ዉዱብ ሕቡራት ሃገራት መርማሪ ኮሚሽን ብዛዕባ ኤርትራ ኣብ 2016፥ ቅትለት ምቕጥቃጥ፥ ግብረ ስጋዊ ዓመጽን ባርነት ብዙሓት ዜጋታትን ዝርከቦ  ንኤርትራ ብገበን ሰብኣዊ መሰላት ከሲስዋ እዩ።

መንግስቲ ኤርትራ ነቲ ዝቐርበሉ ክሲታት ግህሰት ሰብኣዊ መሰላት፥ ወትሩ ምስነጸጎን፥ ንኤርትራ ብፍሉይ ኮነ ኢልካ ንምጥቃዕን፥ ዉዲት “ወያነን መንግስቲ ኣመሪካን እዩ” እናበለ ክነጽጎ እዩ ዝስማዕ ኔሩ።