መገዲ ኣየር ኢትዮጵያ ድሕሪ 41 ዓመታት ናብ መቓዲሾ በረራ ክጅምር አዩ።

መገዲ ኣየር ኢትዮጵያ ናይ ፈለማ በረራኡ ካብ ኣዲስ ኣበባ ናብ ኣህጉራዊ መዓርፎ ነፈርቲ ዓደን ኣብዱላሕ መቓዲሾ ዝመጽእ ሰሙን ከምዝጅምር መርበብ ሓበሬታ ኦል ኣፍሪካ ሓቢሩ። መገዲ ኣየር ኢትዮጵያ ናብ ሶማሊያ በረራ ምግባር ዘቋረጾ፣ ኣብ 1977 ኢትዮጵያን ሶማሊያን ኣብ ኲናት ድሕሪ ምእታወን እዩ።

ኣብዚ እዋን ካብ መቓዲሾ ናብ ኣውሮጳን ሰሜን ኣመሪካን ዝጓዓዙ  መገዲ ኣየር ቱርኪ ተጠቒሞም ወይ ናብ ናይሮቢ ተጓዒዞም እዮም መገዶም ክቕጽሉ ጸኒሖም።

መገዲ ኣየር ኢትዮጵያ ናብ ዋና ከተማ ምምሕዳር ፑንትላንድ ዝኾነት ናብ ጋሮወ ካብ 2015 ኣትሒዙ በረራ ከምዝጀመረ ከምዝፍለጥ እቲ ዝተረኽበ ዜና ይሕብር።