Raws li tej xov xwm tau los ntawm lub koom haum Australian Bureau of Statistic (ABS) qhia ces tej neeg ua hauj lwm khawb peev txheej (mining industry) yog cov neeg khwv tau nyiaj theem nrab ntau tshaj plaws piv rau tej ua hauj lwm vaj tse thiab zaub mov ces khwv tau nyiaj tsawg tshaj plaws.
ABS tej xov xwm tshiab uas teev txog tej neeg ntiag tug tej nyiaj uas khwv tau uas tau coj los qhia rau hnub zwj Kuab pom tias tej nyiaj hauj lwm xam raws cov khwv tau theem nrab ntawm ib xyoos twg ces pom tias tej neeg ua hauj lwm khawb peev txheej khwv tau nyiaj txog $149,362, txuas ntxiv ntawd ces yog cov neeg ua hauj lwm cuam tshuam txog hluav taws xob, gas, dej thiab tu tej khoom seem txheej (Waste services) uas khwv tau ib xyoos twg tau txog $105,158.
Hos tej neeg ua hauj lwm cuam tshuam txog vaj tse thiab zaub mov ces yog cov khwv tau nyiaj hauj lwm tsawg tshaj plaws yog xam raws tus zauv theem nrab ces tsuas khwv tau txog li $22,270 ib xyoos twg xwb tab sis tej neeg ua cov hauj lwm arts thiab recreation services ces tsuas khwv tau txog li $37,057 ib xyoos twg xwb.
Neeg Australia khwv tau nyiaj qhov twg los?
Raws li tej xov xwm teev txog cov nyiaj xyoo 2022-23 uas tau qhia txog tej neeg ntiag tug tej nyiaj khwv tau thoob teb chaws no ua ntej yuav them se ces khwv tau txog li $1.3 trillion.
Thiab txawm tias cov kev ua hauj lwm rau ib lub tuam txhab twg yog tej xub ke khwv nyiaj tseem ceeb rau tej neeg Australia feem coob, los yeej muaj neeg coob tuaj ntxiv khwv tau nyiaj los ntawm cov kev nqes peev lagluam thiab. Uas twg muaj Australia tej pej xeem yuav laug txog li ntawm 12 feem pua yog cov khwv tau nyiaj los ntawm cov kev nqes peev lagluam.
Txawm li cas los tsuas muaj tej neeg tsawg tsawg thiaj khwv tau nyiaj los ntawm lawv cov kev ua tswv lagluam xwb — thiab twb tau muaj tej neeg no tsawg zog nqe ntawm 6.7 feem pua mus ua 6.5 feem pua lawm.
Australia tej xeev twg khwv tau nyiaj hauj lwm theem nrab ntau tshaj plaws?
Tej neeg ua hauj lwm ntawm xeev Australian Capital Territory (ACT) yog cov neeg khwv tau nyiaj theem nrab ntau tshaj plaws txog li $75,643, ntxiv ntawd ces yog xeev Northern Territory (NT) uas khwv tau $66,831 thiab xeev Western Australia (WA) uas khwv tau $62,207 ib xyoos twg. Hos Tasmania ces yog lub khwv tau tsawg tshaj plaws txog $53,479 xwb. Tab sis yog xam raws tus zauv theem nrab ntawm tej nyiaj uas tej neeg ntiag tug khwv tau ntawm teb chaw no ces tsuas khwv tau txog li $58,216 xwb.
Daim phiaj no qhia tias hom lagluam twg khwv tau nyiaj hauj lwm theem nrab ntau tshaj plaws raws li cov nyiaj xyoo 2022-23 qhia. Source: SBS
Txuas ntxiv ntawd ces yog lub zos Walgett nyob sab qaum teb xeev New South Wales (NSW) uas muaj tej neeg 10 feem pua uas yog cov khwv tau nyiaj ntau tshaj plaws yog cov khwv tau nyiaj ntau ua zum ob txog 45 feem pua, thiab lub zos Flinders ntawm qaum teb hnub poob xeev Queensland ces yeej tej neeg 10 feem pua uas khwv tau nyiaj ntau tshaj plaws yeej khwv tau nyiaj txog li 37 feem pua ntau dua lwm tus uas tau txog $56,165 ib xyoos twg piv rau lub zos Walgett ces tsuas khwv tau nyiaj theem nrab ib xyoos twg txog $43,197 rau cov nyiaj xyoo 2022-23 xwb.
Leej twg khwv tau nyiaj ntau tshaj plaws?
Tej neeg Australia uas muaj hnoob nyoog theem nrab (45-54 xyoos) yog cov khwv tau nyiaj theem nrab ntau tshaj plaws txog $80,926, txuas ntxiv ntawd ces yog cov neeg hnoob nyoog 35-44 xyoos uas khwv tau $77,912 ib xyoos twg. Hos Australia tej hluas hnoob nyoog 24 xyoos los yog qes tshaj ntawd ces yog cov khwv tau nyiaj tsawg tshaj plaws txog li $23,840 xwb. Thiab yog xam ntawm txhua pawg neeg hnoob nyoog sib txawv lawm ces tej txiv neej yeej yog cov khwv tau nyiaj hauj lwm ntau dua tej poj niam. Yog tham txog tej neeg hnoob nyoog 35-44 xyoos lawm ces tej txiv neej yeej khwv tau nyiaj theem nrab txog $92,266 ib xyoos twg piv rau tej uas tej poj niam khwv tau txog $64,602 ib xyoos twg. Hos cov neeg hnoob nyoog 45-54 xyoos los txiv neej yeej khwv tau $95,400 piv rau poj niam ces tsuas khwv tau $68,570 xwb.
Tej neeg tsiv teb tsaws chaw uas tuaj ua hauj lwm ntawm Australia no khwv tau nyiaj hauj lwm tshaj $300 billion
Australia tej neeg tsiv teb tsaws chaw 4.4 million tus tsis hais yog cov tuaj nyob ib ntus los yog nyob ruaj yeej khwv tau tej nyiaj hauj lwm txog $324.7 billion. Muaj yuav laug txog ib nrab ntawm tej nyiaj no ($153.4 billion) ces yog cov neeg tsiv teb tsaws chaw 1.6 million tus uas paub ua hauj lwm thiab muaj txuj ci siab yog cov khwv tau. Hos tej neeg ua hauj lwm uas tau cov humanitarian visas yog cov khwv tau nyiaj hauj lwm $8.6 billion.
Share
