Australia tej lagluam xav li cas rau tej nyiaj budget 2024-25

Tej tswv lagluam me hais tias tsoom fwv Albanese tej nyiaj puag xyoo 2024-25 uas tshwm nyiaj $325 pab them nqe hluav taws xob thiab txo se $20,000 rau tej twj siv ua lagluam no yeej pab tsis tau tej lagluam dab tsi thiab tsis muaj tswv yim dab tsi los pab Australia tej lagluam, txawm tias tej lgluam loj tau txais qee cov kev txhawb nqa thiab nom tswv yuav nrog xyuas kom muaj tej kiab khw lagluam sib tau lagluam zoo tuaj ntxiv.

Small business owner Eugene Cheng says 'it is very hard to continute doing business.' Source: SBS

Eugene Cheng uas yog tus tswv lub tuam txhab uas tu tej khau sneaker ntawm Sydney thiab Melbourne hais tias 'txhua yam nqe yeej kim tuaj ntxiv tsis hais tej kab theem paj, nyiaj ua hauj lwm, superannuation, tej nqe xav khoom rau tej lagluam thiab tej nqe xa khoom rau tej customers ces thiaj ua rau txhua yam khoom kim, tab sis tej lagluam yeej tsis tshua muaj peev xwm nce tej nqe muag khoom/services kim ces thiaj yog tej yam nyuaj tsis muaj peev xwm ceev tej neeg ua hauj lwm, thiab muaj nuj nqes ntau yam siv ua luam, ces haj yam nyuaj tshaj qub ntxiv rau tej lagluam tsis tshua muaj peev xwm ua tau lagluam txuas ntxiv lawm.'

Raws li tej xov xwm tau los ntawm lub koom haum Illion tau qhia ces tsaib no yeej tau muaj tej lagluam me ntau tuaj ntxiv txog li 20 feem pua tsis muaj peev xwm ua tau lagluam lawm.

Luke Achterstraat uas yog tus coj lub koom haum sawv cev rau tej lagluam me (Council of Small Business Organisation Australia -COSBOA) hais tias 'yog tej yam txaus tu siab uas Australia tej lagluam me 2.5 million cov uas muaj txog 97 feem pua ntawm Australia tej lagluam thiab yog tej poj txha nqaj qaum rau Australia tej lagluam tsis tau txais kev pab cuam dab tsi los ntawm tsoom fwv cov nyiaj puag xyoo 2024-25 no li.'

Ces Bran Black uas yog tus coj lub koom haum Business Council thiaj xav kom ''los daws ntau yam teeb meem li cov kev txo se, tej cai tswj cov kev ua lagluam, kho cov kev npaj ua lagluam, thiab ntau yam cai siv tswj tej lagluam uas ua rau yuav tau them ntau yam nqe vim tseem yog ib co tseeb meem loj rau tej lagluam.'

Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.