Muaj tej cai dab tsi tswj cov kev thov nyiaj thiab tej koom haum pab lwm tus ntawm Australia? Yus muaj peev xwm ua dab tsi kom tsis txhob raug dag? Ntxiv no yog tej uas tsim nyog koj paub txog yog tias koj xav pab nyiaj, los yog thov nyiaj coj los pab koj los sis thov nyiaj hauv online coj mus pab ib yam dab tsi.
Ntsiab lus tseem ceeb:
- Yeej muaj tej cai tswj cov kev thov nyiaj coj mus pab ib yam dab tsi sib txawv ntawm tej xeev.
- Yog tsis xav kom raug dag ces yuav tau siv caij txheeb tej khoom haum, thiab cheem yus tus kheej yog xav tias xyov puas yog thov nyiaj pab lwm tus tiag.
- Cov kev thov nyiaj pab lwm tus yeej cuam tshuam txog tej cai thiab tej ntaub ntawv tso cai rau cov kev thov neeg nyiaj hauv online coj mus pab ib yam dab tsi, thiaj tsim nyog koj txheeb seb koj cov kev thov ho cuam tshuam txog tej cai twg.
- Kuv muaj peev xwm yuav txheeb tau li cas tias ib lub koom haum twg thov nyiaj mus pab ib co kev pab twg tiag?
- Puas thov txo se tau rau tej nyiaj kuv pab?
- Leej twg yog tus tswj cov kev thov nyiaj?
- Kuv yuav paub tau li cas tias ib co kev thov nyiaj pab lwm tus yog cov kev dag xwb?
- Tsim nyog kuv paub txog dab tsi yog tias kuv xav thov nyiaj los ua ib yam dab tsi?
- Muaj tej cai dab tsi tswj cov kev thov nyiaj hauv online?
Australia yeej muaj ntau yam koom haum pab cuam pib txij li me mus txog tej koom loj ntawm tej zejzog mus txog zej zog tej koom haum pab cuam.
Tab sis tsis yog tag nrho txhua cov koom haum pab cuam me yog cov tau teev zwm raug kev raug cai nrog lub koom haum Australian Charities and Not-for-profits Commission (ACNC) uas tswj tej koom haum pab cuam no.
Kuv muaj peev xwm yuav txheeb tau li cas tias ib lub koom haum twg thov nyiaj mus pab ib co kev pab twg tiag?
Thiab kuj muaj peev xwm txheeb tau ib lub koom haum pab cuam twg tau yooj yim heev ntawm ACNC Charity register.
Cov kev teev ib lub koom haum pab cuam twg nrog lub koom haum ACNC txhais tias lub koom haum ntawd yeej tau raug txheeb thiab yeej ua tau raws li tej cai, tsis hais yog cov koom haum not-for-profit status thiab ua tau raws li tej cai tam li yog ib lub koom haum pab cuam.
Ces Sue Woodward uas yog tus coj lub koom haum ACNC thiaj xav taw qhia kom xub txheeb seb ib lub kom haum twg puas tau teev zwm yam raug cai ua ntej yuav pab nyiaj.
"Vim rau qhov tias yus yuav tau tej xov xwm txog tias leej twg tswj lub koom haum ntawd, nws ua dab tsi, thiab nws tau nyiaj qhov twg los.
"Thiab yuav pab kom yus muaj peev xwm ntseeg siab tias yog ib lub koom haum raug teev zwm raug cai thiab muaj lub luag hauj lwm yuav ua raws li ib co cai twg tam li yog ib lub koom haum zoo.''
Puas thov txo se tau rau tej nyiaj kuv pab?
Koj tsuas muaj peev xwm thov txo se tau rau tej nyiaj uas coj mus pab rau tej koom haum Deductible Gift Recipient status uas tau txais kev txhawb nqa ntawm Australian Taxation Office (ATO) xwb.
Xav kom kom mus xyuas ABN Lookup thiab txheeb seb lub koom haum ntawd puas tau cov DGR status.
Tsis tas li ntawd los koj yuav tsum khaws daim tw ntawv (receipt) ntawm tej nyiaj koj pab cia yog tias koj tab tom npaj tias yuav xav thov txo se.
Leej twg yog tus tswj cov kev thov nyiaj?
Txhua txhua lub xeev ntawm Australia nyias yeej muaj nyias tej cai thiab tej koom haum los tswj tej koom haum pab cuam.
Woodward uas yog tus tswj lub koom haum ACNC hais tias ''Lub koom haum ACNC no tsis yog lub yuav los tswj tej nyiaj uas thov tau los.''
"Piv txwv li tias yog tias muaj ib lub koom haum twg tab tom thov nyiaj ntawm zej tsoom ntawm ib lub ib khw twg, ces yeej muaj ib co cai twg uas lawv yuav tsum tau ua raws tsuas nyob rau ntawm seb yus ho nyob lub xeev twg xwb.''
Tej neeg thov nyiaj no tej zaum kuj yuav tau txais kev tso cai ntawm tej nom tswv zos los yog yuav tau ua raws li lwm cov cai li Australian Consumer Law thiab Privacy laws.
Yog tias koj muaj kev txhawjx eeb txog ib lub koom haum twg cov kev thov nyiaj pab cuam, ces koj muaj peev xwm sab laj nrog tej koom haum tswj tej hauj lwm no ntawm koj lub xeev.
Thiab koj yeej muaj peev xwm mus txheeb tau tej cai tswj cov kev thov nyiaj thiab tej xov xwm txog tej koom haum tswj tej hauj lwm no raws tej vas sab ntawm tej xeev hauv qab no:
- Australian Capital Territory
- New South Wales
- Northern Territory
- Queensland
- South Australia
- Tasmania
- Victoria
- Western Australia
Yog koj ntseeg tias ib lub koom haum pab cuam raug teev zwm twg tsis ua tib zoo los tswj tej nyiaj thov tau los ntawd raws li qhov tsim nyog, ces koj yeej muaj peev xwm qhia rau lub koom haum ACNC.
Woodward uas yog tus coj lub koom haum ACNC hais tias "Yog tias koj xav qhia tiag ces koj yeej tsis tas qhia tias koj yog leej twg, thiab peb los yeej kub siab tiag tiag txog tej kev txhawj xeeb no."
Kuv yuav paub tau li cas tias ib co kev thov nyiaj pab lwm tus yog cov kev dag xwb?
Yog xav kom tsis txhob raug dag rau cov kev thov nyiaj pab rau lwm tus hauv onine ces txheeb ntawm kub koom haum lub vas sab thiab txheeb tias seb lub koom haum ntawd puas yog ib lub teev zwm raug kev raug cai.
Peter Hills hais tias yog tias tias koj tsis ntseeg ib tug neeg thov nyiaj twg uas thov tim ntsej tim muag ntawm yus ces tsis txhob pab nyiaj.
Nws yog tus coj lub koom haumPublic Fundraising Regulatory Association uas yog ib lub koom haum tswj tej koom haum pab cuam thiab tej chaw pab cuam uas thov nyiaj tim ntsej tim muag ntawm lwm tus neeg ntawm Australia.
Tsis txhob maj, thiab cheem yus tus kheej ... yus yeej ib txwm muaj peev xwm mus tau rau ntawm lub koom haum ntawd lub vas sab los yog hu rau lub koom haum ntawd nug seb puas yog lawv thov nyiaj tiag, kom yog tias yus xav pab nyiaj rau ib lub caij twg yav pem suab los thiaj pab tau.Peter Hills-Jones
Mr Hills-Jones tau qhia txog peb yam uas tej zaum qhia tias cov kev thov nyiaj tim ntsej tim muag yog ib co kev ntxias dag.
- Tus neeg ntiag tug ntawd tsis hnav tej ris tsho qhia tias nws yog tus neeg thov nyiaj pab rau ib lub koom haum pab cuam twg.
- Nws tsis muaj ib daim photo ID.
- Nws thov nyiaj ntsuab (Cash) los yog tsuas thov tib zaug xwb.
Tej neeg uas thov nyiaj pab cuam tim ntsej tim muag ntawm lwm tus yuav tsum tau coj tej cwj pwm zoo li yog cov neeg thov nyiaj tiag thiab muaj kev fwm lwm tus, tsis txob mus thaiv mus ua chaw tab kaum rau zej tsoom los yog tsis txhob mus tab kaum lawv rau lub caij uas lawv zaum ntawm ib qho chaw twg.
"Tej neeg thov nyiaj yuav tsum tau tshab txhais kom meej tseeb tias lawv lub koom haum ua dab tsi thiab vim li cas lawv thiaj thov nyiaj.
''Yog tias tus neeg ntawd thov nyiaj ntawm kev los yog khob qhov rooj thov nyiaj thiab ib tug twg tsis xav pab nyiaj, ces lawv yus tsum hwm tus cov kev txiav txim siab no."
Yog tias koj xav tias ib co kev thov nyiaj twg yog cov kev ntxias dag xwb, ces tsis txhob pab nyiaj thiab qhia rau tej nom tswv tswj tej kev thov nyiaj los yog qhia rau lub koom haum national Scamwatch service.
Tsim nyog kuv paub txog dab tsi yog tias kuv xav thov nyiaj los ua ib yam dab tsi?
Tej neeg ntiag tug uas xav thov nyiaj tsim nyog nco tias yeej muaj tej cai tswj cov kev thov nyiaj siv sib txawv ntawm tej xeev.
Amy Williams uas yog tus kws lij choj ntawm lub koom haum Justice Connect’s Not-for-profit Law service taw qhia tias kom txheeb nrog yus tej koom haum uas tswj cov kev thov nyiaj no seb ho muaj tej cai dab tsi uas yus yuav tau ua raws.
Tsuas yog tias ntshe yus ho tsuas thov nyiaj coj los siv rau yus ntiag tug coj mus ua ib yam dab tsi xwb.
Ms Williams tshab txhais tias "Piv txwv li tej zaum yus thov nyiaj ntawm yus tej phooj ywg, ntam yus tsev neeg coj mus pab yus tej hauj lwm yeem thaj txawv teb chaws, los yog thov nyiaj ntawm tej chaw ua hauj lwm coj mus pab them nqe kho mob rau ib tug neeg ua hauj lwm, tej kev thov nyiaj no ces yeej tsis tas ua raws li tej fundraising laws teev li."
Muaj tej cai dab tsi tswj cov kev thov nyiaj hauv online?
Thiab yog tias koj ho tab tom thov nyiaj hauv online ntawm tej chaw thov nyiaj ntau yam sib txawv, ces Ms Williams hais tias ntshe koj yuav tau ua raws li tej cai tswj cov kev thov nyiaj ntawm tej xeev.
Yog tias koj tab tom thov nyiaj hauv online, ces tej zaum koj yuav tau thov ib daim ntawv tso cai ntawm koj lub xeev.Amy Williams
"Muaj ib txhia chaw thov zej tsoom nyiaj ntawd ces yeej muaj ib co kev taw qhia rau yus tias yuav ua li cas thiaj pab tau nyiaj, thiab tej zaum ces lawv kuj tsis paub tseeb tias yuav ua li cas thiab, yog li ntawd thiaj xav kom sab laj nrog tej kws lij choj."
Txawm li cas los qhov kawg nws hais tias cov neeg thov nyiaj hauv online tsim nyog yuav tsum tau qhia kom meej tseeb kiag tias xav thov tej nyiaj ntawd coj mus ua dab tsi, kom thiaj lub tau cov kev totaub yuam kev ntawm tej neeg pab nyiaj.
"Ua ke no los tej neeg pab nyiaj tsim nyog yuav nug los lus nug tias 'Lub hom phiaj ntawm lub koom haum no cov kev thov nyiaj yog coj mus siv ua dab tsi?' Kom yus thiaj totabu tias coj tej nyiaj no mus siv ua dab tsi lawm."
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
