ፎረም ቀይሕ ባሕሪ ንኢትዮጵያ ዘጓነየ ስለዝኾነ ኢትዮጵያ ትርከበሉ ሓዱሽ ሕብረት ክቐውም፡ ሚ/ር ጉዳያት ኢይቶጵያ ጸዊዑ
ምክትል ቀዳማይ ሚንስተርን ሚንስትሪ ጉዳይ ወጻኢን ኢትዮጵያ ደመቀ መኮነን ኣብ መበል 58 ጉባኤ ሙኒክ ተረኺቡ ኣብ ዘስምዖ መደረ ብ2019 ዝተመስረተ ንኢትዮጵያ ዘጓነየ ዝበሎ ፎረም ቀይሕ ባሕሪ ጌጋ እዩ፡ ብምባል ሕጂ ኢትዮጵያ ትርከበሉ ረብሓ ሃገራት ቀይሕ ባሕርን ቀርኒ ኣፍሪቃን ዝሕሉ ሕብረት ክምስረት ጸዊዑ።
ኣብ ከባቢ ቀይሕ ባሕሪ ዘይሕጋዊ ንግዲ ኣጽዋር፣ መዐወንቲ እጻትን ዝውውር ዘይሕጋውያን ሰባትን ንምዕጋት ምትሕግጋዝ ብዙሓት ኣካላት ከም ዘድሊ ዝሓበረ እቶም በዓል መዚ፡ ኢትዮጵያ ኣካል ናይዚ ክትከውን ከም ዝግባእ ምዝራቡ ሃገራዊ ማዕኸን ዜና ታ ሃገር ኢቢሲ ጸብጺቡ ኣሎ።
ብ ክልቲኡ ወገን ገማግም ቀይሕ ባሕሪ ዝዳወባ ሀገራት ፡ "ፎረም ቀይሕ ባሕሪ" ተባሂሉ ዝጽዋዕ ሓባራዊ መድረኽ ከምዝፈጠራ ይዝከር። እቲ ዕላማ ድማ ፡ ቐይሕ ባሕሪ ዝምልከቶም መንግስታት ብሓባር ኰይኖም ብዛዕባ ሓባራዊ ድሌታት ክዘራረቡ ፡ ከምኡ "ውን ኣብቲ ዞባ ንዝፍጠር ጸገማት ሓባራዊ መፍትሒታት ክጥቀሙ ንምግባር እዩ ።
