ራሻ ወተሃደራዊ መዓስከር ኣብ ሱዳን ክትተክል ምዃና ተገሊጹ::

አቲ ኣብ ዝሓለፈ ሰሙን ንፈለማ እዋን ናብ ራሻ ወግዓዊ ምብጻሕ ዝገበረ ፕረሲደንት ሱዳን ዑመር ኣል-በሺር ምስ Sputnik ዝተባህለ ማዕከን ዜና ብቐዳም ኣብ ዝገበሮ ቃለ መጠይቕ፡ ምስ ፕረሲደንት ቪላድሚር ፑቲንን ሚኒስተር ምክልኻል ሰርጌ ሾይጊ ብዛዕባ ተኽእሎ ምድኳን ወተሃደራዊ ማዓስከር ራሻ ኣብ ሱዳን ከምዝዘተየ ገሊጹ።

ሱዳን ነቲ ኣብ ገማግም ቀይሕ ባሕሪ ዝድኮን ወተሃደራዊ መዓስከር ራሻ ድልውቲ ከምዘላን እቲ ዝድኮን መዓስከር፡ ሱዳን ኣንጻር ኣሰጋገርቲ ሰባትን ንግዲ ባርነትን ኣብ ትገብሮ ቃልሲ ከምዝሕግዛ ሓልፊ ኮሚቴ ምክልኻልን ጸጥታን ፓርላማ ሱዳን ኣልሓዲ ሓሚድ ገሊጹ።

ንሱ ብተወሳኺ ከምዝሓበሮ፡ "መሪሕነት ራሻ ኣብ ቀይሕ ባሕሪ መዓስከር እንተሃኒጹ ምኽኑይ አዩ። እዚ ኣብ ቁጠባዊን ወተሃደራዊን ምትሕብባር ክልቲኤን ሃገራት ዝቃዶ እዩ” ብምባል ሓሚድ ይገልጽ

ኣብ እዋን’ቲ ፕረሲደንት ዑመር ኣልበሺር ምስ ፕረሲደንት ፑቲን  ብዛዕባ ምድኳን ወተሃደራዊ መዓስከር ራሻ ኣብ ሱዳን ዝዘተየሉ እዋን፥ ካብ ራሻ Su-30 ን Su-35ን ተዋጋእቲ ጀት፡ብተወሳኺ S-300 ዝበሃል ናይ ኣየር መከላኸሊ ክትዕድግ ስምምዕ ከምተገብረ እቲ ጸብጻብ ይገልጽ። ኣብቲ እዋን ምስምማዕ ኣልበሺር ከምዝገለጾ “ሱዳን ኣንጻር ናይ ወጻኢ ሃገራት ዝዓለመ ናይ ዕንደራ መደብ የብላን፡ ንሕና ንሃገርና ክንከላኸል ኢና ንደሊ።” ኢሉ።