ዓርቢ ኣብ ዎሎንጎንግ፡ ኣውስትራልያ፡ ኣብ ዝተኻየደ ቅድድም ብሽግለታ መንገዲ መንእሰያት ደቂተባዕትዮ (ጁኒየር ደቂተባዕትዮ) ጀርመናዊ ኤሚል ሀርዞግ ተዓዋቲ ኮይኑ።
ዎልንጎንግ ዝሓለፈ ሰንበት ዝተጀመረ ሻምፒዮና ቅድድም ብሽግለታ ዓለም 2022 ተአንግድ ኣላ።
እቲ ውራይ ሓሙስ ዕረፍቲ ድሕሪ ምውሳድ ሎሚ ብምድባት ቅድድም ብሽግለታ መንገዲ መንእሰያት ደቂተባዕትዮ ቀጺሉ።
ተቐዳደምቲ ዝናብ ድሕሪ ምህራሙ ዝጠልቀየን ሸተት ዘብልን ጽርጊያ ተቐቢልዎም። ኤርትራውያን ተቐዳደምቲ ኣኽሊሉ ኣረፋይነ፡ ዮኤል ሃብተኣብን ዮናስ ተኪኤን ብወገን ደቂተባዕትዮ ኣብ’ዚ ምድብ ውድድር ተሳቲፎም።
ዮኤል መበል 28 ደረጃ ብምውጻእ እቲ ዝለዓለ ውጽኢት ዘመዝገበ ኮይኑ ክውድእ ኣንከሎ ዮናስ ድሕሪት ብምውጻእ መበል 60 ደረጃ ኣትዩ። ኣኽሊሉ ግን ቅድድሙ ከጠናቕቕ ኣይከኣለን።
ኣብ ቅድድም መንእሰያት ትሕቲ 23 ካዛኪስታናዊ የቭገልኒ ፈዶሮቭ ቀዳማይ ብምውጻእ ክዕወት እንከሎ ወዲ ቸክ ሪፓብሊክ ማቲያስ ቫቸክን ኖርወጃዊ ሶረን ወረንስክዮልድን ተኸቲሎሞ ካልኣይን ሳልሳይን ወጺኦም።
ኣብ’ዚ ምድብ ኢትዮጵያውያን ኪያ ሮጎራን ነጋሲ ሃይሉ ኣብርሃን ከምኡ’ውን ኤርትራውያን ስምኦን ተስፋጋብር፣ ኣማኑኤል መሓሪ፣ ዳንኤል በርሀ፣ ሳምሶም ሃብተን ሚልክያስ ቅዱስን ተሳቲፎም ኩሎም ቅድድሞም ክዛዝሙ ኣይከኣሉን።
ቀዳም መዓልቲ ቅድድማት መንገዲ ደቀንስትዮ ኮይኑ ደቀንስትዮ መንእሰያት/ጁኒየርን ደቀንስትዮ ዓበይቲ/ኤሊትን ቅድድመን ከካይዳ’የን።
