Hom phiaj ntawm lub Living Museum
Lub Living Museum of Logan yog tej yam qhia tias peb muaj ntau cov neeg zejzog thiab peb qhia txog lawv ntawm lub chaw khaws tej puav pheej teej tug Living museum coj los ua kev zoo siab rau Hmoob tuaj nyob teb chaws Australia txwm 50 xyoo rau xyoo 2025, uas qhia txog tej kab lis kev cai, keeb kwm, Hmoob lub cim thawj, kev tsiv teb tsaws chaw, zaub mov thiab tej xwm txheej nyuaj ntau yam mus txog rau cov kev ua tau ib yam dab tsi tiav pab kom tej zej zog tau sib ntsib siab koom ua ke thiab ua kev hwm rau 234 hom kab lis kev cau ntawm peb tej zejzog. Tsis tas li ntawd los qhia tias Hmoob yog ib feem ntawm lub zos Logan.
Yeej tau muaj lwm cov zejzog tau qhia txog lawv tej keeb kwm li no dhau los thiab li neeg zejzog txum tim uas qhia txog lawv tej dab neeg thiab ua kev hwm lawv. Kuj tau muaj cov neeg zejzog Afghanistan qhia txog lawv tej keeb kwm ntawm lub chaw khaws tej qub puav pheej teej tug uas lawv tau qhia txog lawv tej zaub mov, tej keeb kwm uas tej me nyuam sau tias vim li cas lawv thiaj nyiam lawv cov kev ntseeg thiab lawv tej kab lis kev cai.
Tswv zos Logan City Council Division 2 Teresa Lane, Neeb Yaj thiab Dr Garry Yaj by Marty Pouwelse Photography. Credit: Marty Pouwelse Photography.
Lwm cov neeg zejzog xav li cas rau lub koom txoos qhia txog keeb kwm Hmoob thiab Hmoob teej tug
Councilor (Cr) Teresa Lane uas yog tus hau zos Logan City Council Division 2 tau hais tias "Kuv xav tias tej neeg feem coob nyiam Hmoob tej tsoos uas muaj ntau tsos xim zoo nkauj, thiab nyeem tej dab neeg txog Hmoob zejzog thiab tej Hmoob tau ua ntawm lawv tej zos, Hmoob tej keeb kwm, tej teeb meem nyuaj ntau yam uas tau nyiaj ntxeem uas ua rau Hmoob xav tias Hmoob ua lub neej txog theem twg lawm. Ib tug neeg hnoob nyoog 70 xyoo yeej paub zoo txog tsov rog Vietnam War tias tsim kev puas tsuaj loj npaum li cas rau lub caij tseem ua tsov rog thiab tom qab tsov uas yog ib co kev raug kev phom sij loj tshaj plaws tau tshwm sim rau Hmoob. Thiab qhia tias tsim nyog lawv (Hmoob) nyob ntawm lub teb chaws no thiab yog ib feem ntawm peb tej zejzog."
Australia tej zejzog puas paub txog Hmoob?
Cr Lane hais tias ''tej zejzog uas tuaj rau teb chaws Australia tam li neeg thoj nam, los sis raws cov program tsiv teb tsaws chaw yeej tsis ntseeg tias Australia tej zejzog feem coob yuav kub siab txog lawv tej kab lis kev cai, thiab lawv tsuas xav tias yus ceev txuag yus tej rau yus xwb. Tab sis thaum lawv paub tias lwm cov neeg zejzog kub siab txog thiab lees paub lawv tej thiab pib kub siab txog lawv, ces kuj pab kom peb ua tau ntau yam zoo tuaj ntxiv. Thiab peb yeej tau ua kev zoo siab rau tej zejzog ntawm Logan rau 10 xyoo dhau los no lawm lawm."
Piv txwv li ua cov hnub tseem ceeb ntawm tej zejzog li hnub Burundi Day, Liberia Day, koom txoos neeg Chin sib sau ua ke, tej zejzog Zomi, Matu, Karen uas tuaj qhia tias lawv yog leej twg, lawv ua dab tsi, ces thiaj tau pib muaj tej neeg pib ua kev zoo siab rau cov hnub tshwj xeeb rau lawv ntau zuj zus tuaj lawm.
Cr Lane hais tias lub koom txoos no yuav ua ib xyoos (Lub 9 hli ntuj 2025 - 9 hli ntuj 2026) uas yeej tos txais sawv daws mus saib, dawb xwb tsis tau them dab tsi, caij public transport mus koom tau, muaj tej chaw haum rau tej neeg puas cev siv, thiab lub chaw Living Museum of Logan los yeej yog lub chaw tso cua txias. Txawm li cas los tej zaum kuj muab cov exhibition ntawm tshem rau cov hnub tseem ceeb li hnub NAIDOC Day ntawd thiab coj los ua kev hwm neeg txum tim. Hos lwm cov koom txoos ces yuav tso ntev txog li ib hlis los yog tshaj ntawd.
Ms Lane kuj tau qhia ntxiv tias yeej muaj tej neeg lwm lub zos, tej tub kawm ntawm tej teej kawm tuaj mus xyuas tej koom txoos ntawm lub tsev khaws qub peev txheej teej tug thiab qhia keeb kwm no thiab. Tsis tas li ntawd los yeej tseem muaj tej neeg txawv zos mus saib tau tib yam thiab.
Dua ntawm cov kev mus koom ntawm chaw kiag lawm kuj yeej tseem muaj peev xwm mus saib thiab nyeem tau tej xov xwm txog Hmoob lub koom txoos no hauv online thiab.
Npis Thoj, Txiaj Xab Tsab thiab Sarah Thoj hnav tsoos Hmoob ntawm lub koom txoos qhia txog Hmoob keeb kwm ntawm Living Museum of Logan. Credit: Marty Pouwelse Photography.
Ua tau lub koom txoos no zoo npaum li cas
Cr Teresa Lane hais tias "Hmoob tej zejzog kuj ua tau lub koom txoos no zoo heev, tsis hais tej neeg hais lus mus txog rau cov kev siv tej twj paj nruag."
Nws hais tias "Kuv pom tias yog tej yam ua tau zoo, vim ua rau muaj kev txaus siab heev thiab tej hluas los yeej mus koom, kuv tau hais rau lawv tias cov kev nkag siab txog tias tej neeg no (cov neeg yeem thaj npaj Hmoob lub koom no) tab tom pov puag yus tej keeb kwm dhau los thiab tab tom tsim lub neej pem suab. Ces thiaj xav kom yus hwm, yus qhia thiab yus mus koom."
Cov kev ras los ua ib tug pej xeem Australia txhais tsis tau tias yuav ua rau yus tsis paub tias yus yog leej twg lawm, los sis yuav ua rau yus plam yus lub cim thawj (identity) li cas. Qhov tseeb tiag yog pab kom muaj ntau cov kab lis kev cai thiab ntau tsav neeg rau peb lub neej thiab peb ua tsaug rau tej no.Cr Teresa Lane, Logan City Council Division 2
Ntxhais nkauj hnub ci seev cev Credit: Marty Pouwelse Photography.
Lub khw Global Food Markets ntawm Woodridge
Ms Lane hais tias peb yeej muaj lub khw Global Food Markets no txhua txhua hnub zwj Hnub (Sunday) uas muaj ntau yam neeg zejzog li mus koom li: Thaib, Cob tsib, Africa, Cambodia tuaj ua zaub mov noj thiab ua lagluam, ua kev zoo siab qhia tias lawv yog leej twg. Thiab yeej muaj tej neeg muaj fwj chim uas muaj neeg caum coob hauv Instagram yeej tau yees yeeb yaj kiab txhawb nqa tej koom txoos no thiab.
Cov Artwaves programme
Kuj muaj ntau yam uas tej zejzog muaj peev xwm ua tau li qhia tej dab neeg, qhia qhov tseeb txog tej keeb kwm, los yog tej me nyuam kuj sau tej dab neeg qhia tias cov kev ua lub neej ntawm ib tse neeg uas hais ob hom lus thiab coj ob yam kab lis kev cai ho muaj qhov zoo qhov nyuaj li cas rau lawv.
Lus xaus
Councilor Teresa Lane tau hais tias ''Peb muaj Sarah Thoj thiab Dr Garry Yaj ua cov los qhia kom lwm tus paub txog Hmoob lub zejzog, tab sis lawv yeej tau tsim ib co kev pab tej me nyuam ua homework, tsim chaw kom tej me nyuam tau ua si lom zem, thiab kub siab ua ib yam dab tsi, tsis tas li ntawd los kuj tau ua tej yam dab tsi pab rau tej laus thiab, uas muaj peev xwm hais tau yam txaus siab hlo tias yus yog ib tug Hmoob, yus nyob ntawm lub zos no thiab yus ua tau ib yam dab tsi pab rau zejzog thiab."
"Kuv zoo siab txog peb lub zejzog no thiab tej coj thiab tej coj hluas. Vim lawv yog cov ntaus thawj hlo los qhia lawv tej keeb kwm rau tag nrog peb tej zejzog thiab peb lub xeev kom paub tias Hmoob yog leej twg. Thiaj nrog zoo siab tias yog ib co kauj ruam muaj peev xwm heev uas yuav ua tau txuas ntxiv rau yav tom ntej."
"Vim yeej tsis muaj tej neeg coob yuav ua tus pib thiab qhia tias lawv yog leej twg, thiab qhia tias nod yog kuv tej keeb kwm, tab sis lub zejzog (Hmoob lub zejzog) no tau ua li no, ces peb thiaj nrog lawv zoo siab heev."
Hmoob tej tub koom siab ntawm Brisbane koom yees duab nrog hau zos Logan City Council Division 2 thiab neeg txum tim tus coj thaum qhib koom txoo qhia Hmoob keeb kwm ntawm Living Museum of Logan Credit: Marty Pouwelse Photography.
Koj muaj peev xwm mus saib tau cov koom txoos qhia txog Hmoob keeb kwm ntawm Living Museu of Logan raws qhov chaw nyob 270 Jacaranda Avenue, Kingston, Brisbane, Qld txij sij hawm 10 teev sawv ntxov txog 4 teev tsaus ntuj hnub zwj Quag (Tuesday) txog hnub zwj Cag (Saturday).
Koj muaj peev xwm saib tau ntau cov duab txog lub koom txoos Hmong journey (qhia txog keeb kwm Hmoob) ntawm Logan City Council tau ntawm no:
