Ntsiab lus:
- Yuav muaj cov kev pauv hloov tshiab rau Australia tej nyiaj superannuation pib txij financial year tshiab no mus.
- Tej neeg nplua nuj thiab muaj tej nyiaj superannuation ntau yuav pom tias muaj kev pauv hloov loj tshaj plaws rau lawv tej nyiaj no.
Tsoom fwv cov kev kho tseem ceeb rau cov nyiaj superannuation yuav ras los ua cai siv sai sai no tom qab uas tsev kis xeev siab (Senate) tau pom zoo rau hmo zwj Quag (Tuesday), uas yuav muaj kev pauv hloov tseem ceeb rau tej neeg khwv tau nyiaj tsawg, thiab tej neeg muaj nyiaj super tshaj $AUD 3 million.
Kuj tsim tau tsab cai Treasury Laws Amendment (Building a Stronger and Fairer Super System) Bill 2026 lawm tom qab tau txais kev txhawb nqa ntawm pab nom Greens thim lus tsis ua raws li tej xub hais thaum ntxov kom pab nom Labour thiaj tsim tau tsab cai no siv.
Pab nom Liberals thiab Nationals los kuj yog ob pab uas tsis pom zoo nrog tsab cai no, thiaj yuam kom Labor nrog pab nom Greens sib khom kom tau txais kev pom zoo tsim tsab cai no ntawm tsev kis xeev siab.
Tsoom fwv tau piav tias cov kev kho tsab cai no yog ib co tseem ceeb rau tej neeg ua hauj lwm khwv tau nyiaj tsawg thiab ua kom cov super system "yog ib co ncaj ncees dua rau tej neeg tau tej nyiaj no ntau mus txog rau tej tau tej nyiaj no tsawg", tab sis kuj yuav yog cov kev raug tsub se ob zaug rau tej neeg tau uas khwv tau nyiaj ntau tshaj plaws.
Jim Chalmers uas yog tus nom tswj nyiaj txiaj rau tsoom fwv Albanese tau hais tias ''Txhais tias yuav tau nyiaj super ntau tuaj ntxiv rau tej neeg ua hauj lwm khwv tau nyiaj tsawg thiab yog ib co kev txo se los sis yog ib co txiaj ntsim yuav tau ntev uas yuav tsis ua rau muaj teeb meem rau tsoom fwv thiab tej lagluam thiab tej neeg uas muaj nyiaj super ntau tshaj plaws."
Lub tuam chav tswj nyiaj txiaj kwv yees tias cov kev kho no yuav pab kom tau nyiaj super rau tej neeg Australia yuav laug txog li ntawm 1.3 million tus, uas feem ntau mas yog tej poj niam los sis yog tej neeg hnoob nyoog qes dua 30 xyoo.
Hos yog tham txog tej neeg uas khwv tau nyiaj ntau, ces lawv cav tias lawv cov kev txo se rau tej neeg Australia nplua nuj tshaj plaws ''tsuas muaj txog li 0.5 feem pua'' ntawm tej pej xeem rau financial year tshiab no xwb.
Txawm tias pab nom Greens yeej muaj txoj kev txhawj xeeb thiab ntshai txog tsab cai no los Senator Nick McKim tau hais tias nws pab nom yeej tau pab tsim tsab cai no ''yog ib cov kev pauv hloov muaj tseeb thiab tau txais kev ncaj ncees rau cov kev kho cov kev sau se uas siv tau zoo tiag'' rau cov nyiaj puag xyoo tom ntej no.
Nws tau hais tias "Cov nyiaj puag xyoo no yog ib co cib fim ntawm ib tiam neej uas kub siab tiag xav los kho cov kev sau se, ces peb thiaj tso kev dav rau Labor ua,"
Txawm li cas los nws kuj tau hais ntxiv tias tsab cai no ''yeej tseem tsis tau yog ib cov kev pauv hloov zoo tiag" ntawm cov kev pauv hloov uas kho cov tax system tiag ''uas yuav pab kom tau txais kev vaj huam sib luag rau ntau phaum neeg sib txawv".
Chalmers tau ua tsaug rau pab nom Greens rau lawv cov kev kub siab muaj feem koom nrog cov kev tsim tsab cai tshiab no, uas yeej xub tau thov tsim xyoo 2023 dhau los.
Nws tau hais tias "Peb tab tom pab kom tej neeg ua hauj lwm khwv tau nyiaj ntau tshaj qub ntxiv xwb, thiab kom lawv tau tej nyiaj lawv khwv tau kom ntau tshaj qub ntxiv, thiab kom tau nyiaj super ntau ntxiv thaum so tsis ua hauj lwm lawm, ua ke no los kuj yog ib cov kev kho Australia cov superannuation system uas siv tau zoo hauv ntiaj teb no xwb."
Tej kev pauv hloov yuav muaj rau tej nyiaj superannuation
Tsab cai no yog ib cov kev hloov tseem ceeb uas qhia tias tej neeg muaj nyiaj super ntau yuav raug tsub se li cas, ua ke no los kuj pab tej neeg khwv tau nyiaj tsawg kom tau tej nyiaj super no ntau tuaj ntxiv thiab.
Nod yog tej yuav muaj kev pauv hloov:
Nqe cai tshiab 296 uas tsub se rau tej nyiaj super ntau
Txij hnub tim 1 lub 7 hli ntuj xyoo no mus, ces yuav nce tej se ntawm 15 feem pua mus ua 30 feem pua rau tej neeg muaj nyiaj superannuation coj mus nqe peev uas khwv tau nyiaj ntau tshaj $3 million, los sis yuav raug tsub se ob npaug.
Tej neeg uas muaj nyiaj superannuation tshaj $10 million ces yuav tsub se 40 feem pua rau tej nyiaj khwv tau los uas tsub se ntau tshaj qhov xub xav thov tsub se.
Tab sis ob co kev pauv hloov no yuav xam raws li tej nyiaj poob nqe kom thiaj tsis muaj teeb meem rau tej neeg Australia rau ib lub caij twg uas tau nyiaj super ntau tuaj ntxiv.
Tej neeg Australia uas muaj nyiaj super tsawg dua $3 million ces tseem tau them se li qub ntawm 15 feem pua xwb.
Thiab tej kev pauv hloov tshiab no tsuas tsub se rau tej nyiaj khwv tau los ntawm cov kev nqes peev xwb, tsis yog yuav tsub kiab rau tej nyiaj super uas ib tug twg muaj, tom qab uas lwm pab nom teb chaws tsis pom zoo rau cov kev tsub se tshiab rau tej nyiaj super no.
Tej neeg khwv tau nyiaj tsawg cov superannuation tax offset
Txij tim 1 lub 7 hli ntuj xyoo 2027 mus ces yuav nce cov nyiaj khwv tau ntawm $37,000 mus ua $45,000 raws li cov low-income superannuation tax offset (LISTO). Ces tej neeg uas khwv tau nyiaj tsawg dua $45,000 thiaj yuav tsis tau them se rau lawv tej nyiaj super dab tsi.
Txuas ntxiv ntawd los nom tswv kuj yuav them cov nyiaj maximum annual offset payment ntau tuaj ntxiv nce ntawm $500 mus ua $810. Txhais tias tej neeg ua hauj lwm khwv tau nyiaj tsawg yuav tau nyiaj super ntau tuaj ntxiv rau lub caij xa se/thov se rov qab los ntawm tsoom fwv tej se tsub rau tej nyiaj super thawm xyoo.
Lwm cov kev pauv hloov uas tseem yuav muaj
Ua ke nrog tsab cai tshiab no los kuj muaj ib co cai coj los tiv thaiv kom tej neeg uas phem rau tej me nyuam yaus tsis txhob muaj peev xwm zais lawv tej peev txheej ntawm lawv tej nyiaj superannuation kom tsis txhob muaj peev xwm lug tsis txhob tau them nyiaj me pab tu me nyuam uas tej tsev hais plaub hais kom lawv them.
Tsis tas li ntawd los kuj muaj ib cov kev txwv tsi ntsees twg txog cov kev haub tau yaum ntawm ib co nyiaj superanuation funds twg rau lub caij uas tej neeg ua hauj lwm tseem ua hauj lwm thiab tseem siv lub super funds ntawd coj los ua co vkev tiv thaiv kom tej neeg ua hauj lwm tsis txhob siv cov super funds uas khwv tsis tau nyiaj zoo thiab.
Tej kev pauv hloov no ces yeej tau coj tej cai coj los qhia ua ntej xyoo 2026-27 ntawm tsoom fwv teb chaws Australia tej nyiaj puag xyoo lawm, uas yuav coj los qhia rau hnub tim 12 lub 5 hlis ntuj no.
Tej cai no yeej teev txog cov kev pauv hloov rau tsab cai teev txog cov "payday super", uas tsoom fwv tau tso cai pom zoo uas hais kom tej tswv lagluam yuav tsum tau them kiag nyiaj super rau tib lub caij uas them tej nyiaj hauj lwm/nyiaj hli ua ke rau tej neeg ua hauj lwm. Uas yuav pib siv txij tim 1 lub 7 hli ntuj 2026 no mus.
Txawm li cas los tej se uas tseem tsub 16 feem pua rau tej neeg khwv tau nyiaj txij $18,201 txog $45,000 ntawd yuav raug txo los them 15 feem pua txij tim 1 lub 7 hli ntuj mus lawm xwb.
Tsis tas li ntawd los kuj yuav muaj nyiaj pab rau Fair Work Commission cov award wage increases rau tej nurses uas ua hauj lwm tu tsom kwm lwm tus, uas yuav tau txij tim 1 lub 8 hlis ntuj 2027 no mus.
Txuas ntxiv ntawd los kuj muaj xov xwm cej luam tias lub tuam chav tswj nyiaj txiaj tseem sam sim tshuaj ntsuam seb puas yuav txo se 50 feem pua rau tej capital gains tax uas tej neeg nqe peev rau tej lagluam vaj tse uas yuav tsev ntev dua ib xyoos ntawd thiab.
— With additional reporting by the Australian Associated Press.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
