Neeg Australia yuav pom ntau cov kev pauv hloov rau lawv tej nyiaj hauj lwm, se, nyiaj superannuation, paid parental leave thiab ntau yam ntxiv txim tim 1 lub 7 hli xyoo 2026 no mus, rau lub caij uas tsoom fwv teb chaws thiab tsoom fwv xeev yuav los pib siv tej kev pauv hloov rau xyoo nyiaj txiaj tshiab no.
Ib xyoos twg ces yeej tej cai tshiab siv, tab sis cov kev pauv hloov xyoo no ces yuav cuam tshuam txog tej neeg ua hauj lwm tej nyiaj hauj lwm, tej nyiaj khaws cia tau siv lub caij so tsis ua hauj lwm, tej cuab yig tej nyiaj siv thiab tej nqe siv ua lagluam.
Txuas ntxiv no yog qee yam tseem ceeb uas peb paub tseeb lawm tias yuav hloov.
Ntau millions tus neeg ua hauj lwm yuav tau nyiaj hauj lwm ntau tuaj ntxiv
Ntau millions tus neeg Australia uas tau cov modern awards yuav tau nyiaj hauj lwm ntau tuaj ntxiv tom qab uas Fair Work Commission tau pom zoo nce nyiaj hauj lwm 4.75 feem pua rau tej neeg khwv tau nyiaj raws li qhov tsim nyog kwv tau tawg tshaj plaws thiab raws li cov award wages thaum ntxov lub hli no.
Tam sim no cov nyiaj hauj lwm ntawm haiv neeg no uas tsim nyog khwv tau yam tsawg tshaj plaws yuav tau $26.44 ib teev twg, los sis yog khwv tau txog li $1,004.90 uas tseem tsis tau them se yog ua hauj lwm 38 teev ib limtiam twg. Thiab yuav pib tau cov nyiaj no txij tim 1 lub 7 hli ntuj no mus lawm.
Thiaj ua rau muaj tej neeg ua hauj lwm txog li ntawm 2.8 million tus uas tau cov modern awards rate yuav tau tej txiaj ntsim no nrog lwm cov neeg ua hauj lwm ua tau cov national minimum wage.
Them kiag nyiaj superannuation rau tej neeg ua hauj lwm rau tib lub caij them yiaj hauj lwm
Ib cov kev pauv hloov tseem ceeb tshaj plaws ntawm xyoo niaj txiaj xyoo no ces yog them kiag nyiaj super rau tib hnub uas tej tswv lagluam them nyiaj hauj lwm rau yus.
Txij tim 1 lub 7 hli ntuj no mus ces tej tswv lagluam yuav tsum tau them nyiaj super rau tej neeg ua hauj lwm tib lub caij uas them nyiaj hauj lwm rau lawv tsis yog yuav tos mam them peb lub hlis tom qab li ib txwm them dhau los lawm.
Thiaj tsim cov kev hloov no los daws tej xwm txheej uas tej tswv lagluam pheej tsis them nyiaj super rau tej neeg ua hauj lwm thiab xyuas kom txuag tau tej nyiaj npaj siv lub caij so tsis ua hauj lwm kom yooj yim tshaj qub ntxiv thiab txheeb tau yooj yim tshaj qub ntxiv.
James Koval uas yog tus tswj tej dej num policy thiab advocacy ntawm lub koom haum Association of Superannuation Funds of Australia tau hais tias, yuav siv cov kev them tej nyiaj super no rau 19 million tus neeg Australia tej super accounts.
Nws tau hais tias "Txhais tias ntau millions tus neeg yuav tau nyiaj siv ntau tuaj ntxiv thaum so tsis ua hauj lwm vim lawv tau nyiaj super them rau lawv ntxov dua thiab them xwm yeem tas mus li ntau dua."
Tej neeg txhawb nqa lub tswv yim no cav tias yog them nyiaj ntau tuaj ntxiv ces yuav pab kom tau tej nyiaj ntau ntxiv thiab coj rov qab mus nqes peev ntau tuaj ntxiv, hais tsi ntsees rau tej hluas uas ua hauj lwm.
Koval kuj tau hais ntxiv tias cov kev kho tej nyiaj super no yauv pab kom tej neeg ua hauj lwm muaj peev xwm txheeb tau lawv tej nyiaj super uas tseem tsis tau them rau lawv kom sai tshaj qub ntxiv thaum piv tej nyiaj ntawm lawv tej super accounts nrog daim tw ntawv them nyiaj rau lawv (payslip).
Tej lagluam kuj zoo siab rau tej tswv yim uas kho tej nyiaj super no tab sis kuj ceeb toom tias cov kev hloov no tej zaum yuav ua rau lawv yuav them nqe ntau ntxiv thiab ua rau lawv tsis muaj nyiaj ntsuab siv, hais tsis ntsees rau tej lagluam me thiab nrab.
Koval tau hais tias txawm ib txhia lagluam yuav ntsib qee yam nyuaj rau lub caij yuav tau hloov no los cov kev kho tej nyiaj super no yog cov yeej tau npaj siv rau ntau xyoo thiab yuav tsis ua rau tej tswv lgluam yuav tau them nyiaj ntau dab tsi, tsuas yog tias seb nws them tej nyiaj super no thij npaum li cas zaus xwb.
"Peb xav tias tsuas muaj qee yam teeb meem me ntsis ib ntus thaum tseem ntxov xwb, tab sis yeej yuav zoo tshaj qub ntxiv, ces thiaj yuav pab tau ntau millions tus neeg Australia, vim lawv yuav tau lawv tej nyiaj super ntau dua xwm yeem tas mus li."
Tax, super and government payment settings also change
Neeg Australia yuav pom tias muaj ntau yam kev pauv hloov rau tej se, tej nyiaj super uas muaj peev xwm tso txhab ntxiv, thiab tsoom fwv qee cov nyiaj them pab rau tej neeg txim tim 1 lub 7 hli ntuj no mus.
Cov kev pauv hloov rau tej se
Tej neeg uas kwv tau nyiaj ib xyoos twg txij $18,000 - $45,000 uas tau them se tsawg tshaj plaws ntawm 16 feem pua ntawd tsuas tau them se 15 feem pua lawm xwb, coj los pab ntau million tus neeg ua hauj lwm.
Thiab xav thov txo se $1,000 kiag rau tej neeg tej nyiaj siv cuam tshuam txog tej hauj lwm lawv ua rau xyoo 2026-27 yog tias tsim tau tsab cai no siv, tab sis yuav tsis txo tej se no rau cov kev thov se xyoo no.
Tsoom fwv tej nyiaj pab cuam thiab tej kev txheeb tej neeg tej peev txheej ua ntej yuav them nyiaj pab
Muaj ib txhia nyiaj uas Centrelink them rau tej neeg ces yuav tau ntau tuaj ntxiv raws li cov nyiaj poob nqe txij tim 1 lub 7 hli ntuj no mus.
Hos tej cuab yig uas tau cov Family Tax Benefit Part A thiab Part B, ces yuav tau nyiaj ntau tuaj ntxiv, ua ke no los kuj yuav muaj cov kev pauv hloov rau tej kev txheeb tej neeg uas tau nyiaj Age Pension thiab Disability Support Pension tej peev txheej thiab.
Nce tej nyiaj khwv tau ntau tuaj ntxiv mam tau them tej Medicare Levy Surcharge
Tej nyiaj uas tej neeg khwv tau ib xyoos twg no yuav pub khwv tau txij 105,000 tej ib tug twg thiab ib yig twg txog li $210,000 mas mam li tau them Medicare Levy surcharge.
Tej se no yog tsub rau tej neeg khwv tau nyiaj ntau tab sis tsis muaj cai siv tau cov private hospital cover thiab them ntxiv rau cov standard Medicare levy.
Pub tso nyiaj super contribution ntau tuaj ntxiv
Ua ke nrog rau cov kev hloov los them nyiaj super rau tib hnub them nyiaj hauj lwm ntawd, neeg Australia los kuj muaj peev xwm tso nyiaj khaws cia rau cov nyiaj super ntau tuaj ntxiv ua ntej yuav tau them se kim ntxiv.
Ces tsoom fwv thiaj pub tej tswv lagluam xub them nyiaj rau tej super los yog tej neeg ua hauj lwm txiav tej nyiaj hauj lwm ua ntej tsis tau them se rau tej nyiaj super ntau tuaj ntxiv ntawm $30,000 tus nce mus ua $32,500 ib xyoos twg.
Thiab pub tej neeg tso nyiaj (them se tag lawm) khaws cia ntxiv nrog tej nyiaj super ntau tuaj ntxiv nce ntawm
$120,000 mus ua $130,000, hos tej nyiaj uas tej meeg muaj cai tso rau yus tej nyiaj super los kuj pub tso ntau tuaj ntxiv nce ntawm $2 million mus ua $2.1 million thiab.
Koval thiaj tau hais tias cov kev pub tso nyiaj ntau zog khaws cia ua nyiaj super no yog tej yam tseem ceeb heev rau tej neeg Australia uas twb ze ze rau qhov yus so tsis ua hauj lwm lawm.
"Tej neeg uas muaj hnoob nyoog rau yav lig li 50 tawm xyoo los yog thaum ntxov 60 tawm xyoo ntawd yuav tau xav tias seb yuav ua li cas kom lawv thiaj muaj nyiaj txaus siv ua tau lub neej tsis nco txhawj rau thaum lawv so tsis ua hauj lwm lawm, ces tej kev pauv hloov no thiaj yog tej yam zoo heev."
Koval tau hais tias cov kev pub tso nyiaj ntau ntxiv rau tej nyiaj super yog pab kom neeg Australia muaj cib fim tso nyiaj ntau ntxiv rau thiab pab kom lawv txuag tau nyiaj txaus siv thaum lawv so tsis ua hauj lwm lawm.
Tsoom fwv los kuj thov kho tej se yuav tsub rau tej neeg Australia uas muaj tej nyiaj super ntau thiab. Raws li cov kev xav thov kho no ces tej neeg muaj nyiaj super ntau tshaj $3 million yuav tau them se kim dua, tab sis kuj tsuas nyob ntawm seb puas muaj peev xwm thov kho tau tsab cai no coj los siv thiab ho yuav siv thaum twg.
Siv tau cov paid parental leave nthuav dav tuaj ntxiv
Tej cuab yig uas yug me nyuam tshiab txij tim 1 lub 7 hli ntuj mus ces yuav tau siv cov paid parental leave nthuav dav tuaj ntxiv.
Uas yuav tau siv cov hnub so ntau tuaj ntxiv ntawm 120 hnub nce mus ua 130 hnub los sis yuav tau so txog 26 limtiam (4 hlis tawm me ntsis) raws cov limtiam ua hauj lwm 5 hnub ib liamtiam twg.
Ib tug leej niam/ib tug leej txiv twg thiaj muaj cai yuav tau so ntau tuaj ntxiv nce ntawm 15 hnub mus ua 20 hnub. Thiab yuav pib siv cov parental leave no rau tej me nyuam yug tshiab thiab me nyuam saws txij tim 1 lub 7 hli ntuj no mus.
Lub hom phiaj yog maj mam coj los siv ib ntus zujzug coj los txhawb nqa kom tej neeg rov qab mus ua hauj lwm, thiab pab kom tej cuab yig tig tau cev yooj yim los sib faib tu thiab saib xyuas me nyuam.
Cov kev pov puag tshiab kom tsis txhob muaj neeg xa xo (text messages) mus ntxias dag ib tug twg
Tej zaum neeg Australia paub txog cov kev pauv hloov txog tej xo ntawm tej tuam txab lagluam xa rau yus ntawm yus tej xov tooj raws li tej cai tswj thiab pov puag kom tej neeg tsis txhob raug neeg phem ntxias dag lawm.
Tej lagluam uas siv cov ID ntawm tej xo (message) uas xa rau lwm tus ntawd yuav tsum qhia lawv lub tuam txhab npe tsis yog tias pheej yuav sau tus zauv xov tooj xwb.
Tej xo (Messages) uas tau xa ntawm tej neeg xa uas tsis teev zwm (registered) lawv tej IDs ces yuav raug cais ntawm tej lagluam uas tau teev zwm raug cai lawm tam li yog ib feem ntawm cov kev ua txoj dag tias yog ib tug neeg ntawm lwm lub tuam txhab mus ntxias dag lwm tus.
Cov kev kho no raug tsim coj los ua kom nyuaj tshaj qub ntxiv rau tej neeg ntxias dag lwm tus (scammers) uas pheej ua txoj dag tias lawv yog tej neeg ua hauj lwm ntawm tej koom haum txaus ntseeg uas tej neeg tso siab.
Lwm cov kev pauv hloov uas yeej paub tseeb lawm
Tej lagluam muag tej seafood yuav tau tau qhia kom tseeb tias muaj tej xov xwm qhia tias tej khoom noj ntawd tau los ntawm cov teb chaws twg, kom tej neeg thiaj paub tias lawv tau tej khoom noj ntawd qhov twg los.
Tib lub caij no los ASIC cov nqe uas teev tej lagluam thiab tej tuam txhab lagluam los kuj yuav nce kim tuaj ntxiv raws li tej nqe tshiab.
Tej lagluam me yeej yuav muaj cai thov tau nyiaj tsawg dua $20,000 coj los yuav ib co peev txheej/twj dab tsi coj los pab lawv ua luam.
Yuav siv cov National Energy Customer Framework coj los pov puag tej neeg yuav khoom siv ntawm tej xeev kom tau txais kev pov puag zoo tshaj qub ntxiv ua ntej yuav tsis siv hluav taws xob, thiab yus yuav tsum tiv nqe ntau xwb mas tej tswv lagluam thiaj yuam tau yus kom tej tej nuj nqe ntawd.
Qee cov se uas yuav tsub ntxiv thiab tej tswv yim pab tej nyiaj superannuation uas tsoom fwv tau qhia ntawd yeej tseem yuav tos seb tsim puas tau cai siv tso thiab tseem yuav tau qhia tias yuav siv hnub twg ua ntej yuav pib siv.
Tab tom muaj cov kev pauv hloov dab tsi thoob plaws ntawm teb chaws no?
NSW
Yuav maj mam siv cov kev pauv hloov los yuam tej zaub mov tsis rau chiv thiab tej khoom cog ntawm tej vaj zaug uas tsis rau chiv (Food organics and garden organics - FOGO) kom coj tej khoom no rov qab coj mus siv dua ib zaug ntxiv, thaum xub mas tsuas yuam tej koom haum uas pheej nkim tej khoom no ntau xwb.
Yuav siv dua ib co cai tshiab tswj tsis pub siv tej nyiaj tau los yam tsis dawb huv thiab siv tej cai los tswj tsis pub pab nyiaj rau tej neeg/koom haum ua phem tua lwm tus kom zej tsoom ntshai rau ib co hauj lwm tshiab ntxiv.
Victoria
Tej neeg ntiav tsev nyob ntawm Victoria yuav muaj peev xwm rho tau tej nyiaj them zoj ntiav tsev nyob (rental bond scheme) coj mus siv zoj lwm lub tsev tshiab kom ntiav tau nyob.
Tej nqe hluav taws xob los yuav pheej yig ntxiv.
Queensland
Yuav sib ib co kev cej luam tshiab ntawm tej koom haum ua hauj lwm nrog me nyuam yaus coj los pab kom tej me nyuam tau txais kev nyab xeeb.
Queensland yuav sib ib co cai tshiab hu ua e-mobility rules coj los tswj tej neeg siv cov e-bike thiab e-scooter uas pheej coj tej cwj phwm yuav raug kev phom sij yooj yim.
Western Australia
Tej neeg ntawm lub xeev no yuav siv tau nyiaj ntau tuaj ntxiv thaum lawv coj tej fwj (iav/roj hmab) coj mus muag thiab yuav tau nyiaj pab cuam yuav roj tsheb siv los ntawm tsoom fwv xeev.
South Australia
Tej neeg muaj cai siv cov Seniors Card tsis tas txhawj txog tej sij hawm ua hauj lwm ntxiv lawm.
ACT and Tasmania
Ob lub xeev no yuav tsis siv cov stamp duty rau tej neeg yuav thawj lub tsev nyob lawm.
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook, mloog tau Youtube, Spotify, Podfollow, iHeart Radio, Google Podcast thiab Apple Podcast.
