Australia yog lub teb chaws loj dav thiab muaj ntau qhov chaw zoo mus ncig, tab sis kev tsav tsheb rau tej chaw deb yuav muaj ntau yam txawv ntawm tej nroog. Yog koj npaj kom txhij thiab paub txog tej xwm txheej ua ntej koj yuav mus ncig yuav pab kom kom mus ncig yam tau txasi kev nyab xeeb dua thiab muaj txoj kev ntseeg siab dua.
Ntsiab lus:
- Ua ntej koj mus ncig, ua tib zoo kho kom lub tsheb kom siv tau zoo, npaj tej twj pab kom koj tau txais kev nyab xeeb thiab npau tej zaub mov noj raws li qhov tsim nyog npaj.
- Tej kev tsheb thiab tej huab cua pauv hloov tas mus li. Txheeb nom tswv tej xov xwm ua ntej koj mus los yog lub caij koj tseem mus, thiab tsis txhob tsav tsheb kwm tej chaw dej nyab.
- Tsav tsheb kom tau txais kev nyab xeeb haum raws li tej xwm txheej tsim nyog tsav, nquag so thiab tsuas txeeb ntej thaum tau txais kev nyab xeeb ua tau thiab ua raws li tej cai pub koj ua tau xwb.
Kuv yuav npaj li cas thaum tsav tsheb mus kev deb?
Cov kev npaj ua ntej yog ib qho tseem ceeb heev ua ntej yuav yuav tsav tsheb mus kev deb rau tej cheeb tsam deb nroog thiab tej zos toj siab ntawm Australia.
Raws li Rhys Heron uas yog tus neeg ntawm lub koom haum Royal Automobile Club of WA (RACWA) tshab txhais ces ua ntej koj yuav mus, xav kom paub zoo txog tej kev tsheb tam sim no, tej huab cua thiab yus lub tsheb seb zoo li cas tso thiab puas tau npaj txhij li cas.
"Txheeb yus tej log tsheb, tej teeb, tej brakes ua ntej yuav mua, xyuas kom ua tib zoo kho lub tsheb raws li qhov tsim nyog kho kom thiaj tau txais kev nyab xeeb thaum tsav ntawm tej kev tsheb. Thiab yog tias yus cab ib lub dab thauj khoom los yog cab ib lub caravan, ces xav kom txheeb tej log tsheb kom haum thiab, ua tib zoo xyuas kom tsuas cab hnyav raws li qhov tsim nyog cab tau xwb."
Mr Heron hais tias "Txawm tias yus tau mus ncig rau ib qho chaw dhau los lawm, los tej zaum kuj yuav muaj kev pauv hloov rau tej kev txij zaum dhau los uas yus tau mus xyuas ib qho chaw twg, vim tsis muaj qhov yuav phem tshaj qhov mus poob zoo deb ntawm yus tsev tom qab uas yus twb txhawj tsav tsheb heev lawm, tej no thiaj tsis yog ib qho zoo tshaj plaws rau yus thaum yus pib mus ncig ib qho qhov twg."
Kylee Pertersen uas yog tus neeg ntawm Queensland lub tuam chav Department of Transport and Main Roads hais ntxiv tias kom yus npaj tej khoom noj khoom haus, ris tsho pam vov thiab tej twj uas yuav pab kom yus tau txais kev nyab xeeb thaum yus mus ncig rau ib qho qhov twg.
Ms Petersen hais tias “Ua tib zoo xyuas kom koj muaj zaug mob txuas noj, muaj dej txaus haus, muaj tej first aid kit siv, muaj tej khoom siv pab koj, thiab npaj tej log tsheb ob lub faj seeb tseg cia tau siv yog tias koj mus rau tej kev av tsis pua roj hmab,"
"Tej chaw nyob nrug ib cheeb tsam nroog thiab tej chaw nyob deb ntawm Australia no mas yog tej chaw loj dav heev, thiab yog mus nrug deb npaum li cas ces tej zaum kuj yuav muaj peev xwm siv tau xov tooj tsawg zujzus lawm thiab, tab sis yus muaj peev xwm nqa ib lub satellite phone los yog npaj cov emergency positioning-indicating radio beacon (EPIRB), tab sis xav kom ua tib zoo xyuas kom yus paub siv tej khoom no raug raws li qhov tsim nyog siv thiab.''
Ua ntej koj yuav mus ces xav kom qhia ib tug twg tias yus mus rau qhov chaw twg, npaj mus rau txoj kev twg thiab yuav mus txog thaum twg.
Qhia rau yus tsev neeg paub los yog yus tej txheeb ze paub tias yus tab tom ua dab tsi, yus tab tom mus rau qhov twg, thiab yus tab tom ntoj ncig ntawm qhov chaw A mus rau qhov chaw B hnub no thiab tsim nyog yuav siv caij nyoog li cas thiaj mus txog lawm.Kylee Petersen
“Tsis tas li no los xav kom qhia rau tej nom tswv zos paub yog tias yus yuav tsav tsheb mus rau tej kev tsheb uas mus deb, kom tej nom tswv zos los yog tub ceev xwm thiaj paub txheeb yog tias muaj tej xwm txheej phem tshaj plaws tshwm sim, ces yam tsawg tsawg kom muaj neeg paub tias yuav mus pib nrhiav yus qhov twg."
Yuav ua li cas kom thiaj tau txais kev nyab xeeb thaum tsav tsheb rau tej zos toj siab thiab tej chaw nyob deb?
Australia tej kev nrug nroog thiab nyob deb yeej sib txawv heev, thiab yeej muaj tej ncua kev deb heev ntawm ib lub zos rau lwm lub zos, tej chaw sam roj tsheb los yog lwm cov chaw pab cuam. Tej zaum kuj yuav ntsib tej tsiaj qus, tej tsiaj txhu uas taug kev ywj siab ntawm tej kev tsheb thiab tej xwm txheej huab cua tab tom pauv hloov.
Tsis txhab tsav tsheb mus hla tej kev raug dej nyab los sis tsis txhob tsav tsheb mus rau ib txoj kev raug kaw vim muaj dej nyab.
Muab cov kev nyab xeeb ntawm kev tsheb uas ib yam tseem ceeb tshaj plaws uas yuav yuav tau ua. Tsav kom qeeb zog, nquag so xwm yeem thiab hloov tus neeg tsav tsheb yog tias muaj peev xwm ua tau kom yus tsis txhob nkees dhau heev thaum tsav tsheb, thiab xav kom zam tsis txhob tsav tsheb thaum hmo ntuj yog lug tau.Rhys Heron
Cov kev nkees yog ib co phom sij tshwj xeeb rau cov kev mus kev deb. Tsoom fwv tej lus taw qhia txog cov kev nyab xeeb thiaj thaw qhia kom yus nres tsheb so yam tsawg li txhua txhua ob teev ib zaug twg.
“Yog tias yus xav nres thiab muaj ib yam laj thawj ti tes ti taw dab tsi ua rau yus yuav tau nres, ces xav kom xaiv txoj kev uas muaj ob sab ntug kev dav zog, los yog kom nres rau ntawm qhov chaw nres thiab so. Txawm li cas los tej zaum yus yeej tsis muaj peev xwm yuav nres tau tas mus li thiab, yog li ntawd ces xav kom xaiv ib qho chaw twg uas lwm tus pom yus yooj yim li nres rau ntawm txoj kev tsheb ncaj ncaj, tsis txhob nres ntawm kev nkhaus ua luj tshib thiab yuav tsum tso yus lub teeb ceeb toom (Harzard lights).''
Cov kev taw qhov muag teeb tsheb qes thaum nruab hnub yuav pab kom lwm tus neeg tsav tsheb ntawm tej kev pom yus lub tsheb tau yooj yim dua. Hos hmo ntuj ces kom nco ntsoov txo yus lub teeb siab kom qes raws li qhov tsim nyog thaum muaj lwm lub tsheb los tshuam yus kev.
Tsuas xav kom txeeb ntej thaum yus txeeb tau raug cai xwb thiab yus muaj chaw seem txaus yuav txeeb tau ntej thiab pom tias tsis muaj tsheb los tshuam kev uas yuav tau txais kev nyab xeeb rau yus xwb.
Tej zaum yus kuj yuav pom tej tsheb loj uas sib cab ob ya los yog ntau tshaj ntawd thiab.
Ben Sutherland kuj yog tuam thawj tswj ntawm lub koom haum Livestock and Rural Transport Association of Western Australia, thiab nws tshab txhais tias yuav tsum ua tib zoo xyuas thiab yuav tsum muaj tej txuj ci pab thaum yus xav txheeb ntej nrog tej tsheb loj ntev thauj khoom.
Mr Southerland hais tias “Kom nyob nrug nram qab ntawm lub tsheb ntawd raws li qhov tsim nyog thiab tau txais kev nyab xeeb rau yus ... Thaum uas yus txeeb ntej ces ua tib zoo xyuas kom tau txais kev nyab xeeb thiab kom muaj chaw dav txog li ib kilometre rau yus huas ntej thiab tej zaum yus yuav tsum tau saib pem hauv ntej seb puas muaj tej tshib tshuam kev nrog yus li ntawm ob kilometres thiab,''
“Tsis tas li ntawd los yog tias tej tsheb loj ho txeeb ntej ces kom tso kev sab xis rau lawv tib yam li yus txheeb lub tsheb khiav qeeb ntej - thiab yus khiav kom ib nyuag qeeb me ntsis kom lawv thiaj lub hla tau yus mus."
Mr Heron thiaj qhia txog qhov tseem ceeb tias cov kev txeeb ib lub tsheb thauj khoom loj thiab ntev yog tej phom sij heev hais tsi ntsees rau thaum uas yus tseem cab ib lub tsheb caravan nram qab tsheb los yog cab ib lub trailer (lub tsheb thauj khoom).
Mr Heron hais tias “Tej tsheb thauj khoom (Trucks) ces tsuas pub khiav ceev 100 km/hr xwb, ces thiaj yuav tau siv sij hawm zog txog li ntawm 30 feeb (Seconds) mas thiaj mus dhau, thiab thaum yus tsav tsheb cov kev siv sij hawm 30 feeb rau ib sab kev yuam kev mas yog tej yam phom sij heev. Qhov zoo tshaj plaws ces kom tos txog thaum muaj cib fim zoo thiab muaj txoj kab huas ntej mam txeeb ntej tsis li ntawd ces tej zaum yuav raug tau kev phom sij tau rau yus thiab."
Yuav ua li cas kuv thiaj paub txog tej kev thiab tej huab cua?
Raws li Ms Petersen tshab txhais ces tej zaum kuj yuav muaj kev txawv txav rau tej kev thaum yus mus ncig, yog li thiaj xav kom txheeb seb puas yog muab txoj kev ntawd kaw lawm, los yog seb puas muaj tej kev ceeb toom huab cua dab tsi tsis yog pheej tos siv tib co online navigation nkaus xwb.
Nws hais tias “Xav kom nqa ib daim luaj chib lig luam ua ntawv (paper based map) los yog lwm yam twj tsom kom yus paub tias yuav mus rau ib qho chaw twg li cas npaj faj seeb tseg cia ... vim tsam ib phiag tej apps ho tsis tau kho tej xov xwm tshiab txog tej kev tias zoo li cas lawm ... Thiab thaum yus mus deb zuj zus rau tej chaw toj siab uas nyob deb lawm, ces yuav ua rau tej apps ntawm yus tej xov tooj ntawd yuav siv tsis tau zuj zus lawm ces thiaj xav kom yus rub tej apps tshiab ntawd kom sai npaum li qhov tsim nyog kho tau.”
Tej xov xwm ntawm tej zejzog yuav pab kom koj totaub txog tej xwm txheej tab tom tshwm sim tam sim no.
Thaum txog caij hav zoov kub hnyiab ces yuav tau txheeb xyuas cov qib theem ceeb toom txog cov kev phom sij ntawm hav zoov kub hnyiab. Tsis tas li ntawd los kom mloog lub zos ntawd tej xov tooj cua, nyeem lawv tej ntawv xov xwm zos txog lwm cov xwm txheej kub ntxhov.Rhys Heron
Thiaj yog tej yam tseem ceeb uas xav kom txheeb nom tswv tej xov xwm txog tej kev ntawm ib lub xeev twg uas yus tab tom yuav mus ncig/mus hla.
Yus muaj peev xwm txheeb lub koom haum ntsuam thiab kwv yees huab cua thiab tej kev ceeb toom, los yog nom tswv tej kev ceeb toom txog tej xwm txheej ti tes ti taw rau ntau thaj chaw uas yus tab tom ntoj ncig mus hla.
Kuv yuav siv tej kev thiab tej chaw so li cas kom tau txais kev nyab xeeb?
Xav kom koj muaj cov kev hwm tej chaw tib yam li hwm tej neeg rau lub caij koj mus ncig thiab.
Mr Heron hais tias “Tsis hais ib yam khoom seem txeej uas koj muaj rau lub caij kom mus ncig ua tib zoo xyuas kom coj mus pov rau tej thoob ntim khoom seem txheej, thiab yog tsis muaj thoob ntim ces kom nqa nrog koj mus. Thaum siv zej tsoom tej tsev plob los pab tu kom huv si.”
Qee cov chaw nres tsheb so thiab tej chaw nres tsheb ces tsuas tsim rau ib co tsheb thauj tej khoom hnyav nres thiab so xwb, yeej muaj tej cai pub tej neeg tsav tej tsheb no kom yuav tsum tau nres thiab so ntau zaus.
Australia yeej muaj tej toj roob hauv pes hav zoov hav tsuag thiab ntau qhov chaw zoo nkauj rau tej neeg tau mus saib thiab ua kev zoo siab, tib yam li Ms Petersen qhia kom peb nco tias cov kev rub siab ntev thiab cov kev paub cai paub hwm lwm tus neeg tsav tsheb thiaj yuav pab kom peb cov kev mus ncig yog ib co zoo rau txhua leej txhua tus ntawm tej kev tsheb.
“Tej neeg tsav tsheb cov kev meem txom muaj peev xwm ua rau lawv tsis muaj qee cov kev txiav txim siab zoo. Yog li thiaj xav kom tsuas tsav tsheb raws tej xwm txheej ntawm tej kev uas tsim nyog tsav xwb, kom rub siab ntev, xyuas kom yus cus plaws (tsis txhob ncaws/tsis txhob tsaug zog), thiab yuav tsum hwm tej kev thiab lawm cov neeg tsav tsheb.”
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong Thursday 6 pm, Sunday 11 am; saib tau ntawm digital TV tshooj 302 (SBS Radio 2), download SBS Adio app, Facebook, Youtube, Spotify, Podfollow, iHeart Radio, Google Podcast thiab Apple Podcast.
