ኣብ ምውዳእ እዚ ዓመት፡ ብዝሒ ህዝቢ ዓለም 7.75 ቢልዮን ክረግጽ እዩ።

ኣብ ድሮ እዚ ንኣትዎ ዘለና ሓዲሽ ዓመት ኣብ ዓለም  7.75 ቢልዮን ዝኾኑ ህዝቢ ኣብ ዝባን መሬት ክህልዉ እዮም- ብመሰረት ግምት ናይ ጀርመን ማእከል መጽናዕቲ ህዝቢ ዓለም (DSW) ።

አዚ ምስቲ ከምዚ እዋን ናይ ዝሓለፈ ዓመት ክወዳደር'ከሎ  83 ምልዮን ተወሳኺ ህዝቢ ኣብዚ ዓለም ክህሉ እዩ። እቲ ተወሳኺ ብዝሒ ዳርጋ ምስቲ ዘሎ ብዝሒ ህዝቢ ጀርመን ዝመጣጠን ምዃኑ እቲ ማእከል ኣፍሊጡ።

ብመሰረት መጽናዕቲ DSW, ኣብ ነፍሲ ወከፍ ካልኢት ብገምጋም  2.6 ህዝቢ ናብ ዓለም ይውሰኽ። እዚ ካብቶም ዝውለዱ እቶም ዝሞቱ ሰባት ኣጉዲልካ ዝርከብ ብዝሒ እዩ።

ብዝሒ ህዝቢ ዓለም 8 ቢሊዮን ዝረግጽ ኣብ 2023 ከምዝኸውን ተገሚቱ ኣሎ።

እቲ ማእከል ብተወሳኺ ከምዝሓበሮ፡ ኣዴታት ኣፍሪቃ ኣብዚ እዋን ብገምጋም  4.4 ቆልዑ ኣለዉወን፡ እዚ ምስቲ 2.4 ናይ ዓለም ገምጋም ብዝሒ ብዕጽፊ ይዓቢ።

ብመሰረት ትንበያ ዉዱብ ሕቡራት ሃገራት ብዝሒ ህዝቢ ኣብ ኣፍሪቃ ካብዚ ሕጂ ዘለዎ 1.3 ቢልዮን ህዝቢ ኣብ 2050 ዳርጋ ብዕጽፊ ናብ 2.5 ቢልዮን ክብ ክብል እዩ።