ሱዳን፡ እስላም ንዘይኮኑ ዜጋታት ኣልኮላዊ መስተ ምስታይ ከተፍቅድ እያ።

ኣብ ሱዳን ዝጸንሐ ኣልኮላዊ መስተ ምስታይ ዝእግድ ሕጊ ነቶም  ኣስላም ዘይኮኑ ዜጋታት ነቲ ሕጊ ከተልዕሎ ምዃና ዶቸ ቬለ ጸብጺቡ።

ብዘይካዚ ሱዳን ኣብ ደቂ ኣንስትዮ ዝግበር ግዝረትን ካልኦት መሰል ደቂ ኣንስትዮ ንምኽባር ዘኽእል ናይ ሕጊ ምምሕያሽ ከምትገብር ናይ ሱዳን ሚኒስተር ፍትሒ ኣፍሊጡ።

ሰለስተ ሚእታዊ ካብ ህዝቢ ሱዳን ተኸተልቲ ሃይማኖት እስልምና ኣብ ሱዳን ከምዝርከቡ ዝፍለጥ ኮይኑ ኣብ 1983 እዩ ኣብ እዋን ናይ ቀደም ፕሬዚዳንት ጃዕፈር ኒሜሪ፡ ኣብ ሱዳን ኣልኮላዊ መስተ ብወግዒ ተኸልኪሉ።  ድሕሪ ዕልዋ ፕሬዚዳንት ነበር ዑመር ኣልበሽር ካብ ስልጣን፡ ኣብ ሱዳን ስልጣን ሒዙ ዝርከብ ናይ መሰጋገሪ መንግስቲ ነታ ሃገር ናብ ዴሞክራሲ ንምምላስን ምስ ተቓወምቲ ናይ ሰላም ዝርርባት ኣብ ምግባር ይርከብ።

ኣብ ሱዳን ዝነብሩ ሃይማኖቶም እስላም ዘይኮኑ፡ ኣልኮላዊ መስተ ምስታዮም ገበን ዝኾነሉ ግዜ ከምዝሓለፈ  ናይ ፍትሒ ሚኒስተር ነስረዲን ዓብዱልባሪ ኣብ ናይ ሱዳን ቴሌቪዥን ገሊጹ። እቲ ኣልኮላዊ መስተ ከይስተ ዝኽልክል ሕጊ ንተኸተልቲ ሃይማኖት እስልምና ከምቲ ዝጸንሐ ከምዝቕጽል እቲ ሚኒተር ኣረጋጊጹ ኣሎ።  

መሰል ደቂ ኣንስትዮ ብዝምልከት በብቕሩብ ምምሕያሽ ይግበረሉ ከምዘሎ እቲ ጸብጻብ የመልክት። ናይ ኣዋልድ ቆልዑ ምግራዝን ካልእ ደቂ ኣንስትዮ ኣብ ማሕበራዊ ንጥፈታተን ዝምልከት ለውጢ ክግበር ከምዝኽእል ተፈሊጡ ኣሎ።