ራብዓይ መዓልቲ ናይ’ቲ ኣብ ሻርም ኤል ሸይኽ፣ ምስሪ፣ ዝካየድ ዘሎ ሻምፒዮና ቅድድም ብሽግለታ መንገዲ ኣፍሪቃ 2022 ክልተ ቅድድማት መንገዲ ናይ መንእሰያት ወይ ጁኒየር ክልቲኡ ጾታታት ብምክያድ ተጠናቒቑ።
ፈለማ ብወገን ደቀንስትዮ 64.2 ኪሜ ርሕቀት ዝሸፈነ ቅድድም መንገዲ ተኻይዱ ደቡብ ኣፍሪቃ ብመንገዲ ከይትሊን ቶምሰን ተዓዋቲት ብምዃን ወርቂ መዳልያ ክትዓትር እንከላ ሞውሪሸስ ከኣ ብመንገዲ ኡዌራ ኤይሊን ንኤርትራ ተኸቲላ ሳልሳይ ብምውጻእ ነሓስ መዳልያ ክትስለም ክኢላ።
ኤርትራዊት ሮምና ጉዕሽ ካልኣይቲ ወጺኣ ብሩር መዳልያ ብምዕታር ምረሻ ኤርትራውያን ተቐዳደምቲ ኣብ ምሕፋስ መዳልያታት ከምዝቕጽል ጌራቶ’ላ።
ደቂተባዕትዮ መንእሰያት ብወገኖም 85.8 ኪሜ ዝርሕቀቱ ውድድር ድሕሪ ምሽፋን ዮኤል ሃብተኣብን ኣኽሊሉ ኣረፈን ተመራሪሖም ቀዳማይን ካልኣይን ብምውጻእ መዳልያታት ወርቅን ብሩርን ንሃገሮም ኣምጺኦም። ሞውሪሸስ እታ ዝተረፈት ቦታ ፖድየም ብምውሳድ ነሓስ መዳልያ ዓቲራ።
እቲ ውራይ ሰንበት ቅድሚ ምጥንቓቑ ኤርትራ ብሽዱሽተ መዳልያታት ወርቂ፣ ሽዱሽተ መዳልያታት ብሩርን ክልተ መዳልያታት ነሓስን ኣብ ሰንጠረዥ ብዝሒ መዳልያታት መሪሕነት ሒዛ ተቐሚጣ’ላ።
