SBS Examines: COP31 - Ol wok blong Pasifik long saed blong klaimet

Long evri yia, ol kantri we oli stap insaed long Yunaeted Nesen Fremwok Konvensen long Klaimet Jenj kam tugeta blong toktok long Konferens blong Pati, o nara nem blong hem hemi COP, blong toktok long saed blong wok blong wol blong faetem klaimet jenj.

Ol wok ia i bin mekem sam bigfala intanasonel akrimen, olsem Paris Akrimen long COP21 long 2015, long hemia ol kantri blong hem i bin akri long kipim tempreja i stap andanit long wan mak we i 2 dikri antap long mak we i bin stap bifo long 1850s, mo long sem taem oli traem wok blong kipim long wan mak we i 1.5 dikri andanit long mak ia.

Long Novemba long yia ia, bae ol kantri blong wol oli ko long Tekiye blong COP31, Ostrelia i stap olsem presiden blong toktok andanit long wan patnasip ia, COP31 Tekiye-Ostrelia patnasip.

Blong ol kantri long Pasifik ia, ol toktok hemi blong plante nara kaen samting tu bitim ol intanasonel akrimen ia. Klaimet jenj i stap afektem ol komuniti insaed long rijon ia finis wetem haet blong solwota i stap kam antap ia i save tretenem ol hom mo nara kaen bildin mo tu hemi save afektem ol kakae mo freswota.

Trifala Pasifik Klaimet reprisentetiv oli bin kasem wan wok blong tekem ol importan samting blong rijon i ko long COP31, fokas long kipim 1.5 dikri gol i stap olsem wan samting we i save kam, leftemap ability blong yusum mani blong klaimet mo blong putum solwota long midel blong wol stej blong helpem klaimet ia.

Long yia ia long COP31, Pasifik reprisentetiv blong Osiania, Kristina Stege blong Mashal Aelan, bae hemi lidim ol samting blong rijon ia long saed blong folem rod blong kipim tempreja i stap daon.

"Yumi kat wan janis nomo blong kasem gol ia, hemia long finisim fasin we yumi bonem ol jakol, masut mo bensin we hemi stap kosem mes ia."

Taget ia blong 1.5 dikri i stap luk wan denja, fromse fulap kantri oli talem se hemi hatwok tumas blong kasem hemia.

Be Mis Stege i talem se hemia i kiaman toktok nomo.

"Feswan, ol saens i save talem long yumi se yumi save folem rod ia. Yumi kat ol teknoloji, yumi kat ol risos i stap. Wanem yumi nokat ia hemi oli long politik we oli wantem mekem."

Blong Mis Stege, sapos yumi save bitim 1.5 dikri, hemi no minim se yumi sud sakemaot taget ia.

"Mo tu yumi sud rimemberem se evri smol smol pat blong wan dikri i save helpem. Ale, sapos yumi bitim wan mo haf dikri ia, hemi no minim se yumi mas sakemaot ol samting ia, fromse yumi save long saens se tempreja ia i save ko daon bakagen."

Be fasin blong mekem sua se tempreja i save stap andanit long 1.5 dikri mak ia hemi wan samting nomo we oli blong Pasifik bae oli fokas long hem long COP31.

Papa Niu Kini hemi hom blong Ruel Yamuna, Pasifik reprisentitiv long COP31 blong karem ol mani blong klaimet.

"Stret wok blong mi hemi blong mekem sua se ol mani blong klaimet i save wok stret insaed long Pasifik."

Mista Yamuna i talem se hemi importan tumas blong folem rod we i stap finis, no blong mekem ol niufala promes.

"Wan narafala jalenj hemi blong mekem sua se fasin blong adap long hem hemi save luk sem samting olsem fasin blong jenjem hem. Blong Pasifik ia, yumi mas adap nomo. Hemi no wan jyois."

Mista Yamuna i wantem luk sapot blong ol samting we i kamaot long Pasifik bae i kam moa stron.

"Fasin ia blong wok tugeta hemi long hat blong COP31 patnasip wetem Pasifik mo hemi stret wok blong ol Pasifik reprisentitiv"

Nambatri Pasifik reprisentetiv bae hemi fokas long wan samting we hemi importan tumas long saed blong kipim rijon ia i stap laef yet: solwota.

Pasifik reprisentetiv blong solwota ia hemi honorabol Inia B Seruiratu blong Fiji. Hemi talem se relesensip bitwin long Pasifik mo solwota i save kivim rijon ia wan yunik samting long saed blong tokabaot ol samting blong helt blong solwota blong wol.

"Yumi long Pasifik yumi ol lida blong solwota raon long wol fromse hemi stori blong yumi. Long saed blong fikisim ol samting ia blong klaimet, yumi mas lukaotem solwota o hemi no save kam wan sakses."

Solwota mo ol laef we stap insaed long hem oli olsem wan samting blong kipim klaimet i stap long wan stret rod, be ol solwota raon long wol naoia oli stap taet.

Blong ol kantri long Pasifik, ol samting blong klaimet jenj i stap afektem ol komuniti long kos blong olgeta finis.

"Fasin we haet blong solwota i kam antap i stap putum ol komuniti, fres wota, mo kakae blong yumi long wan ples we oli nomo sef. Long fiuja ia i mekem se sam samples bae i kam wan ples we yumi nomo save stap. Long Fiji mifala i stap mufmufum ol komuniti we stap antap long ol sanbij ia, mo hemia yumi mas pem."

Ol samting ia i save mekem ol kwestin long saed blong ol pipol we oli mas mufmuf.

Falepili Yunion triti i alaoem samfala blong Tuvalu, we klaimet jenj i kam antap tumas, wan janis blong kasem wan niufala laef long Ostrelia, be Mista Seruiratu i talem se wan bigfala samting bitim ol nara wan hemi wanem klaimet jenj i save minim long fiuja blong ol Pasifik aelan kantri ia.

"Ol samting ia long saed blong mufmufum oli i ko insaed long kantri blong olgeta mo tu long ol nara kantri hemi impotan tumas. Hemi mekem se ol laef mo ol samting blong laef i nomo sef, inkludem fasin blong ol smolsmol aelan kantri insaed long Pasifik blong stap olsem ol independen kantri oltaem."

Pasifik i save holem samfala ol mitin bifo long taem blong COP31 long Antalya long Tekiye, oli mitin ia i stap long Fiji mo Tuvalu.

Trifala reprisentetiv bae oli yusum janis ia blong mekem moa stron ol aksen long klaimet, mekem moa isi blong yusum mani mo blong leftemap save blong olgeta long saed blong wok blong Pasifik blong kipim sef solwota ia.

Blong Pasifik ia, COP31 hemi no wan intanasonel mitin nomo. Rijon i stap eksperiensem ol samting blong klaimet jenj finis. Ol reprisentetiv ia oli wantem luk ol wok blong wol i stap soem hemia.