Nom tswv teb chaws Austarlia kuj tau qhia tias nws tseem npaj yuav tos Australia cov pej xeem li 600 tus uas tau teev npe nrog Department of Foreign Affairs and Trade tias yuav coj tej neeg no los tswj thiab txheeb xyuas ntawm lub yeej thoj nam Christmas Island li 14 hnub. Tam sim no muaj neeg Australia kis tau cov mob no txog li 7 tus lawm thiab tseem muaj 4 tug raug nomtswv ceev tseg tshuaj ntsuam seb puas tau tus mob no ntawm Queensland. Kuj tau muaj 2 tug neeg Australia tau tus mob no thiab raug coj mus kho thiab raug muab tso tawm tsev kho mob los lawm.
Muaj tej neeg mob li no ntawm cov teb chaws uas paub meej tias kis tau tus mob Novel Coronavirus (2019nCOV) li hauv qab no lawm raws li Al-jazeera news tau qhia:
- Canada 3
- The US 6
- Finland 1
- France 5
- Germany 4
- The United Arab Emirates 4
- India 1
- Nepal 1
- Sri Lanka 1
- China 7,711
- South Korea 6
- Taiwan 8
- Japan 11
- Vietnam 4
- Thailand 14
- Cambodia 1
- Malaysia 8
- Singapore 10
- Phillippines 1
- Australia 9
Teb chaws America thiab Japan los kuj tau xa dav hlau mus tos lawv cov pej xeem txog li 200 tawm leej rov qab lawm. Fabkis tseem yuav tos nws cov pej xeem li 250 leej thiab 100 tus neeg European rov qab mus rau Europe rau lub limtiam no.
Jack Ma lub koom haum Jack Ma Foundation los kuj tau cog lus tias yuav pab nyiaj tshaj AUD 21 million dollar los daws cov teeb meem kab mob coronavirus no thiab. Suav tus coj Xi Jinping los kuj tau cog lus tias yuav los kho thiab daws kom tau cov kab mob coronavirus no. Ntxiv ntawd los nom tswv Suav kuj tau muab cov tshuaj kho cov kab mob HIV coj los sim kho cov kab mob coronavirus no seb hos kho puas tau thiab.
Nom tswv yuav xub txheeb xyuas tej laus thiab me nyuam yaus ua ntej tab sis yuav xub coj tej neeg tau txais kev noj qab nyob zoo thiab tsis muaj tus yam ntxwv mob los rau teb chaws Australia ua ntej. Tab sis nom tswv qhia tias tej zaum tej neeg Australia no yuav tau pab them cov nqe dav hlau thiab qee cov nqe kho mob.
Thiaj tau ua rau Dr. Tony Bartone uas yog tus coj lub koom haum Australia Medical Association hais tias tsis tsim nyog coj Australia tej neeg no mus rau ntawm lub pov txwv Christmas Island no li. Nyob rau tib lub tsam thawj no los kuj tau muaj Suav ib txhia tshiab peb caug Lunar New Year ncua tsis ua lawm thiab.
Tau muaj neeg tas sim neej thoob teb chaws Suav los ntawm cov kab mob Coronavirus txog li 170 tus neeg lawm, tsoom hwv Suav tau qhia rau hnub zej Teeb (Thursday) tim 30.01.2020 tias tau rov qab muaj neeg kis cov mob no txog li 7,700 tus neeg lawm. Thiab raws li nom tswv Suav tau qhia dhau los twb yeej tau muaj neeg Suav txog li 6,000 tus tau kis cov mob no dhau los lawm.
Yog li 37 tus neeg ntawm 38 tus uas tau tas sim neej ntawd yog co neeg nyob ntawm Suav lub xeev Hubei, uas yog thaj chaw uas kis cov mob no thiab tab tom ua rau ntiaj teb ntshai tej mob no heev tam sim no. Ntxiv ntawd ces kuj muaj ib tug tas sim neej ntawm lub xeev Sichuan raws li Suav lub koom haum tswj kev noj qab haus huv tau cej luam qhia.
Ces tej xwm txheej ploj qaug no thiaj yog ib cov kev phoj sij loj tshaj plaws tau tshwmsim rau tib hnub rau lub caij nomt swv tseem sam sim nrhiav tswv yim los tswj tej mob no thiab tau txwv tsis pub tej neeg ntau caum roob tus tawm ntawm lub xeev Hubei mus rau lwm thaj chaw. Yog li ntawd thiaj ua rau muaj tej neeg ntawm xeev Hubei kis tau tus mob no txog 1,032 tug lawm.
Several major airlines have suspended flights to and from China. Source: AAP
Ntiaj teb lub koom haum tswj kev noj qab haus huv (World Health Organisation) tau ceeb toom rau tej tsoom hwv tag nrho kom yuav tsum nqes tes los daws cov kab mob virus muaj ntsis zoo li cov kab mob SARS no.
Tau muaj ntau pua tus neeg txawv teb chaws los kuj raug muab tshem tawm ntawm lub nroog Wuhan uas yog thaj chaw kis cov kab mob coronavirus no hnub zwj Feej (Wednesday) tim 29.01.2020 dhau los lawm, hos neeg Australia ces tseem khuam daig ntawm lub nroog no thiab tej nroog ib puag ncig los yeej txhawj xeeb kawg rau lub caij uas lawv tseem tos seb nom tswv puas yuav muab lawv tshem rau lwm thaj chaw li cas.
yog li ntawd tus mob no twb tau kis rau tej teeb chaws ntau dua 12 lub lawm (US, France, Nepal, Australia, Singapore, Thailand, Vietnam, Macao, Hong Kong, South Korea, Japan) thiab kuj tau muaj xov xwm qhia ntxiv tias cov teb chaws li Finland, United Arab Emirates nrog rau Tibet los kuj tau muaj thawj tug neeg kis tau tus mob coronavirus no lawm thiab.
Thiab paub meej tseeb lawm tias tau muaj 7 tus neeg kis tau tus mob no ntawm teb chaws Australia lawm. Raws li New South Wales tus kis tswj kev noj qab tau qhia ces NSW yeej muaj 4 tug neeg mob lawm 7 tus tseem sam sim txheeb xyuas thiab tau sim 50 leej lawm tab sis tsis tau tus mob no.
Yog li WHO thiaj tau hais kom yuav tsum teeb tso ib lub rooj sab laj los sib tham txog cov kab mob no rau hnub Thursday 30.01.2020 no kom sai seb puas tsim nyog declare cov mob coronavirus no tias yog ib cov global health emergency-kom thiaj muaj kev sib koom tes thiab sib pab los ntawm pej kum haiv.
Tedros Adhanom Ghebreyesus uas yog WHO tus coj tau qhia hauv nws phau Twitter account tias nws lub koom haum no 'tu siab heev' rau cov kev ceeb toom txog cov kab mob sib kis no hauv ntiaj teb tias yog kis me ntsis xwb tsis yog kis tau loj.
Muab cov fij dav hlau ncua
Tej tuam txhab dav hlau hauv ntiaj teb no twb tau ncua los yog txiav txo tsis muaj cov fij dav hlau ya mus rau los yog tawm ntawm teb chaw Suav tuam tshoj lawm tom qab tau muaj cov mob no kis ntawm tib neeg tau rau tib neeg txawv teb chaws lawm.
British Airways los kuj tau qhia tias nws tau ncua tag nrho txhua fij dav hlau ya mus rau thiab tawm ntawm teb chaws Suav tuam tshoj lawm. Thaum mus xyuas ntawm nws lub vas sab ces yeej tsis muaj cov fij dav hlau rau tej neeg yuav mus rau Suav teb rau lub 1 hlis ntuj thiab lub 2 hlis ntuj no li lawm, tab sis hauv lub tuam txhab no tsab email kuj tau qhia tias nws tsuas ncua cov fij dav hlau no mus txog rau hnub tim 31 January 2020 no xwb thiab mam saib seb tej xwm txheej zoo ua li cas txuas ntxiv.
American Airlines los kuj tau qhia rau hnub zwj Feej (Wednesday) dhau los tias nws tau ncua fij dav hlau ntawm Los Angeles mus rau Beijing thiab Shanghai tab sis tseem muaj cov fij dav hlau ya ntawm Dallas ya mus rau Suav teb. Delta Air Lines kuj tau qhia tias nws tau txo America cov fij dav hlau uas ya tawm mus rau Suav thiab los rau America txog ib nrab los ua 21 fij rau ib limtiam twg lawm xwb.
Nom tswv Meskas tau qhia tias tsev dawb tsis pom zoo kom ncua txhua fij dav hlau mus rau Suav tam sim no tab sis tej zaum kuj yuav hloov siab dua tshiab los kuj tau.
People wearing medical masks wait for arriving passengers at John F. Kennedy international airport in New York. Source: AAP
Air Canada tau qhia rau hnub zwj Feej (Wednesday) dhau los tias nws tau tso tseg tsis ya txhua fij dav hlau mus rau Beijing thiab Shanghai txij hnub tim 30 Jan mus txog ntua rau tim 29 Feb 2020 lawm.
Hos Qantas tej fij dav hlau tseem ya mus rau Suav teb raws li tau npaj tseg rau lub caij nws tseem sab laj nrog tsoom hwv Australia seb puas yuav tshem Australia tej neeg khuam daig ntawm Suav lub xeev Hubei ntawd tawm.
Germany lub tuam txhab dav hlau Lufthansa thiab nws cov tuam txhab dav hlau me Austrian Airlines thiab Swiss airlines los kuj tau ncua lawv cov fij dav hlau tsis mus rau Suav tuam tshoj mus txog ntua rau hnub tim 09 Frebruary 2020 lawm hos Air France los kuj tau qhia tias nws yuav txo cov fij dav hlau ya mus rau Beijing thiab Shanghai kom tsawg rau limtiam no thiab.
Air India thiab South Korean cov fij dav hlau pheej yig li Seoul Air los kuj tau ncua tag nrho txhua fij dav hlau tsis ya mus rau teb chaws Suav lawm, Indonesia cov dav hlau Lion Air los yeej npaj yuav ua tib yam li ntawd thiab.
Ntxiv ntawd los Finnair, uas yog Cathy Pacific fights ntawm Hong Kongthiab Singapore cov Jetstar Asia los yeej tab tom txo lawv cov fij dav hlau tsawg tsis ya mus rau teb chaws Suav lawm.
Iberia, uas yog ib feem ntawm IAG group nrog rau BA los kuj tau qhia tias nws tau muab tej fij dav hlau mus rau Shanghai ncua tag nrog ib ntus lawm thiab.
Yog li ntawd cov kev txhawj xeeb txog tej mob no thiaj tau ua rau muaj teeb meem rau tej neeg cov kev ncig mus los vim lawv muaj kev txhawj xeeb heev tias tsam tej kab mob sib kis no thiab tau ua rau muaj kev txhawj xeeb tias tsam yuav muaj teeb meem tau rau tej lagluam.
Yog li ces tej zaum tej tsev tos qhua, tuam txhab dav hlau, tsev twv txiaj thiab tej nkoj thauj neeg ncig ua si ntawm tej teb chaws nyob ze Suav tuam tshoj yuav yog cov raug teeb meem tam sim no.
Yog koj xav paub xov xwm kom ntxaws txog qhov tseeb cuam tshuam txog cov kab mob coronavirus (2019nCOV) ces mus txheeb xyuas tau raws li hauv qab no:
Thiab yog koj xav nyeem xov xwm, saib yeeb yaj duab (video) los yog tej xov xwm cuam tshuam txog cov kab mob Novel Coronavirus ua lus Askiv, lus Suav ces mus txheeb xyuas los yog faib lub vas sab hauv qab no rau koj tej phooj ywg, koj tsev neeg thiab koom haum zejzog, tej chaw nthuav xov xwm thiab koj tej neeg txheeb ze tau.
Los yog tias koj txhawj xeeb txog koj tus kheej, koj tsev neeg, koj ib tug phooj ywg txoj kev noj qab nyob zoo ntawm xeev NSW ces kom koj sib txuas lus nrog
- The Healthdirect helpline tus xov tooj 1800 022 222 thov kev taw qhia lwm yam ntxiv.
- Yog koj tsis paub ntawv Askiv thiab xav tau neeg txhais lus ces hau rau TIS National tus xov tooj 131 450 thiab kom lawv txuas xov tooj kom koj nrog Healthdirect tham tau.
- Xav kom koj mus ntsib kws kho mob thiab siv Hospital Emergency Department yog tias koj tsis xis nyob tom thiab tom qab tau mus ncig rau thaj chaw muaj tej mob no los yog ho tau kov tua ua tuav los yog tau nrog ib tug neeg mob tau cov mob no ua ke rau 14 hnub dhau los. Thiaj yog tej yam tseem ceeb heev koj yuav tau hu xov tooj thov kev pab cuam kom lawv ho npaj ua ntej lawv pab koj thiab thiaj pov puag tau koj los yog lwm tus.
