Tej tswv lagluam uas pheej tsis them nyiaj hauj lwm, allowances, leave, thiab nyiaj super rau tej neeg ua hauj lwm yuav raug nplua txog li ntawm 200,000 dollars yog lawv yog cov neeg ntiag tug thiab yuav raug nplua ze txog 1 million dollar yog lawv yog tej tswv lagluam thiab tseem uav raug kaw tsev laj cuj li 10 xyoo thiab.
Txij hnub tim 1 lub 7 hli ntuj xyoo 2021 no mus tsoom fwv xeev Victoria tsim tau tsab cai wage theft act uas yuav rau txim rau tej neeg ntiag tug thiab tej tswv lagluam uas pheej tsis them nyiaj ua hauj lwm txwm los yog them nyiaj hauj lwm tsawg rau tej neeg ua hauj lwm lawm.
Tsab cai no yuav ua rau lub koom haum Wages Inspectorate Victoria thiab Fair Work Ombudsman muaj cai mus tshuaj ntsuam, txheeb ntaub ntawv, txeeb tej ntaub ntawv thiab coj tej neeg ntiag tug los yog tej tswv lagluam uas pheej nyiag tej neeg ua hauj lwm nyiaj los yog tsis them nyiaj raws qhov tsim nyog coj mus hais plaub. Tej neeg ntiag tug uas raug cov teeb meem no yeej muaj peev xwm coj lawv tej tswv lagluam mus hais plaub kom tau tej nyiaj no rov qab thiab yog lawv raug tej teeb meem no tiag.
