Ntsiab lus:
- ACCC yuav hais kom Australia tej tuam txhab muag roj tseem ceeb tshab txhais txog tej nqe roj tsheb uas kim sai heev tuaj.
- Tau muaj tej xwm txheej no tshwm sim tom qab uas pab nom Labor (Tsoom fwv Albanese) tau hais kom lub koom haum no soj tej nqe roj tsheb rau lub caij muaj tsov rog.
Australia lub koom haum uas tswj tej lagluam cov kev sib tw lagluam thiab pov puag tej neeg yuav khoom siv (Australian Competition and Consumer Commission - ACCC) yuav hais kom tej tuam txhab muag roj tseem ceeb tshab txhais tias vim li cas tej nqe roj thiaj kim sai ua luaj li lawm.
Muaj ib co tuam txhab muag roj li Ampol, BP, Chevron, Exxon Mobil thiab 7-Eleven yog cov uas raug lub koom haum ACCC hu mus koom ib lub rooj sab laj ceev nrooj.
Iran tau muab suam hiav txwv Strait of Hormuz uas yog ntiaj teb qhov chaw thauj roj tseem ceeb tshaj plaws kaw coj los tawm tsam nrog Meskas thiab Israel cov kev ua rog nrog nws lub teb chaws.
Tej xwm txheej no thiaj ua rau tej nqe roj kim tuaj thiab ua rau tej roj tsis muaj txhuas xyaw (unlead petrol/gasoline) ntawm Australia tej nroog loj feem coob tam sim no thiaj muag ib litre twg kim tshaj $2.20 thiab cov roj diesel ces nce ib litre twg kim tshaj $2.60.
Treasurer Jim Chalmers tau hais tias cov kev nce tej nqe roj tom qab muaj tsov rog ntawm Middle East tau ras los ua ib co xwm txheej txaus txhawj xeeb heev rau ACCC.
Nws tau hais tias "ACCC tab tom hais kom tej tuam txhab muag roj tshab txhais tias yog vim li cas?"
"Kuv yeej tau qhia meej tseeb lawm tias yog lawv nrhiav tau pov thawj tias tej tuam txhab muag roj ua tsis ncaj, ces peb cia siab tias ACCC yuav rau txim rau lawv."
Labor yeej tau xub hais ua ntej kom lub koom haum no txheeb thiab soj tej nqe roj tom qab uas tau muaj tsov rog tshwm sim ''kom tej neeg tsav tsheb thiaj tsis raug tej tuam txhab muag roj dag kom tau txais txiaj ntsim''.
Energy Minister Chris Bowen tau hais tias yuav tswj tej cai tswj tej roj zoo muaj faj xyaw tsawg kom ntaug me ntsis rau lub cij ob hlis kom thiaj tau roj ntau zog rau tej neeg siv coj los daws tej xwm txheej tsis muaj roj txaus rau tej neeg siv ntawm tej chaw muag roj.
Cov kev ua li no yuav pab kom tau roj ntau ntxiv txog li 100 million litres siv rau ib lub hli twg, los sis sib npaug li tej roj muaj txuas siv ob hnub.
Tej koom haum sawv cev rau tej neeg siv tsheb thiab tsoom fwv teb chaws Australia yeej tau nqua hu kom tej neeg Australia tsis txhob mus sib tw yuav roj tsheb siv thiab tsis txhob mus yuav ntau ntau cia kom thiaj muaj roj txaus rau tej zejzog siv rau lub caij uas tseem yuav xa roj los txog rau lub teb chaws no siv.
Barnaby Joyce uas yog ib tug nom ntawm pab nom One Nation tau hais tias kom yuav tsum txuag ib co roj cia rau tej neeg ua liaj ua teb thiab tej neeg nyob rau tej zos cheeb tsam tuaj ntug nroog los sis tej zos toj siab tau siv li yuav tsum faib tias tseg npaum li cas rau tej nroog siv rau lub caij tseem ua rog txuas ntxiv no.
Thiab tej tuam txhab xa roj los kuj txhawb nqa lub tswv yim no.
Tab sis lub koom haum National Road and Motors Association (NRMA) tsis pom zoo nrog lub tswv yim no thiab hais tias yog tseem faib li no thiab ces yuav ua rau muaj teeb meem rau tej lagluam thiab zej zog.
Angus Taylor uas yog tus coj ntawm lwm pab nom teb chaws tau hais tias tsoom fwv yuav tsum tau lees paub tias tseem muaj teeb meem rau cov kev nrhiav tsis tau roj txaus siv.
Nws tau qhia rau lub chaw nthuav xov xwm tshooj 9 tias cov program xov xwm Tiday hnub zwj Quag (Tuesday) tias "Qhov yuav tau ua ces yog yuav tsum xa roj rau tej chaw muag kom sai npaum li sai tau,"
''Peb yeej muaj ib co chaw lim roj xa muag tawm txawv teb chaws ... thiaj xav kom coj tej roj no los rau neeg Australia siv."
Katy Gallagher uas yog tus nom tswj lub tuam chav lis laj fai nyiaj txiaj tau hais tias tsoom fwv yog tus yuav lis tej luag hauj lwm los daws tej xwm txheej ti tes ti taw no thiab yeej npaj txhiaj yuav los daws tej teeb meem no vim yog tim muaj tsov rog.
Nws tau qhia rau ABC cov program xov xwm News Breakfast tias "Peb yeej siv txhua txoj sub ke peb muaj peev siv siv lawm, thiab yeej yuav lis tej no txuas ntxiv rau lub caij tseem muaj cov kev tsis sib haum xeeb no txuas ntxiv."
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
