ሚኒስተር ፋይናንስ ኤርትራ ነበር ኣቶ ብርሃነ ኣብርሀ ተኣሲሩ

ኣብዚ ቅንያት ኣብ ዉሽጢ ኣስመራ ኮይኑ ንመንግስቲ ኤርትራ ብፍላይ ድማ ንፕረሲደንት ኢሳያስ ኣፈወርቂ ዝወቅስ ክልተ ክፋል ዘልዎ መጻሕፍቲ ኣሕቲሙ፡ እቲ ዝተሓትመ መጻሕፍቲ ኣብ ወጻኢ ክሽየጥ ድሕሪ ምቕናይ፡ ኣቶ ብርሃነ ኣብርሀ፡ ትማሊ ሚሸት ኣብ ቀይዲ ኣትዩ ከምዘሎ ዝተፈላለዩ ምንጪታት ይገልጹ ኣለዉ። ሚኒስተር ብርሃነ ኣብርሀ ብዘይካ እቲ ንፕረሲደንት ኢሳያስ ዝወቅስ ዝጸሓፎ ጽሑፋት፣ ብድምጺ ተቐዲሑ ኣብ ማሕበራዊ መዲያታት ተዘርጊሑ ዝቐነየ ንኣቶ ኢሳያስን ህዝቢ ኤርትራን ዘመሓላለፎ መልእኽቲ፡ ባይቶ ኤርትራ ክእከብን ፕረሲደንት ኢሳያስ ካብ ስልጣኑ ተኣልዩ ባይቶ መራሒ ሃገር ክመርጽን ዝጠልብ ትሕዝቶ ዘለዎ እዩ።

ከም ኣብ ዝሓለፉ ኣብ ኤርትራ ዝተራእየ ኮነታት፡ ማለት ንመንግስቲ ኣብ ዉሽጢ ኤርትራ ዝተቓወመ ናይ መወዳእታ ዕጫኡ ኣብ ቤት ማኣሰርቲ እዩ ዝማስን፡ ናይ ኣቶ ብርሃነ ዕጫውን ከምኡ ከምዝኸውን ብዙሓት ክጽበይዎ ዝቐነዩ ጉዳይ እዩ። እዚ  ማኣሰርቲ ናይ ኣቶ ብርሃነ ኣብርሀ ዝመጽእ ዘሎ፡ ፕረሲደንት ኢሳያስ ምስ ቀዳማይ ሚኒስተር ኢትዮጵያ ኣብቲ ንህዝቢ ቅሉዕ ዘይኮነ ስምምዕ ተፈራሪሙ ካብ ጂዳ  ናብ ኣስመራ ኣብ ዝምለሰሉ ዘሎ እዋን እዩ።

በዓልቲ ቤቱ ንኣቶ ብርሃነ ኣብርሀ ንኣዋርሕ ኣብ ቤት ማኣሰርቲ ከምዘላ ይፍለጥ።