ኣባላት ሃገራዊት ጋንታ ቅድድም ብሽግለታ ኤርትራ ኮይኖም ኣብ ሻምፒዮና ቅድድም ብሽግለታ ዓለም ዩሲኣይ 2022 ኣብ ከተማ ዎሎንጎንግ፣ ካብ ዝተሳተፉ ተቐዳደምቲ ሽዱሽተ ኣብ ኣውስትራልያ ከምዝተረፉን ዑቕባ ከምዝሓተቱን ተረጋጊጹ።
ኣብ ዓበይቲ ወይ ኤሊት ደቀንስትዮ ትምደብ ዳናይት ፍጹም ካብ’ቶም ንኤርትራ ዘይተመልሱ ኣባላት እታ ሓንቲ ጓለንስተይቲ’ያ።
እቶም ካልኦት ዝተረጋገጹ ኣርባዕተ ካልኦት ከኣ ኣባላት ትሕቲ 23 ዕድመ መንእሰያት ዝኾኑ ኣማኑኤል መሓሪ፣ ሳምሶን ሃብተን ዳንኤል በርሀን ከም’ኡ’ውን ኣባል ጁኒየር መንእሰያት ዮናስ ተኪኤን’ዮም።
ገለ ተቐዳደምቲ ኣባላት ሕርይቲ ጋንታ ኤርትራ ካብ ከተማ ዎሎንጎንግ ወጺኦም ኣብ ኣውስትራልያ ንምትራፍ ተሰዊሮም ከምዝነበሩ ኣብ መወዳእታ መዓልታት ናይ’ቲ ውራይ ይውረ እንተነበረ’ኳ ንድሕነቶም ተባሂሉን መነ መን ምዃኖም ዘይተጻረየ ብምንባሩን ትሒም ትሒም ጥራይ ኮይኑ ጸኒሑ ኔሩ።
ኣብ’ዚ ሕጂ እዋን ግን ኣብ ኣውስትራልያውያን ማዕከናት ዜና ወይ መርበባት ሓበሬታ እንተዘይተቓለሐ’ኳ ብብዙሓት ተጣበቕቲ መሰላት ኤርትራውያንን ካልኦት መድያታትን ብወግዒ ስሞም ተዘርዚሩ ይቃላሕ ኣሎ።
ከምዝዝከር መበል 88 ሻምፒዮና ቅድድም ብሽግለታ ዓለም 2022 ኣብ’ዚ ኣብ ኣውስትራልያ ከተማ ዎሎንጎንግ ተኻይዱ ብዓወት በልጅማዊ ረምኮ ኤቨነፖል ክዛዘም እንከሎ ኤርትራውያን ተቐዳደምቲ ብቢንያም ግርማይ ኣቢሎም መበል 54 ወጺኦም’ዮም።
