ዑመር ኣልበሽር ጽኑዕ ሓለዋ ናብ ዘለዎ ቤት ማእሰርቲ ተወሲዱ

ናይ ቀደም ፕረሲደንት ዑመር ኣልበሽር ኣብ ካርቱም ዝርከብ ኮበር ናብ ዝተባህለ ጽኑዕ ቤት ማሕቡስ ከምተወስደ ተፈሊጡ። ኣብ ሰሜናዊ ኻርቱም ዝርከብ ቤት ማእሰርቲ ኮበር፡  ኣባላት ፍሉይ ሓለዋ ዝርከብዎም ብዙሓት ወተሃደራትተዋፊሮም ከምዘለዉ ተፈሊጡ ኣሎ።

ኣኪርላህዛ ዝተባህለ ሓደ ናይ ሱዳን ጋዜጣ ኣብዘውጽኦ ጽሑፍ፡ ኣልበሽር ካብቲ ዝነበሮ መቐበሊ ኣጋይሽ ናብቲ ቤት ማእሰርቲ ሰጊሩ ኣሎ። ብዘይካ ንሱ፡ ሓዉ ንዑመር ኣልበሽር ዝኾነ ኣብዱላህ ኣልበሽር፡ ጀማል ኣልዋሊ ዝተባህለ ነጋዳይ ከምኡውን ኣባላት ኣመራርሓ ናይቲ ኣልበሽር ዝመርሖ ዝነበረ ሰልፊ ሃገራዊ ቤት ምኽሪ  ዝርከብዎም ናብቲ ቤት ማእሰርቲ ምስ ኣልበሽር ከምተዛወሩ እቲ ካዜጣ ጸብጺቡ። ናይቲ ሰልፊ ንብረት ብምልኡ ክውረስ ህዝቢ ይሓትት ከምዘሎ ተፈሊጡ ኣሎ።

እቲ ኣልበሽር ምስ መሳርሕቱን ወዱን ተኣሲሮሙሉ ዘለዉ ጽኑዕ ቤት ማእሰርቲ፡ ኣብ ዘበነ መግዛእቲ እንግሊዝ ዝተሃንጸ ኮይኑ፡ ንኣልበሽር ዝቃወሙን ሱዳናዊያን ተጣበቲ መሰልን ክሳቐይሉ ዝጸንሑን ምዃኑ ተፈሊጡ ኣሎ።