Ntsiab lus:
- Cov tshuaj Andrographis (ฟ้าทะลายโจร - Fa Thab Lais June) yog ib co tshuaj raug siv los kho khaub thuas, tab sis kuj raug txheeb nruj heev tom qab muaj feem cuam raug kev phom sij rau tej neeg siv fab.
- Tej kws hais tias muaj ntau yam ua rau muaj neeg Australia coob ntxiv tuaj pheej tig mus ua cov yuav/nrhiav tshuaj los kho yus tus kheej uas tej zaum yuav raug kev phom sij rau yus.
Australia lub koom haum tswj thiab tso cai siv tej tshuaj Therapeutic Goods Administration (TGA) tau nqua hu kom tshem ib co tshuaj ntawm nws daim list uas tso cai rau tej neeg siv vim raug teev tias siv lawm yuav tsis raug kev phom sij dab tsi ntau, tom qab uas tau muaj kev cej luam tas mus li tias ua rau tej neeg siv ib txhia fab (qaug sab heev) muaj ceem heev.
Cov kev txiav txim siab no thiaj ua rau muaj txoj kev txhawj xeeb heev rau tej tshuaj coplementary medicines vim rau qhov twb muaj yuav laug txog ib nrab ntawm Australia tej pej xeem yog cov pheej siv tej tshuaj no.
Associate professor Joanna Harnett uas yog tus paub txog cov tshuaj complementary medicines ntawm tsev kawm qib siab University of Sydney lub teej kawm School of Pharmacy hais tias ''yog tej yam txaus txhawj xeeb heev rau cov kev teeb txheeb txog tej tshuaj thiab cov kev kho mob'', thiab tau nqua hu kom nqes tes los ua ib yam dab tsi tiv thaiv kom tsis txhob muaj teeb meem txuas ntxiv rau tej neeg.
Txij xyoo 2005 los ces yeej tau muaj cov kev cej luam txog tej xwm txheej no ntau tshaj 1,300 cov qhia rau TGA uas fab tej tshuaj uas muaj tshuaj ntsuab nrog, uas muaj tej neeg txog li 287 tus qaug tshuaj sab heev thiab muaj ib tug tas sim neej.
Thiab txawm tias tau txim cov kev ceeb toom txog cov kev siv tshuaj ko tau txais kev nyab xeeb xyoo 2019, thiab tau kho tej ntawv los qhia kom paub siv tshuaj xyoo 2024 los tej koom haum tswj cov kev siv tshuaj hais tias yeej pab txo tsis tau tej xwm txheej qaug tshuaj no kom tsawg li.
Nom tswv hais tias tom qab noj tej tshuaj li 30 ntiag tiv ces txawm pib muaj ib co yam ntxwv mob uas qaug tshuaj sai sai heev los yog yam tsis nco faj, uas muaj peev xwm tshwm sim tau rau tej neeg uas yeej tsis muaj keeb kwm noj fab/qaug tshuaj, thiab yeej tau xub noj tej tshuaj ntawd dhau los lawm thiab.
Tej neeg yeej muaj peev xwm mus yuav tau ntau yam tshuaj yam tsis tas thov ntawv yuav tshuaj ntawm tej kws kho mob uas muaj peev xwm yuav tau ntawm tej chaw muag tshuaj, tej supermarket thiab tej khw muag tshuaj ntsuab coj los siv, ces thiaj ua rau muaj kev txhawj xeeb txog tej neeg cov kev pheej mus yuav tej tshuaj no los rau yus noj.
Cov kev tsis ntseeg siab/tso siab rau tej tuam txhab tsim tshuaj - thiab cov kev tib los yuav tshuaj rau yus tus kheej noj
Magdalena Simonis uas yog tus kis ntawm lub koom haum Royal Australian College of General Practitioners hais tia cov kev pheej nyiam siv cov tshuaj Andrographis paniculate Burm (ฟ้าทะลายโจร) no yog ib co xwm txheej qhia txog cov kev hloov tej tswv yim tswj yus cov kev kho mob, thiab yog cov kev tig mus siv tshuaj ntsuab yam tsis tau ua tib zoo sab laj nrog tej kws. Rau qov ntau xyoo tsis ntev los no tej neeg muaj cov kev xav cov nyom nrog tej tuam txhab tsim tshuaj thiab tej xub ke kho mob li ib txwm kho ntau tuaj ntxiv lawm. Rau qhov yeej muaj 50% ntawm tej pej xeem yeej siv qee yam tshuaj complementary medicine.
Harnett tau qhia rau SBS News tias ''ntxiv ntawd los tseem muaj tej xov xwm cuav qhia txog tej tshuaj tias kho zoo mob raug coj mus qhia rau hauv social media ntau heev thiab muaj pov thawj tsawg heev qhia tias seb siv puas tau txais kev nyab xeeb thiab siv puas zoo tiag."
Dua ntawm tej xwm txheej no los tseem ua rau tej neeg xav siv tshuaj ntsuab vim lawv xav tias "yog tej tshuaj tau los ntawm tej hav zoov hav tsuag tsis muaj dab tsi tov xyaws.''
Ces lawv thiaj xav tias tshuaj ntsuab xwb tsis tas thov ntawv yuav tshuaj vim tej zaum siv yeej tau txais kev nyab xeeb.
Tab sis Magdalena tau hais tias "Yog tham txog cov kev qaug tshuaj sab heev ces tus tshuaj andrographis twb ua rau neeg tuag lawm thiab."
Tus tshuaj no ces neeg Suav thiab India yeej siv coj los kho khaub thuas tau ntau tiam neeg lawm.
Tej nqe kho mob kim thiab tsis muaj peev xwm siv tau cov kev kho mob yooj yim
Raws li tej xov xwm ntawm Australia lub koom haum Bureao of Statistics txij lub 11 hlis ntuj qhia ces twb muaj 1 tug ntawm 7 tus neeg Australia tau ncua los yog lug tsis mus ntsib kws kho mob vim nqe kho kim, thiab yeej tau them tshaj $50 txawm tias muaj cov bulk billing siv tshaj 77%. Thiab tsis muaj tej kws kho mob txaus siv. Ces thiaj ua rau tej neeg tig los yuav tshuaj uas cia li yuav tau coj los kho lawv tus kheej (suav tej tshuaj ntsuab nrog thiab).
Tab sis lawv tsis paub tias tej tshuaj ntawd xyov puas kho tau yus, los yog pab tau yus los yog muaj tej yam yuav ua rau muaj teeb meem rau yus.
''Vim tej zaum tej tshuaj ntawd kuj muaj tej taug tshuaj nyaum uas yus tsis paub txog thiab,'' raws li Jon Wardle uas yog tus coj lub koom haum National Centre for Naturopathic Medicine ntawm Southern Cross University hais.
Yog li ntawd TGA tus kis thiaj hais tias kom tej neeg yuav tau teeb txheeb kom yus paub tias yog yus siv ib yam tshuaj dab tsi fab/qaug lawm ho yuav ua li cas los sis kom paub tias yuav muaj tej yam ntxwv zoo li cas. Thiab xav kom sab laj thiab qhia tej tshuaj yus siv/noj rau yus tej kws kho mob thiaj yuav paub sab laj thiab taw qhia yus.
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.
