Australia tus thawj pwm tsav Anthony Albanese tau ua tus tswv cuab tos txais 9 tug coj ntawm lub koom haum ASEAN thiab Timor Leste nrog New Zealand tus thawj pwm tsav ta tuaj koom lub rooj sab laj ASEAN-Australia Special Summit tim 4-6 March 2024 ntawm nroog Melbourne lub chaw Melbourne Covention and Exhibition Centre.
Ces thiaj tau tham txog ntau yam li hiav txwv South China sea, teb chaws Phabmab, teeb meem huab cua pauv hloov, thiab Australia cov kev qhia txog nws cov kev siv nyiaj $2 billion los pab kom Australia tej neeg lagluam thiab ASEAN tej neeg lagluam ua tau lagluam ntawm ob tog raws Australia cov tswv yim Southeast Asia Strategy mus txog xyoo 2040.
Txawm li cas los tej coj ntawm lub koom haum ASEAN kuj tau muaj kev kos xyeem mem tes pom zoo rau cov kev los kho kom muaj kev sib raug zoo tuaj ntxiv.
Lub rooj sab laj no kuj tau tham txog cov kev nqes peev lagluam, cov kev kho Australia tej visa, cov kev kawm thiab cov clean energy.
Australia kuj pom zoo yuav nqes peev tsim tej haus paus txhim kho thiab clean energy nrog Nplog.
Australia kuj yuav cia 1,000 tus neeg Cob tsib tuaj ua hauj lwm cuam tshuam txog qoob loo rau ntawm tej zos yaj sab ntawm teb chaws Australia, thiab yuav pab nyiaj tshaj 90 million dollars rau tej technology uas pab kom tso pa paug tsuas rau tej ib puag ncig tsawg rau cov kev cog nplej ntawm Mekong Delta, nrog rau lwm yam kev koom tes ntawm Australia nrog Nyab laj.
Txawm li cas los kuj muaj ib txhia coj ntawm lub koom haum ASEAN tsis pom zoo nrog lub tswv yim tswj kev ruaj ntseg ntawm cheeb tsam hiav txwv South China Sea, thiab kuj tau muaj cov kev nqua hu kom tso tseg tsov rog ntawm Middle East.
Thaum kawg ces Australia tus thawj pwm tsav Anthony Albanese thiab Nplog tus thawj pwm tsav Sonexay Siphandone thiaj tau los xus lus txog tej hauj lwm no ntawm lub rooj sab laj ASEAN-Australia Special Summit txog cov kev koom tes lagluam thiab kev txhawb nqa kom muaj kev sib raug zoo tuaj ntxiv nrog cheeb tsam no.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
