ኣብ ትግራይ 5 ጋዜጠኛታት ብዘይክሲ ንክልተ ሰሙን ተኣሲሮም ከም ዘለዉ ተገሊጹ።

 ጋዜጠኛታት ቴሌቭዥን ትግራይ ዝኾኑ ምስግና ስዩም፣ ተሾመ ጦማለው፣ ሓበን ሓለፎም፣ ዳዊት መኮነንን ሃይለሚካኤል ገሰሰን ብጸጥታ ናይ’ቲ ክልል ኣብ ትሕቲ ቀይዲ ከም ዘለዉ ድምጺ ኣሜሪካ ጸብጺቡ።

ጠንቂ መእሰሪኦም  “ምስ ጸላኢ ተሓባቢሮም” ዝብል ከም ዝኾነ ዓቃቢ ሕጊ ይኸስስ።

ስድራቤቶምን ጠበቐኦምን ግን እቲ ዝተዋህበ ምኽንያት ምስቲ ክውንነት ዘይከይድን ሽፋንን ምዃኑ ይምጉቱ።

ኣስዒቦም ድማ፣ እቲ ተኣሲሮምሉ ዘለዉ ቦታ ንጥዕና ዝጎድእ  ከም ዝኾነን ሞያ ጋዜጠኝነት ንምጉዳእ ዝተወስደ ስጉምቲ ኢሎም።

እቶም ጋዜጠኛታት ንልዕሊ ክልተ ሰሙን ብዘይክሲ ምእሳሮም ዘይሕጋዊ ተግባር ምዃኑ ውን ገሊጾም።

ዓቃቢ ሕጊ ከተማ መቐለ ብወገኑ ፤ መእሰሪ ምኽንያት ምስ ጋዜጠኝነት ዝዛመድ ዘይኮነስ ምስ ስሩዕ ገበን ዝተሓሓዝ ዩ ብምባል ጉዳዮም ይጻረ ከም ዘሎ ተዛሪቡ።

ካብቶም ተኣሲሮም ዘለዉ ጋዜጠኛታት መንግስቲ ፌደራል ንክልል ትግራይ ተቖጻጺሩ ኣብ ዝነበረሉ እዋን ውን ተኣሲሮም ዝነበሩ ከም ዝርከቡዎም ስድራቤቶም ገሊጾም ኣለዉ።