Sensas blong 2026 blong Ostrelia i stap long Tusde namba 11 blong Ogis mo evriwan we i stap long Ostrelia long taem ia oli mas stap insaed long kaon ia. Ol infomesen blong Sensas i save helpem yumi blong andastanem ol samting blong ol pipol we i stap, olsem ol ples we yumi stap, ol lanwis yumi save toktok insaed long haos (inkuldem saen lanwis blong Ostrelia we nem blong hem hemi Auslan), ol samting blong sapot we ol komuniti i save nidim mo ol samting we i save jenjem Ostrelia olsem wan kantri ia. Sapos yu stap insaed long kaon ia, hemi save helpem blong mekem sua se ol kalja mo komuniti blong yu i save kam pat blong ol samting long fiuja ia. Hemia hemi ol samting we yu nidim blong save long saed blong fulumap Sensas ia olsem se bae yu mo olgeta long haos blong yu, yufala evriwan i save stap insaed long hem.
Ol importan samting
- Yumi evriwan we yumi stap long Ostrelia long namba 11 blong Ogis 2026 i mas fulumap Sensas ia.
- Ol ansa blong yu i save helpem olgeta we i kivim ol sevis blong oli save andanstanem ol samting we yu nidim mo hao nao bae ol samting ia i save jenj long fiuja.
- Ol samting we yu save raetem long Sensas we hemi praevet infomesen, oli save mekem sua se hemi stap sef mo i nokat wan janis blong serem aidentiti blong yu aot long ol samting ia.
- Ol infomesen blong Sensas i save helpem blong mekem ol disisen long saed blong ol sevis mo sapot we bae komuniti blong yu i save kasem.
- Hemi tru se Sensas ia hemi blong kaontem ol pipol we oli stap nomo?
- Hu ia i mas fulumap Sensas ia?
- Sapos mi no stap long haos blong mi long naet ia?
- Wanem kaen kwestin i stap long Sensas ia?
- Sapos mi stap fraet long hu ia i save yusum ol infomesen blong mi?
- From wanem se hemi importan blong putum ol stret ansa long Sensas ia?
- Hao nao ol infomesen blong Sensas i save helpem olgeta insaed long ol maltikaljural komuniti?
- Yumi kat samfala sapot i stap?
Hemi tru se Sensas ia hemi blong kaontem ol pipol we oli stap nomo?
Long wan taem afta long faef yia i bin pas, Ostrelia Buro blong Statistik (ABS) i save putum evri fala mo haos long Ostrelia long wan kaon. Hemia hemi sensas blong populesen mo ol haos, be plante fala i kolem hem Sensas nomo.
Ol infomesen ia i save helpem blong disaedem ol sevis we i save kam long lokol rijon blong yu o long komuniti blong yu.
Nasonel spika blong ABS sensas prokram, Emily Walter, i talem se Sensas hemi nambawan bigfala samting blong pulum i kam insaed ol kaen infomesen ia long Ostrelia mo hemi save kivim yumi ol important samting blong save.
“Hemi wan smol pikja blong talem se hu ia yumi naoia mo kaen fasin we yumi save jenj long fiuja ia,” hemi talem. “Sensas i stap askem ol kaen kwestin long saed blong helt, edukesen, kalja, wok ol samting olsem hemia, we evri samting blong hem i save soem wan pikja blong ekonomi, sosaeti mo kalja long Ostrelia."
Ol infomesen blong Sensas ia i save helpem blong mekem sua se ol sevis mo ol nara samting olsem ol bilding blong pablik we i stap i blong yumi evriwan ol famli, komuniti mo blong mekem sua se i stap long wan stret ples. Hemia hemi olsem ol sevis blong lanwis, skul, helt senta, prokram blong komuniti, pablik transpot mo ol samting blong helpem ol niufala we i stap festaem long we.
Hu ia i mas fulumap Sensas ia?
Evriwan we i stap long Ostrelia long Sensas naet, namba 11 blong Ogis 2026 i nidim stap long kaon ia.
Yu mas mekem sua se yu fulumap Sensas ia. Hemi minim se evri haos mo evri fala long Ostrelia long naet ia i mas stap long kaon.
“Hemia i inkludum olgeta ol intenasonal studen, turis, oli we i kat wan visa mo ol bebet. Samfala i bin lego ol bebet long ol Sensas blong bifo!” Ms Walter i bin talem.
Long taem we yu stap fulumap sensas long haos blong yu, bae yu mas inkludem evriwan we i stap insaed long hem long naet ia insaed long hem.
Sapos mi no stap long haos blong mi long naet ia?
Sapos yu stap long wan nara kantri long namba 11 blong Ogis, yu no nidim fulumap Sensas ia.
Be sapos yu stap long Ostrelia nomo, olsem se yu stap long holidei o wetem samfala ol fren blong yu, bae yu mas fulumap long stret ples we yu stap long hem. Sensas tu i kat wan kwestin insaed long hem blong askem se wanem ia ples we yu stap oltaem.
Yu no nidim fulumap evri samting long hem long naet ia, be ol ansa blong yu i mas talem ol samting we i bin stret long laef blong long long naet ia nomo. Bae yu save fulumap kwiktaem sapos yu save finis ol samting ia.
Wanem kaen kwestin i stap long Sensas ia?
Long taem bifo naet ia, klosap long evri haos bae oli save kasem wan leta we bae hemi save letem yu save se wanem ol samting we yu nidim mekem blong fulumap sensas ia long onlaen. Sam blong ol haos ia bae oli save kasem wan pepa sensas.
Sensas i save askem ol kwestin long saed blong helt, edukesen, wok mo samfala ol narafala kwestin we bae oli save talem stori blong ol samting blong ol haos mo komuniti.
“Ol kwestin ia i olsem se: yu blong Aborijinal mo Tores Stret Aelan pipol, yu save toktok wan narafala lanwis insaed long haos blong yu, wanem kantri we yu bin bon long mo mami mo dadi blong yu i bin bon long hem, ol bubu mo apu, rilijen mo long wanem yia yu bin kam blong stap long Ostrelia.”
Sapos mi stap fraet long hu ia i save yusum ol infomesen blong mi?
Oli kat sam samting blong kipim sef ol infomesen ia.
Sensas ia i no blong wan wan man nomo, be hemi blong karem i kam tugeta ol kaen infomesen blong ful kantri ia.
Sensas ia i save askem from nem mo adres blong leftemap kwaliti blong ol infomesen ia, inkludum ol stret infomesen blong ol difren ples. Ol nem ia oli save sakemaot festaem long taem we oli i save lukaot ol infomesen insaed long hem.
Long saed blong loa, mifala i no alao blong serem ol infomesen ia wetem eniwan long kavman o long ol nara ples we bae oli save lanem aidentiti blong yuEmily Walter
Hemia i minim se ol infomesen blong yu i stap sikret, sef mo oli no save yusum blong faenemaot aidentiti blong yu. Ol oanaisesen, inkludum ol pat blong kavman we oli no blong ABS, oli no save luk eni kaen infomesen blong yu we i stap long Sensas ia.
Ol infomesen blong sensas we i nomo kat ol samting blong aidentiti blong yumi insaed long hem i save ko long samfala ol komuniti krup, no-blong-profit oanaisesen, bisnis mo kavman.
Welkamem Ostrelia hemi wan blong olgeta oanaisesen ia. Oli wok wetem ol lokol kavman, spot, yuniversiti mo ples blong wok we i stap raon long kantri ia.
CEO blong Welkamem Ostrelia, Aleem Ali, i talem long yumi evriwan blong kivim ol ansa long ol kwestin long wan stret fasin.
“Sapos yu no save raetem ol lanwis, fet, kalja blong yu, bae yu save stap aotsaed long tingting blong olgeta we oli save mekem ol importan samting blong kivim mani long ol krup ia.”
From wanem se hemi importan blong putum ol stret ansa long Sensas ia?
Sapos yu save fulumap Sensas long wan stret fasin, hemia i mekem sua se ol vois blong yu mo komuniti blong yu i stap insaed long ol plan blong skul, komuniti senta, lanwis sapot mo ol nara sevis olsem we oli importan
Mr Ali i askem yumi blong fulumap ol ansa long wan fasin we i stret mo hemi tru.
Sensas hemi blong saed blong rispek blong fasin we oli save luk yu wan, mo gudhat blong ol risos we i save ko long komuniti blong yu we oli nidim.Aleem Ali
Peter Doukas hemi jea blong Federesen blong Etnik Komuniti Kaonsil blong Ostrelia (FECCA).
Hemi talem se ol komuniti oaenaisesen olsem Etnik Komuniti Kaonsil raon long kantri ia i bin patna wetem ABS blong kivim ol infomesen ia long ol lanwis mo blong helpem blong mekem sua se olgeta long ol komuniti ia i no save wari long Sensas.
“Fasin blong faenemaot ol stret infomesen mo blong helpem ol pipol blong andastanem se hemi wanfala importan samting insaed long laef blong ol komuniti insaed long Ostrelia ia hemi importan tumas.” hemi bin talem.
Aleem Ali i talem se ol infomesen blong Sensas i importan long Welkamem Ostrelia “...fromse hemi helpem mifala blong sapotem olgeta oanaisesen we mifala i save wok wetem blong helpem moa pipol i kam insaed long wok blong mifala mo blong wok wetem ol difren kaen komuniti ia.”
Hao nao ol infomesen blong Sensas i save helpem olgeta insaed long ol maltikaljural komuniti?
Sensas ia i save afektem yumi evriwan.
Ol infomesen we yu save kivim i save helpem ol komuniti krup, bisnis mo kavman blong mekem ol gudfala jyois long saed blong ol kaen sevis mo sapot we bae i save ko long komuniti blong yu.
Aleem Ali i talem se ol infomesen blong Sensas i save ko long wan map we bae hemi save soem se hua yumi olsem wan kantri.
“Olsem se, long taem we infomesen ia i save soem se plante pipol i stap long wan ples mo oli nokat gudfala Inglis, ol samting ia i save ko long sapotem lanwis long ol lokol helt senta mo ospitol. Hemia tu bae i save helpem mifala blong faenem ol komuniti we i no isi blong luk insaed long ol nomol samting blong toktok wetem ol krup mo blong kivim mani blong olgeta.”
Long taem we yu save luk ful samting blong hemia, yumi kat fulap kaen diveseti insaed long ol maltikaljural komuniti insaed long Ostrelia we hemi importan tumas blong save.
“Olsem se, olgeta we i bin stap longtaem finis, maet bae oli nidim moa samting long saed blong sapotem ol olfala, mo olgeta we oli bin stap sot taem nomo maet bae oli nidim sam samting blong helpem olgeta long saed blong lanwis o sam samting blong helpem olgeta insaed long haos o skul,” Mr Doukas i talem.
Yumi kat samfala sapot i stap?
Naoia sensas i stap kam, mo ABS bae i save wok wetem olgeta ol oanaisesen, bisnis mo komuniti krup raon long Ostrelia blong mekem sua se yumi evriwan i save fulumap Sensas ia long eni samples. Ol kaen sapot ia i stap insaed long ol siti, taon mo rimot o rijonal ples, mo blong olgeta we i stap aotsaed long wan haos, olsem long hotel, ospitol, kamp mo karavan.
Mr Ali i talem se bae ABS i save sendem i kam ol samting long pepa, odio mo vidio long fulap lanwis.
“Yu save luk wan ofisol sensas hab blong askem long samfala blong helpem yu long hem mo tu i kat wan sapot long fon long sensas kontak senta. Mo sapos yu nidim wanfala blong transletem ol infomesen ia, yu save yusum TIS Nasonel sevis.”
Ale, rimemberem se naet blong sensas hemi namba 11 blong Ogis. Sapos yu stap long Ostrelia long naet ia, mekem sua se yu stap long kaon.
Hemi tekem smol taem nomo blong fulumap, be ol infomesen we i stap insaed long hem i save helpem blong bildim ol sevis mo sapot long komuniti blong yu blong plante yia long fiuja.
Blong faenemaot moa samting blong Sensas ia, ko long Sensas websaet. Blong ol infomesen o sapot long lanwis, ko long Lanwis sapot pej.
Ol samting ia i bin kamaot long wan patnasip wetem Ostrelia Buro blong Statistik..
