መልሲ መንግስቲ ኤርትራ ብዛዕባ ብ ኢትዮጵያ ክበሃል ዝቐነየ ዋንነት ቀይሕ ባሕሪ

ኣብዚ ቀረባ እዋን ብሰበ ስልጣን ኢትዮጵያ ብፍላይ ድማ መደረ ቀዳማይ ሚኒስተር ኣብይ ኣሕመድ ብወግዒ ን ኣባላት ሰልፊ ብልጽግና ዝሃቦ መግለጺ ስዒቡ እዩ እዚ ብሚኒስትሪ ጉዳያት ወጻኢ ኤርትራ ሎሚ መግለጺ ዝወጸ።

ምሉእ ትሕዝቶ መግለጺ ሚኒስትሪ ጉዳያት ወጻኢ ኤርትራ እዚ ዝስዕብ እዩ።

"ኣብዚ ቀረባ እዋን ዝንሳፈፉ ዲስኩራት – ጭቡጥን ግምታዊን – ብዛዕባ ማይ፡ ምብጻሕ ባሕሪን ተዛመድቲ ኣርእስታትን፡ ዓቀኑ ዝሓለፈን፡ ካብ መጠን ንላዕሊን ኢዩ። እቲ ጉዳይ ንኹሎም ዝምልከቶም ተዓዘብቲ ወገናት ከይተረፈ ዘየስደመመ ኣይነበረን።

ስለ'ዝኮነ መንግስቲ ኤርትራ ከም ቀደሙ ናብ ከም'ዚ ዝኣመሰለ ጸበብቲ መሽጎራጉራትን መድረኻትን ከም'ዘይዕደም ብተደጋጋሚ ይገልጽ። ብተወሳኺ መንግስቲ ኤርትራ፡ ኩሎም ዝምልከቶም ኣካላት፡ በዚ ከም'ዚ ዝኣመሰለ ምትኹታኽ፡ ካብ ቀንዲ ዕላምኡን ተልእኽኡን ተኣልዩ፡ ከይድህለል ይላቦ።"