ኣባላት ሕርይቲ ጋንታ መንእሰያት ኤርትራ ትሕቲ 20 ኣብ ኡጋንዳ ተሰዊሮም

ሓሙሽተ ተጻወቲ ካብታ ኣብ ኡጋንዳ ኣብ ግጥማት ሴካፋ ት20 መንእሰያት ትሳተፍ ዘላ ሕርይቲ ጋንታ ኤርትራ ኣብ ከተማ ጂንጃ ካብ ሆቴሎም (ስፐከ ኣፓርትመንትስ) ተሰዊሮም ከምዝኸዱ መርበብ ሓበሬታ ጋዜጣ ሞኒተር ኡጋንዳ ኣቃሊሓ። እቶም ጠፊኦም ተባሂሎም ዝዝረበሎም ዘሎ ተጻወቲ ንፉዕ ኣጥቃዓይ መዋእል ተስፋይ ዮሴፍ፡ ስምኦን ኣስመላሽ መኮነን፡ ሄርሞን ፍስሃየ ዮሃንስ፡ ደይበን ግብጻዊ ህንጻኣብን ሓላው ልዳት ግርማይ ሃኒባልን እዮም። ኣቦወንበር ኣወሃሃዲት ኮሚተ ግጥማት ሴካፋ ኣይማብል ሃቢማና እቶም ተጻወቲ ከምዝጠፍኡ ሰሉስ ድሕሪ ምርግጋጽ እዚ ውራይ ብጽቡቕ ስም መታን ክዛዘም ኣብ ዙርያ እታ ጋንታን ትጸንሓሉ ሆቴልን ሓለዋ ወሲኾም ከምዘለው ሓቢሩ።

እታ ሃገራዊት ጋንታ መንሰያት ነቲ ዝጽበያ ግጥም ኣንጻር ኬንያ ክትዳሎ ኣብ ፉፋ ቴክኒካል ስንተር ሰሉስ ልምምዳ ኣብ ዘካየደትሉ እዋን 14 ተጻወቲ ጥራይ ተረኺቦም ኔሮም። ኣሰልጣኒ ኣለምሰገድ ተስፋይ ምስ ተሓተተ ግን እቶም ተጻወቲ ተጸሊእዎም ኣሎ ክብል ከምዝሓበረ እታ መርበብ ሓበሬታ ኣስፊራ።