ንኸሰላ ወሲክካ፣ ኣብ ክልተ ክፍለ ግዝኣታት ሱዳን ናይ ህጹጽ እዋን ኩነታት ተኣዊጁ።

ወግዓዊ ወኪል ዜና ሱዳን ብቐዳም ከምዝገለጾ፣ ናይ ሱዳን ፕረሲደንት ኣብ ክልተ ክፍለ ግዝኣታት ኣታ ሃገር ናይ ህጹጽ ኩነታት ኣዋጅ ኣዊጁ ኣሎ።

ፕረሲደንት ዑመር ኣል በሺር ኣብቲ ምስ ኤርትራ ከምኡውን ምስ ኢትዮጵያ ዝዳወብ ክፍለ ግዝኣት ከሰላ ከምኡ’ውን ሰሜን ኮርዶፋን’ዩ እቲ ኣዋጅ ህጹጽ ኩነታት ንሽድሽተ ኣዋርሕ ከምዝኣወጀ ወኪል ዜና ሱና ገሊጹ፡፣

 ከሰላ ኣብ ምብራቕ ሱዳን ትርከብ ምስ ኤርትራ ትዳቦ ክፍለ ግዝኣት’ያ፡፣

ኣብቲ ካብ 2003 ዓመተ ምሕረት ኣትሒዙ  ብኩናት ዝሕመስ ከም ዳርፉር ዝበሉን ካልኦት ሸውዓተ ቦታታት ሱዳን ናይ ህጹጽ ኩነታት ኣዋጅ ድሮ ተኣዊጁ እዩ።

ብመሰረት ቅዋም እታ ሃገር ነቲ እቲ ፕረሲደንት ኣዊጅዎ ዘሎ ናይ ህጹጽ ኩነታት ኣዋጅ ኣብ ተግባር ንኽውዕል ፓርላማ ኣብ ዉሽጢ ክልተ ሰሙን ከጽድቖ ኣለዎ።