Txij xyoo 1948 los ces yeej tau tsim tsab cai National and Citizenship Act siv, thiab raug kho 30 zaus thiab tam sim o hu ua Australian Citizenship Act txij xyoo 1973 los lawm.
Thaum ntxov yeej muaj neeg Europe tuaj coob xwb vim tseem siv tsab cai White Australia Policy, tab sis tom qab tuaj ces kuj muaj tej neeg ntawm cov teb chaws Asia thiab lwm cheeb tsam hauv ntiaj teb tuaj nyob lawm thiab.
Txij thaum tau tsim tsab cai los txog tam sim no ces twb muaj neeg tshaj 6 million tus ntawm cov teb chaws thoob ntiaj teb tau xeem los ua pej xeem Australia lawm.
Tau muaj ntau tus neeg uas tau ras los ua pej xeem Australia tshiab qhia tias vim li cas lawv thiaj xav nyob ntawm lub teb chaws no.
Evie Wong uas yog ib tug neeg tuaj ntawm Taiwan tuaj hais tias "Australia yog ib lub teb chaws zoo heev. Tej ib puag ncig los zoo, thiab zoo li sawv daws yeej nyiam ntaus phooj ywg, thiab kuj muaj cib fim zoo heev ntawm no: tsis hais ua hauj lwm, npaj yus tsev neeg lub neej, Australia yeej yob ib lub teb chaws zoo heev."
Chim Mun Lim uas tuaj ntawm Malaysia tuaj los kuj hais tias "Kuv pom tias teb chaws Australia ces tej neeg yeej tsis tshua nyuaj siab dab tsi thaum kuv xub tuaj kawm ntawv ntawm no. Kuv los kuj nyiam tej kasfes uas qab dua tej ntawm peb teb chaws Malaysia thiab."
Allan Lee uas yog ib tug neeg New Zealand thiab kuj yog tus neeg nthuav xov xwm rau SBS los kuj hais tias "tej nom tswv zos, tus nom tswj rooj nom Coffs Harbour yog cov neeg nyiaj kev phooj ywg thiab lawv yeej ua tib zoo xyuas kom tej koom txoos yog ib co ua rau peb mloog tias peb raug tos txais zoo heev thiab ua rau peb mloog tias hnub Citizenshi Day yog ib hnub tshwj xeeb heev."
Mr Lee hais ntxiv tias ''Thawj thawj yam kuv yuav ua ces yog teev zwm npe xaiv nom. Kuv yeej tau nyob ntawm teb chaws Australia no tau 11 xyoo tab sis yeej tsis muaj peev xwm xaiv nom li, ces thiaj tsim nyog kuv teev zwm npe tag kis lawm."
Tony Burke uas yog Australia tus nom tswj dej num tsiv teb tsaws chaw thiab pej xeem hasi tias lub tswv yim txhawb nqa ntau tsav neeg coj ntseeg ntau yam kab lis kev cai thiab hais ntau hom lus yog lub uas peb tsim nyog ua kev zoo siab rau.
Mr Burke hais tias "Kuv muaj ib tsab xo tshiab rau tej pej xeem tshiab txhua tus tias zoo siab tos txais nej rau lub teb chaws no, peb kuj rij txiaj kawg uas nej tau xaiv teb chaws Australia thiab zoo siab tos txais nej sawv daws."
