ንምክልኻል ኮቪድ-19 ናብ ኤርትራ ዝተላእከ ቀረብ ናብታ ሃገር ከይኣቱ ፍቓድ ተኸሊኡ ተባሂሉ።

ብቻይናዊ ቢሊዮኔር ጃክ ማን ኩባኒያኡ ዝኾነ ጉጅለ ኣሊባባ ንምክልኻል ኮቪድ-19 ዝተለገሰ ነገራት ናብ ኤርትራ ኣይበጽሐን ተባሂሉ።

እቲ ንምሉእ ኣፍሪቃ ተባሂሉ ዝተላእከን ቀዳማይ ሚኒስተር ኢትዮጵያ ኣብይ ኣሕመድ ናብ ኩሉ ተባጺሑ ኣሎ ኢሉ እንተገለጸኳ እቲ ንምክልኻል ኮሮና ቫይረስ ብዘይተፈልጠ ምኽንያት ናብ ኤርትራ ከምዘይበጽሐን፡ ተጣበቕቲ ግና መንግስቲ ኤርትራ ንህዝቢ ዘድሊ ነገር ብምንጻጉ እዩ ይብሉ ከምዘለዉ ድምጺ ኣመሪካ ጸብጺቡ።

እቲ ናይ መከላኸሊ ኣፍንጫን ኣፍን መመርመሪ መሳርሒን ናብ ብዙሓት ሃገራት ኣፍሪቃ እንተተላእከኳ እቲ ቀረብ ናብ ኤርትራ ከምዘይበጽሐ ሰብ መዚ ናይቲ ነዚ ዘተሓባብር ማእከል ምቁጽጻርን ምክልኻልን ሕማም ኣፍሪቃ ከምዘረጋገጽሉ VOA ኣረጋጊጹ።

እታ ነቲ ቀረብ መከላኸሊን መመርመሪን ኮሮና ቫይረስ ተሰኪማ ካብ ካርቱም ናብ ኣስመራ ብ23 መጋቢት ዝተበገሰት ነፋሪት ሰብ መዚ ኤርትራ ፍቓድ ከምዝኸልእዋ ስሙ ክግለጽ ዘይደለየ ሓደ ካብ ላዕለዎት ሰብ መዚ ማእከል ምቁጽጻርን ምክልኻልን ሕማም ኣፍሪቃ  ንድምጺ ኣመሪካ ከምዘረጋገጸሉ እቲ ጸብጻብ ሓቢሩ።

እቲ ኣብራሪ እታ ነፋሪት ኣብ ኣስመራ ክዓልብ ፍቓድ ምስተኸል አ ናብ ጂቡቲን ናብ ኬንያን ብምስጋር ናብ መበገሲኡ ናብ ኣዲስ ኣበባ ከምተመልሰ ይገልጽ እቲ ጸብጻብ ወሲኹ ኣብሪሁ።

ወሃብ ቃል ማእከል ምቁጽጻርን ምክልኻልን ሕማም ኣፍሪቃ ጄምስ ኣዮደል “እዚ ጉዳይ ብደረጃ ዲፕሎማት ይዝተየሉ ኣሎ።” ኢሉ።