CARE Vanuatu - Lindah Peter i telem stori blong bildim stron Vanuatu

Tufala saeklon ia, Judy mo Kevin, i bin kam long Tafea provins long 2023. CARE Vanuatu i bin wok wetem ol komuniti long Tafea blong bildim bakagen ol haos long wan sef fasin tugeta wetem olgeta we i stap. From risal blong wok ia, wan Bronze Award i bin kam long CARE from Wol Habitat. Lindah Peter i bin wok long projek ia mo hemi bin serem ol eksperiens blong hem wetem mifala.

Naiu Glarisse i stap long fored blong wan haos long Sulphur Bay, Tanna, we saeklon Judy mo Kevin i bin spolem long Maj blong 2023. Credit: Nikiatu Kuautonga/Nikiatu Kuautonga

"Lo Vanuatu i olsem yumi save...bigfala jalenj lo saed blo natural disasta. Klaimet jenj i jalenjem...laef blo yumi."

Yumi evriwan i save gud stret fasin blong laef long Vanuatu. Plante saeklon i bin kam, mo moa bae i save kam long fiuja tu.

Be Lindah Peter mo ol nara woka long CARE Vanuatu i bin wok wetem olgeta we i save fesem disasta ia blong mekem se long fiuja ia bae olgeta i kat bes janis blong stanap stron bakagen.

"Bronze Award hemi wan bigfala rekognisen...i no [jas] blo CARE Vanuatu be blo olgeta komuniti lo Vanuatu we CARE i wok wetem."

"Award ia...hemi blo rekoknisen lo wan saeklon rikavori projek, lo TC Judy mo Kevin."

Tanna aelan i wan ples we tufala saeklon ia i bin brekem fulap haos mo nara kaen bilding. Ol wok ia we CARE i bin helpem blong mekem i bin stap long sam vilij olsem Lenaken mo Leulik.

Olgeta i stap sidaon mo jat long Leulik long Tanna. Credit: Nikiatu Kuautonga/Nikiatu Kuautonga

"Hemi importan blo ol patna blong CARE blo kontiniu sapotem ol lokol solusen we komuniti i nidim. Spesali lo Tanna o nara Tafea aelan...oli rekognaisem...tradisonel [save] blo Vanuatu."

Kantri nasonal ofis blong CARE i stap long Port Vila, oli kat wan fil ofis long Tanna, mo tu bae oli kam long Penama mo nara provins long fiuja.

Wok blong CARE i bin kam olsem wan pat blong wan tim nomo.

"Blo saed blo bildim ol sef tradisonel haos lo Tanna [mifala] sapotem ol provins patna mo kavman."

Save blong wok ia i bin kasem plante fala raon long wol tu.

"Mifala i putum Vanuatu mo Pasifik lo map lo wol olsem wan kantri we i kat stron komuniti sistem...blo bildim resiliens mo redi lo disasta."

Rachelle Danielle, wan woman we i kat 28 yia, blong Leulik long Tanna i stap yusum lif blong pamtri blong mekem wan ruf blong haos blong hem we tufala saeklon i bin spolem long 2023. Credit: Nikiatu Kuautonga/Nikiatu Kuautonga

Hemi gud tumas blong kasem sam rekoknisen blong hadwok ia, be sam jalenj i bin afektem wok ia mo tu ol wok blong CARE long saed blong hemia.

"i kat plante jalenj we i stap lo komuniti blo yumi, lo saed blo aksesibiliti.

"Ol rabis weta we yumi stap eksperiensem, sam samtaem i sloem daon wok blo projek. Ol komuniti i stap rimot, oli stap longwe, hemi had blo yumi kasem, i tekem plante taem."

Mo wanem sam importan samting we CARE i wantem letem yumi save long saed blong wok blong olgeta mo wanem ol samting we i save kam long fiuja ia?

"Save mo lidasip blo olgeta lokol komuniti blo yumi, spesali ol woman mo gel we oli stap lo fored, blo bildim sef, tradisonel haos.

"Build Back Safer tu i konsiderem lukluk tu long sanitesen fasiliti, we yumi mekem sua se disaen blem hemi aksesibol blo yumi evriwan.

"CARE Vanuatu bae i ko hed blo wok wetem ol patna lo ol narafala komuniti...blo promotem rol blo ol woman mo gel mo pipol wetem disabiliti mo ol yangfala...tru lo Build Back Safer fasin, hemi blo helpem komunti...lo taem we disasta i afektem yumi...yumi no wet blo kavman mo nara patna blo sapotem yumi."

Lavu Iapeh, wan man we i kat 60 yia, i stap sakemaot ol toti we i stap insaed long karen blong hem long Lenaken long Tanna. Credit: Nikiatu Kuautonga/Nikiatu Kuautonga

Folem SBS Bislama long Facebook