Lub koom haum Auditor General (Australian National Audit Office - ANAO) tau pib siv lub sij hawm 9 lub hli mus txheeb tsoom fwv teb chaws Australia (Tsoom fwv Albanese) cov kev tsim thiab cov kev los tswj thiab khiav tej hauj lwm uas siv nyiaj $10 billion Housing Australia Future Fund (HAFF) uas tau tsim xyoo 2023 los ua cov hauj lwm tsim vaj tse kom muaj ntau tuaj ntxiv rau neeg Australia nyob rau lub neej pem suab. Thiab mam li coj tej xov xwm txheeb tau coj los qhia rau lub 6 hli ntuj xyoo 2026.
Lub hom phiaj yog xav tsim kom tau tej vaj tse community housing los yog cov affordable housing txog li ntawm 40,000 lub rau xyoo 2028 no rau neeg Australia nyob.
Thiaj ua rau muaj cov kev sib teev theev txog tej nyiaj txiaj siv thiab tej hauj lwm tsim vaj tse no.
Andrew Bragg uas yog tus nom tswj dej num vaj tse ntawm lwm pab nom teb chaws hais tias:
"Tsuas yog ib cov kev nkim tej neeg ua hauj lwm them se tej nyiaj xwb vim rau qhov yeej muaj tej co piv txwv uas tej neeg yuav tau them nqe tsev kim tshaj $1.3 million lawm thaum xam rau tej nqe tsev nrab ntawm Australia uas tsuas kim txog li ntawm $500,000 xwb."
Barbara Pocock uas yog pab nom Greens tus nom kis xeev siab thiaj zoo siab rau cov kev mus txheeb no thiab hais tias:
"Ua li cas tsoom fwv thiaj tsis siv tej nyiaj no coj mus tsim kiag tej public los yog community housing? uas yuav ua tau sai dua thiab pheej yig dua. Vim Australia yeej tau ua thiab muaj peev xwm ua tau tej vaj tse no dhau los."
Ua ke no los Kristin O'Connell ntawm lub koom haum Anti-poverty Institute los yeej pom zoo nrog tej lus tawm tswv yim no thiab hais tias tsuas tsim tej vaj tse kom tej neeg ua tej vaj tse no tau txiaj ntsim xwb tsis yog tsim tej vaj tse kom tej neeg muaj peev xwm ntiav tau nyob.
Lub koom haum ANAO cov kev txheeb tsoom fwv teb chaws tej hauj lwm no thiaj ua rau Carol Austin tau tawm tsis ua nws txoj hauj lwm tom qab txheeb tau tias tseem muaj tej xwm txheej sib thab sib ze ntawm tej chaw ua hauj lwm.
Thiaj ua rau Ben Mulino uas yog tus Assistant Treasurer txhawb nqa tsab cai no tias:
"Yeej tsim tau cov nyiaj HAFF no zoo coj los siv thiab yeej tau tso cai rau ib co project ua tsev lawm. Thiab yeej ua tej vaj tse rau tej chaw zoo thiab yog cov uas tej neeg ntiav tau nyob."
Thiaj ua rau Clare O'Neil uas yog tsoom fwv Australia tus nom tswj dej num vaj tse liam lwm pab nom teb chaws thiab pab nom Greens tias txhob txwm ua kom tsoom fwv tsis txhob muaj peev xwm siv tau tej nyiaj no los ua tej vaj tse no xwb.
