Ntsiab lus:
- Labor tau txo Australia cov humanitarian visa txog ib feem peb.
- Cov kev txo tej visa no raug xam tias yog ib feem ntawm nws cov kev kho tej dej num tsiv teb tsaws chaw.
Tsoom fwv Albanese tseem yuav txo Australia tej humanitarian visa txog li ib feem peb tam li yog ib co kev kho Australia cov kev tos tej neeg txawv teb chaws tuaj kom tsawg, raws li SBS nkag siab.
Phau ntawv xov xwm The Australian Financial Review tau xub cej luam qhia tias Labor yuav txo cov humanitarian visa ntawm 20,000 los ua 13,750 daim rau thaum peb xyoo nyiaj txiaj tom ntej no, uas tau ua rau kwv yees tias yuav muaj tej neeg txawv teb chaws tuaj tsawg.
Tau muaj tus kis sawv cev rau tus nom Tony Burke ntawm lub tuam chav Home Affairs (Lub tuam chav saib xyuas tej dej num hauv teb chaws) tau qhia rau SBS News tias yeej tseem tsis tau muaj cov kev txiav txim siab zaum kawg meej tseeb txog cov kev tos tej neeg thov cov humanitarian visa xyoo to ntej no thiab ntshe tseem yuav cuam tshuam txog xyoo tom ntej no tej txheej txheem nyiaj puag xyoo thiab.
Lub caij uas tseem muaj zejzog pej kum haiv ntau cov tsov rog thoob ntiaj teb no, pab nom Labour kuj tau tos tej neeg thov cov humanitarian visa ntau tuaj ntxiv, ces thiaj ua rau nws tos tej neeg thov tej visa no coob li tam sim no.
Txawm li cas los tus tsoom fwv no tau hais tias nws tsuas tos rau lub caij 4 xyoos xwb.
Thiaj tau qhia txog tej kev pauv hloov no rau lub caij uas kwv yees tias tsoom fwv yuav los qhia txog nws cov kev kho nws tsab cai tswj cov kev tsiv teb tsaws chaw (Migration policy).
Yeej cia siab tias Labor tus nom Tony Burke uas tswj lub tuam chav Home Affairs yuav los qhia txog tej no ntxaws ntawm lub koom haum National Press Club thaum ntxov lub limtiam no, tab sis ho tau muab ncua lawm tom qab uas Burke tsis tau txais kev pom zoo ntawm tej nom tseem ceeb txog tej xub ke zoo tshaj plaws los tswj tej dej num no.
Txim ntawd los thawj pwm tsav Anthony Albanese thiaj tsis kam qhia xov xwm tshiab dab tsi, thiab qhia rau ABC radio hnub zwj Quag (Tuesday) tias yeej muaj npaj ''ntau yam tswv yim tseg lawm'' tab sis ''tseem tshuav ntau yam num yuav tau leg'' mas thiaj ua tiav. Nws tau tsis kam qhia kiag lub caij tias yuav qhia txog tej kev pauv hloov rau cov dej nuam tsiv teb tsaws chaw no li cas, thiab tsuas hais tias mam li qhia raws li ''lub caij nyoog tsim nyog qhia xwb."
Ces tsis ntev los no cov kev tos tej neeg tsiv teb tsaws chaw tuaj coob thiaj yog tej yam uas zej tsoom sib teev theev, uas thaum muaj neeg nyiam pab nom One Nation ntau tuaj ntxiv no nws yeej xav los siv ib co tswv yim kom nruj tshaj qub ntxov los tswj thiab txo kom tsawg.
Ob pab nom loj los yeej yeej tau nrhiav xub ke los tswj lawv tej cai tswj cov kev tsiv teb tsaws chaw kom nruj tuaj ntxiv tab sis tib lub caij no los kuj tsis lees tias nws ua tej no vim muaj neeg nyiam cov pab nom me ntau tuaj ntxiv thiab.
Angus Taylor uas yog tus coj lawm pab nom teb chaws tau hais tias nws pab nom koom tswj (Coalition) tsuas tos tej neeg txawv teb chaws tuaj tsawg dua tej vaj tse tsim tau ntawm Australia tsab no xwb. Uas raws li tej vaj tse tsim tau tam sim no ces tseem tsim tau tsawg dua 180,000; txawm li cas los pab nom koom tswj (Liberal National Party - LNP) yeej tseem tsis tau qhia kiag tias lawv yuav txo li cas kom thiaj tsuas pub tos tau npaum li ntawd xwb.
Xyoo 2024-2025 ces yeej muaj tej neeg txawv teb chaws tuaj rau Australia txog li 306,000. Raws li Labor cov nyiaj puag xyoo kwv yees ces tej zaum yuav tos tsawg txog li 225,000 rau xyoo 2027-2028 no lawm xwb, tom qab uas pab nom no tau nrog tswj kom tos tau tej neeg txawv teb chaws tuaj tsawg yog piv rau lub caij tom qab ntxeem dhau tus kab mob COVID kis thoob ntuj uas tos txog 568,000 tus.
Pab nom One Nation los kuj tau qhia tias nws tsuas xav kom tos 130,000 tuaj xwb, txawm li cas los nws tus nom hu ua David Farley cav tias nws pab nom tseem yuav tos 100,000 tus neeg ua hauj lwm tseem ceeb tuaj ua hauj lwm rau ob hnub so dhau los thiab. Ces sai sai kiag tom qab ntawd Pauline Hanson uas yog tus coj pab nom no thiab Barnaby Joyce thiaj tau qhia qhov tseeb tom qab tau muaj cov kev sib cov nyom no.
Labor tab tom npaj dab tsi?
Raws li phau ntawv xov xwm The Australian newspaper cej luam rau hnub zwj Feej (Wednesday) qhia ces, ze ze rau qhov Labor twg leg nws tej dej num tswj cov kev tsiv teb tsaws chaw no kom tiav lawm, uas yuav txwv tej tub kawm pej kum haiv kom nruj tuaj ntxiv, lawv tsev neeg thiab txo cov visa rau tej neeg tuaj xyuas Australia kom tsawg.
Mr Burke los kuj yuav qhia txog tej kev pauv hloov no rau lub sij hawm ntau limtiam ntxiv no, uas yuav siv qee cov cai rau lub 9 hlit ntuj (2026) no.
Cov kev pauv hloov rau tub kawm tej visa (Student Visa) tej zaum kuj yuav ua rau tej neeg txawv teb chaws yuav hloov kawm dua lawv tej sob kawm tshiab kom lawv txuas nyob tau ntxiv tsis txhob muaj peev xwm ua tau, yuav tsis lees paub tej neeg tseem nyob ntawm Australia no tej ntaub ntawv thov visa, thiab yuav txwv tias pub npaum li cas tus neeg ntawm nws tsev neeg thov tau visas, thiab yuav xaus tsis pub tej neeg kawm qib siab tib mus kawm cov sob kawm xyaum ua kiag ib co hauj lwm uas siv ib co txuj ci twg tsi ntsees lawm.
Thiab muaj ib co visa ntoj cig tsi ntsees twg los kuj yuav raug txo lub sij hawm ntawm 12 hlis (1 xyoos) mus ua 6 hli lawm xwb.
Ces thiaj muaj tej kev pauv hloov no tom qab uas twg tau muaj tej neeg tsiv teb tsaws chaw tuaj rau Australia tsawg lawm.
Tau ua rau Australia cov program uas tos tej neeg tuaj nyob ruaj uas tuaj tom qab lub caij ntxeem dhau kab mob COVID ntawm 195,000 tus nqe los ua 185,000 tus.
Lub 7 hli ntuja ces cov skilled visa program kuj raug kho, ces thiaj ua rau tej neeg txawv teb chaws uas xa ntau ntawv thov tej visa no yuav tau tos kom tej neeg tuaj tshiab no tuaj tau qeeb zog.
Ntxiv ntawd los cov graduate visas kuj kim tshaj qub ntxiv thiab, kuj txo lub hnoob nyoog kom qes zog thiab yuav tsum paub ntawv/lus Askiv zoo tshaj qub ntxiv. Tsis tas li no tej neeg xav thov tej visas no siv yuav tsum tau qhia kom tau qhov tseeb tias lawv muaj nyiaj txaus pab lawv tus kheej ntawm Australia no kom lawv pheej tsis txhob mus ua tej hauj lwm txhaum cai.
Txawm tsis muaj ib tug tsoom fwv twg muaj peev xwm yuav twv tau tias yuav tos tej neeg txawv teb chaws coob npaum li cas — los xam raws li tej neeg cov kev mus los, uas tsis yog cov quota ces — kuj muaj peev xwm yuav kho tej visas thiab kho tias tsuas pub leej twg tuaj ces thiaj yuav ua rau muaj cov kev txawv txav rau tej zauv no.
Lub caij uas Labor tej nom tseem txhawj tias lub tswv yim tswj cov kev tsiv teb tsaws chaw nruj tuaj ntxiv no yuav ua rau tsam tej neeg left-wing voter tsis txhawb nqa lawm no, lawv kuj tau ua tib zoo xav tias kom yam tsawg seb yuav ua li cas kom tsoom fwv muaj peev xwm tos tau tej neeg tuaj raws li tej nws kwv yees.
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
