ኣዛዚ ሰራዊት ሱዳን ዓሪፉ

ሓደ ካብ ላዕለዎት ሓለፍቲ ሰራዊት ሱዳን ኣብ ከተማ ጁባ ኣብ መዕረፊ ሆቴሉ እንከሎ ዓሪፉ።

Source: Wikipedia

ኣዛዚ ሰራዊት ሱዳን ሌተናንት ጀነራል ጀማለዲን ዑመር ከምዝዓረፈ ዝተፈላለያ ምንጭታት ዜና ካብ ሱዳን ጸብጺበን። ንሱ ፕረዚደንት ነበር ዑመር ኣልበሽር ካብ ስልጣን ድሕሪ ምእላዩ ንሱዳን ዝመርሕ ዝነበረ ወተሃደራዊ ጉጅለ ኣባል ኔሩ።

ክሳብ ህይወቱ ዝሓለፈትላ ኸኣ ከም ሚኒስተር ምክልኻል ኮይኑ ይሰርሕ ኔሩ። እዚ ሌተናንት ጀነራል ኣብ መንጎ መንግስቲ ሱዳንን ናይ'ታ ሃገር ተቓወምትን ኣብ ደቡብ ኣብ ዝካየድ ዘሎ ዘተ ሰላም ንምስታፍ ናብ ደቡብ ሱዳን ኣብ ዝገሸሉ ኣብ'ቲ ኣብ ከተማ ጁባ የዕሪፍሉ ዝነበረ ሆቴል'ዩ ህይወቱ ሓሊፉ ሓዲሩ።

ንሱ ኣብ ዳርፉር፡ ደቡባዊ ዞባታትን ካልኦት ርሑቕ ከባቢታ ሱዳን ክሳብ ሕጂ ዝቕጽሉ ዘለው ውግኣትን ዕግርግራትን ንምፍታሕ ካብ ዝሓለፈ ወርሒ ጥቅምቲ ጀሚሮም ኣብ ዝተጀመሩ ተበግሶታት ሰላም መሪሕ ተራ ሒዙ ክጻወት ጸኒሑ'ዩ።

ድሕሪ ምማቱ ግን እዞም ዘተታት ናብ ካልእ እዋን ክመሓላለፉ ምዃኖም ይግለጽ ኣሎ፡ ሬስኡ ኸኣ ናብ ኻርቱም ኣማስይኡ (ሮቡዕ ምሸት) ክምለስ'ዩ ክትብል ኣገልግሎት ዜና ሱና ጸብጺባ።

ብሞት'ዚ ሓደ ካብ'ቶም ዝለዓሉ ወተሃደራዊ ሓለፍቲ ሱዳን ዝነበረ ሰብ ግብጺ ቀዳመይቲ ተጠርጣሪት ኮይና'ላ። ካልኦት ምንጭታት ግን ብልቢ ድኻም'ዩ ዓሪፉ ክብላ የቃልሓ ኣለዋ።