"ኢትዮጵያዊነታችንን ካላስቀደምንና በጎሳ አካሔድ የሚኬድ ከሆነ፤ አሁን እንኳ የተረፈችዋን ኢትዮጵያ ላናገኛት እንችላለን" የቀድሞው ጠ/ሚ/ር ፍቅረ ሥላሴ ወግደረስ

ጄኔራል አማን አንዶም 'ኤርትራ ትገንጠል' የሚለውን ግልፅ አቋም ብዙ ጊዜ አያንፀባርቁም። ፌዴሬሽን እንዲፈጠር ፍላጎት አላቸው። ጀብሃና ሻዕቢያን ለማስታረቅ ብዙ ሙከራ፣ ብዙ ጥረት አድርገዋል። በእኛ በኩል ግን ይህ ፍፁም የሚሆን ነገር ሆኖ አልተገኘም።

ትልቅ የግንዛቤ እጥረት አለ። ነገሮችን ሰፋ አድርጎ መመልከት ይገባል። የኢትዮጵያ ሠራዊት የተሸነፈው በወያኔ ሠራዊት እንዳልሆነ መታወቅ ያለበት ይመስለኛል። የ17 ዓመት እንቅስቃሴ ውጤት ነው። እኛ የተዋጋነው በጣም ከብዙ ኃይሎች ጋር ነው። ለተቃዋሚዎች እርዳታ የሚያደርጉ የውጭ ኃይሎች ነበሩ።

ወደፊትም የውጭ ኃይሎች (ምዕራባውያን፣ ዓረቦችና ጎረቤት ሀገሮች) ፍላጎታቸው እስካልተሟላላቸው ድረስ የኢትዮጵያን መንግሥት መቃወማቸው አይቀርም። አለያ ለእነሱ ፍላጎት ሀገሪቱን ክፍት ማድረግ አለብን። እኛ ደግሞ ነፃነትን እየጠበቅን፤ የኢትዮጵያን ክብር የምናስጠብቅ ሰዎች ነን ብለን ስለምናምን፤ ፍላጎታቸውን ልናሟላላቸው አልቻልንም። እናም ሊያጠፉን ተነሱ።

እኔ እንዲያውም መሸነፋችን ሳይሆን የሚገርመኝ፤ ለ17 ዓመት መቆየታችን ነው። ከነበረብን ጠላትና ችግር አንፃር።

እኛ ደሃ ሆነን እንደገባን፤ ደሃ ሆነን ነው የወጣነው።

ለኢትዮጵያ ሕዝብ አክብሮትና ምስጋና አለኝ። መልካም አንደሠራን ሁሉ ጥፋቶችንም ሠርተናል። ለኢትዮጵያ ሕዝብ ለማሳሰብ የምፈልገው፤ ኢትዮጵያ በኢትዮጵያዊነት መቆየት የምትችለው፣ ሁላችንም ኢትዮጵያውያን ነን ብለን በኩራት ልንኖር የምንችለው፣ ልጆቻችንና የልጅ ልጆቻችንም ኢትዮጵያውያን ነን ብለው መኖር የሚችሉት፤ አንድነታችን ሲጠበቅ ብቻ ነው።