Ntsiab lus:
- Nom tswv Nplog tau tsub txim rau ib tug tswv tsim cawv (Tiger Vodka) thiab 10 tus neeg ua hauj lwm ntawm ib lub tsev tos qhua cuam tshuam txog 6 tus neeg ntoj ncig txawv teb chaws uas tau tas sim neej.
- Cov kev nruam sim xyoo 2024 tau cuam tshuam nrog ib co cawv uas tsuas cov methanol tab sis nom tswv Nplog hais tias yeej tseem tsis tau muaj peev xwm qhia tau tias puas yog li hais ntawd tiag.
Nom tswv Nplog tau hais rau hnub zwj Cag (Saturday) tias lawv tsis muaj peev xwm yuav liam los yog qhia tau tias 6 tus neeg ntoj ncig txawv teb chaws uas tau tas sim neej puas cuam tshuam nrog cov taug cawv methanol li xub tau hais vim rau qhov tej cuab yig uas muaj tej neeg nruam sim no tsis tso cai rau nom tswv phais lawv tej neeg lub cev.
Ntawm 6 tus neeg ntoj ncig txawv teb chaws no ces muaj 2 tug yog neeg Denmark, 1 tug neeg Meskas, 1 tug neeg Askiv thiab Australia 2 tug ntxhais nto nkauj tom qab tau muaj xov xwm cej luam tias tau muaj tej xwm txheej no tshwm sim thaum tej neeg tau mus haus dej haus cawv rau ib hmo ntawm lub zos Vang Vieng lub 11 hlis ntuj xyoo 2024.Nplog lub tuam chav tswj kev ruaj ntseg (Laos Ministry of Public Security) tau hais ib co ncauj lug rau hnub zwj Cag (Saturday) tias:
''Txog tam sim no ces nom tswv yeej tseem tsis tau pov thawj los qhia tias vim li cas tej neeg no thiaj tas sim neej ... thiab seb tej neeg no cov kev nruam sim puas cuam tshuam nrog lawv ntiag tug los sis yog cuam tshuam nrog ib co chiv keeb teeb meem dab tsi tsi ntsees."
"Tos zoo li no los twb vim yog tsis pub nom tswv ua phais tej neeg tas sim neej tej cev, ces thiaj tsis muaj cov forensic evidence coj los qhia tias dab tsi ua rau tej neeg no tas sim neej."
Txawm li cas los nom tswv Nplog tej ncauj lug tau hais tias: "Lub tuam chav tswj dej num noj qab haus huv lub chaw teeb txheeb txog zaub mob thiab tshuaj (The Ministry of Health's Food and Drug Research Centre tau txheeb tau tias yeej muaj tej taug cawv methanol ntau heev hauv tej cawv Tiger Vodka."
Methanol ces yog ib co taug cawv uas muaj peev xwm tov xyaw cawv kom cawv muaj ceem tuaj ntxiv tab sis yog tau haus lawm yuav ua rau dig muag, ua rau raug kev phom sij rau lub siab thiab ua rau tas sim neej.
Cov ncauj lug no tau hais tias raws li tej xov xwm uas Australia lub embassy thiab Thaib ib lub tsev kho mob qhia ces ''Methanol yeej raug txheeb tau hauv Australia ob tug neeg ntoj ncig no tej ntshav."
Tej ncauj lug no kuj tau qhia ntxiv tias tsoom fwv Nplog tau coj tus tswv lagluam uas tsim cov cawv hu ua Tiger Vodka no coj mus hais plaub vim ''nws tsim thiab muag tej khoom tsim kev phom sij tsis tau txais kev noj qab haus huv thiab ua luam tsis raug cai.''
Nyob rau ib co ncauj lug uas tau nthuav tawm thaum ntxov rau hnub zwj Cag (Saturday) ces Demark lub tuam chav tswj dej num txawv teb chaws tau qhia meej txog nom tswv Nplog tej tsim uas tau tsub rau tej neeg ua txhaum rau hnub zwj Kuab (Friday).
Yog txheeb tau tias txhaum tiag ces tus neeg raug liam no yuav raug teem txim kaw tsev laj cuj 4 xyoos thiab yuav raug nplua raws li Demark lub tuam chav tswj dej num txawv teb chaws tau hais.
Tus tswv thiab 10 tus neeg ua hauj lwm ntawm lub tsev tos qhua (Nana Backpacker) uas tus neeg Meskas ntoj ncig so los kuj raug teem txim tias ''tau txov tej pov thawj'' tom qab tau muab tus neeg no lub cev xa mus rau tsev kho mob.
'Meem txom thiab chim siab heev'
Cov kev tshuaj ntsuam txog tej xwm txheej no yog ib co ua rau muaj kev sib cov nyom ntawm Australia thiab Nplog, thiab kuj tau muaj cov kev teem txim no rau ob hnub so dhau los no rau lub caij muaj kev txhawj xeeb tias xyov puas yuav tau txais kev ncaj ncees rau Australia ob tug ntxhais hluas li Bianca Jones thiab Holly Morton-Bowles tom qab yuav laug tau ob xyoos no.
Raws li Australia tus nom tswj dej num txawv teb chaws Penny Wong Penny Wong tau hais rau hnub zwj Kuab (Friday) ces nws hais tias:
"Tsoom fwv Australia yeej meem txom heev thiab chim siab heev tias nom tswv Nplog tsis kub siab tiag tiag nrog txheeb tej thiab rau txim kom hnyav,''
''Peb yeej tau qhia meej tseeb ua ntuv zus tias peb xav kom rau txim kom hnyav raws li qhov tsim nyog rau tej xwm txheej puas tsuaj no.''
Wong kuj tau hais ib co ncauj lug ntxiv tias tsoom fwv yeej tau txhawb nqa kom ua tib zoo tshuaj ntsuam thiab xyuas kom muaj kev dawb huv rau cov kev tshuaj ntsuam txog cov kev tas sim neej no..
Wong tau hais tias nws yuav rov qab qhia txog Australia cov kev xav ncaj qha rau Nplog tus nom tswj dej num txawv teb chaws ntawm lub rooj sab laj Southeast Asian miniterial meeting ntawm Manila limtim no.
Thiaj ua rau Vang Vieng tau ras los ua ib thaj chaw ntawm Southeast Asia uas muaj tej neeg ntoj ncig ris hnab ncig teb chaws nyiam mus ncig txij li ntau caum xyoo dhau los uas Nplog tej coj koom tsham tau qhib nws lub tebchaws no rau tej lagluam ntoj ncig.
Sawv daws yeej paub tias lub zos no yog ib lub uas muaj neeg nyiam haus dej cawv thiab yaj yeeb thiab ua tej koob tsheej rau tej neeg ntoj ncig ris hnab ncig teb chaws dhau los tab sis txij ntawd los kuj rov qab muab tis npe tias yog ib thaj chaw ntoj ncig ceev txuag tej ib puag ncig (ecotourism destination).
Thiaj ua rau tsoom fwv lub koom haum tawv tswv yim taw qhia tej kev ntoj ncig thiab tej nom tswv txawv teb chaws tej chaw qhia xov xwm lub vas sab smartraveller tau muaj ib co kev ceeb toom tshiab tsis ntev los no txog Nplog teb.
Uas tam sim no nws ceeb toom rau tej neeg ntoj ncig tias ''kom yuav tau xyuam xim ceev faj heev vim muaj neeg ua txhaum cai, thiab tej zaum yuav raug kev phom sij los ntawm tej taug methanol thiab muaj tej kev txhawj xeeb txog cov kev tsis muaj kev dawb huv rau Nplog cov justice system".
"Tej zaum Nplog tej legal system yuav tsis muaj kev dawb huv thiab tsis tau txais kev ncaj ncees rau tej plaub ntug ua txhaum cai,'' raws li nws tej lus taw qhia tshiab tam sim no hais.
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
