ኣብ ፈጣን ዕብየት ዝርከብ መገዲ ኣየር ኢትዮጵያ ኣብ ናይ ዝሓለፈ ባጀት ዓመት ኣርባዕተ ቢሊዮን ዶላር ኣታዊ ከምዝረኸበን፣ 189 ሚሊዮን ዶላር ጽሩይ ኣታዊ ምርካቡን እቲ መገዲ ኣየር ከምዘፍለጠ ሪፖርተር ጸብጺቡ።
እቲ መገዲ ኣየር ኣብቲ ባጀት ዓመት 12.1 ሚሊዮን ተጓዓዝቲን 432,000 ቶን ጽዕነት ከምዘመላለሰን ቁጽሪ ተጓዓዝቱ ብ17 ሚእታዊ ከምዘዕበየ’ውን ተገሊጹ ኣሎ።
በዚ መሰረት ቁጽሪ ተጓዕዝቲ ብ 17 ሚእታዊ ብምዕባዩ፥ ቁጽሪ ተጓዓዝቱ 12.1 ሚሊዮን በጺሑ። በዚ ድማ እቲ መገዲ ኣየር ኣብ ታሪኹ ዝሓለፈ ናይ ባጀት ዓመት እቲ ዝበዝሐ ቑጽሪ ተጓዓዝቲ ከምዝነበርዎ ተፈሊጡ።
ኣካያዲ ስራሕ መገዲ ኣየር ኢትዮጵያ አቶ ተወልደ ገብረማርያም ንሪፖርተር ከምዝገለጾ ፣ ኣብቲ ዓመት ብዘጋጠመ ሓደጋ ምውዳቕ አውሮፕላን ቦይንግ 737 ማክስ እቲ መገዲ ኣየር ኣብ ታሪኹ ዘሕዝን ተመኩሮ ምሕላፉ ገሊጹ፡፡ “ንፈትዎም መሳርሕትናን ነኽብሮም ዓማዊልናን በቲ ሓደጋ ጠፊኦሙና እዮም” ክብል ሓዘኑ ገሊጹ።
እቲ መገዲ ኣየር 30 ማክስ አውሮፕላናት ካብ ኩባንያ ቦይንግ ንምግዛእ ዉዑል ኣትዩ እተን ሓሙሽተ ምስተረከበን እታ ሓንቲ ወዲቓ፡ እተን ዝተረፋ 4 ድማ ካብ ምብራር ብምእጋደን ብድምር ሓሙሽተ ኣውሮፕላን ካብ ስራሕ ወጻኢ ኮይነን ሕጽረት ነፈርቲ ኣጋጢሙ ምንባሩ እቲ ኣካያዲ ስራሕ ገሊጹ።
እቲ ካልእ ጸገም እቲ መገዲ ኣየር ዝገጠሞ ጸገም፡ ብዙሓት ሃገራት ኣፍሪቃ ሕጽረት ናይ ወጻኢ ሸርፊ ስለዝገጠመን እቲ ዝተሸጠ ትኬት ናብ ዶላር ቀይርካ ናብ ኢትዮጵያ ንምምላስ ከምተጸገሙ ኣቶ ተወልደ ገሊጹ።
ካብቲ ክረኽብዎ ዝነበሮም መኽሰብ ብሰንኪ ሕጽረት ናይ ወጻኢ ሸርፊ ንኣታዊ እቲ መገዲ ኣየር ብኣሉታ ካብዝጸለዋ ሃገራት ከምዘለዋን፡ ኣብ ዚምባቡዌ፣ ኣብ አንጎላ፣ ኣብ ሱዳንን ኤርትራን ገንዘብ ተታሒዝዎም ከምዘሎ ኣቶ ተወልደ ገሊጹ።
ኣብ አንጎላ 40 ሚሊዮን ዶላር፣ ኣብ ሱዳን 30 ሚሊዮን ዶላር፣ ኣብ ዚምባቡዌ 15 ሚሊዮን ዶላር፣ ኣብ ኤርትራ 8 ሚሊዮን ዶላር ተታሒዝዎም ከምዘሎ ዝገለጸ ኣቶ ተወልደ፡፡ “ነዚ ኹሉ ጸገም ተጻዊርና መኽሰብ ብምርካብና ሕጉሳት ኢና።” ክብል ገሊጹ።
አቶ ተወልደ ዝርዝር መግለጺ ከይሃበ ኣብ 2043 እቲ መገዲ ኣየር 25 ቢሊዮን ዶላር ዓመታዊ ኣታዊ ክህልዎን ልዕሊ 200 ነፈርቲ ክውንን መደብ ከምዘለዎም ኣፍሊጡ።
