Tej koom haum pab cuam zej tsoom hais tias tsoom fwv Albanese tej nyiaj puag xyoo 2024-25 no yog ib co muaj teeb meem thiab plam cib fim ntau yam los pab tej neeg tsim nyog tau txais kev pab cuam tshaj plaws.
Gassandra Goldie uas yog tus coj lub koom haum Australian Council of Social Services (ACOSS) hais tias tej nyiaj puag xyoo no tsis daws ntau yam teeb meem tsim nyog daws.
Peb yeej ntsib ntau yam teeb meem li tsis muaj vaj tse txaus nyob, huab cua pauv hloov, nuj nqes siv ua lub neej, nyiaj poob nqe, lagluam khiav qeeb thiab muaj neeg poob hauj lwm ntau ntxiv tuaj, tab sis tej nyiaj puag xyoo no yeej tsis daws tej teeb meem no li.Chief Executive of the Australian Council of Social Services, Cassandra Goldie.
Jennifer Kirkaldy ntawm lub koom haum Salvation Army hais tias tsoom fwv yeej tsis tshua kub siab los pab tej neeg txom nyem raws li qhov tsim nyog pab.
Txhua hnub peb ua hauj lwm nrog tej neeg tau nyiaj pab cuam JobSeeker thiab Youth Allowance ces yeej pom tias lawv tsis muaj nyiaj txaus yuav tej khoom siv ua lub neej txhua hnub, tsis muaj peev xwm ntiav tsev nyob thiab tsis muaj peev xwm them ntau yam nqe, tsis muaj peev xwm nrhiav hauj lwm ua thiab tsis muaj peev xwm mus kawm ntawv. Cov kev tau nyiaj hnub hnub tsawg dua $55 xwb ces txawm xyuam xim npaum li cas thiab txuag npaum li cas los yeej pab tsis tau tej neeg no kom dim ntawm txoj kev txom nyem. Tsim nyog tsoom fwv tej nyiaj puag xyoo no yuav pab tej neeg no.General Manager Policy and Advocacy of the Salvation Army, Jennifer Kirkaldy.
Terese Ewards uas yog tus coj lub koom haum Single Mother Families Australia hais tias yuav tau tshwm nyiaj pab cuam kom ntau dua rau tej poj niam mas thiaj tsiv tawm tau ntawm tej teeb meem kub ntxhov hauv lub cuab yig.
Cov kev tau nyiaj ruaj siv yog cov kev nyab xeeb rau tej leej niam thiab tej me nyuam, yog lawv tsis muaj nyiaj txaus pab lawv ces lawv yeej ncua tsis tsiv tawm thiab tsis muaj peev xwm ncaim tus neeg pheej tsim teeb meem kub ntxhov rau lawv.Chief Executive of Single Mother Families Australia, Terese Edwards.
Tej neeg ua hauj lwm tu tsom kwm tej laus thiab tej me nyuam yaus los kuj ntsib teeb meem nyuaj vim tsis tau nyiaj txaus los siv them tej nqe siv ua lub neej ntau yam rau lub caij uas tej lagluam no tseem ncua tsis nce nyiaj hauj lwm txog xyoo 2026, ces tej zaum haj yam yuav yuam kom muaj tej neeg ua tej hauj lwm no tawm tej hauj lwm no ntau tuaj ntxiv.
Lauren Hutchins uas yog tus neeg ua hauj lwm pab tus coj lub koom haum Health Services Union thiaj hais tias tej neeg ua hauj lwm tus tsom kwm tej laus tu siab thiab nkees dhau heev lawm.
Lub 3 hlis ntuj xyoo no Fair Work Commission yeej tau txiav txiam siab nce nyiaj hauj lwm rau tej neeg no uas tseem khwv tau nyiaj tsawg heev thiab lawv yeej cia siab tias yuav tau nyiaj hauj lwm rau tim 1 lub 7 hli ntuj xyoo 2024 no tab sis tsoom fwv tsis kub siab txog tej neeg no.Assistance Secretary of the Health Services Union, Lauren Hutchins.
Hos lub koom haum National Disability Services (NDS) los yeej hasi tias nws tu siab uas tsis tau txais tej kev pab cuam raws li qhov xav tau thiab.
'Peb xav tau txais kev pab cuam ntxiv los kho peb tej koom haum no, xav tau nyiaj pab cuam ntxiv kom tsim tau tej kev pab cuam kom zoo tshaj qub ntxiv, xav tau kev pab los nrhiav neeg ua hauj lwm thiab xyaum thiab qhia peb tej neeg ua hauj lwm kom pab ua tej hauj lwm no, los sis qhia kom meej kiag tias yuav them nqe siv tej services no npaum li cas rau tej kev pab cuam uas twb muaj tsis txaus siv tam sim no kom thiaj kho tau raws li tsoom fwv xav tau. Peb xav tau tsoom fwv lub zeem muag meej tseeb tias yuav kho li cas kom tej chaw tsim tej kev pab cuam no, tej neeg puas cev thiab tej nom tswv los yog lwm cov koom haum cuam tshuam thiaj paub tias yuav npaj tej hauj lwm no li cas rau yav pem suab', raws li Laurie Leigh uas yog tus coj lub koom haum NDS hais.
Thiab Sophie Cusworth uas yog ib tug neeg ntawm lub koom haum Women with Disabilityes los yeej muaj cov kev txhawj xeeb li lub koom haum NDS thiab nws yeej xav kom 'nqe peev nyiaj pab cov kev pab cuam National Disabilities Insurance Scheme (NDIS), cia siab tias yuav tau koom tsim thiab kho cov kev pab cuam uas muaj cov neeg puas cev koom tawm tswv yim los pab tej neeg puas cev.'
Txawm li cas los Kathy Gallagher uas yog tus nom Finance Minister hais tias tsoom fwv tej nyiaj puag xyoo no yeej kub siab kom rov qab siv tau cov kev pab cuam NDIS li qub.
Lub koom haum Australian Education Union (AEU) los kuj txhawj tias tsoom fwv tej nyiaj puag xyoo tsis tshwm nyiaj los pab zej tsoom tej teej kawm raws cov kev pab cuam Schooling Resource Standard txog 25 feem pua txawm tias tej nom tswv xeev tej neeg qhia ntawv yeej txhawb nqa.
Correna Haythorpe uas yog tus coj lub koom haum AEU thiaj hais tias
'Peb tej neeg ua hauj lwm yeej ua hauj lwm nrog ib co system uas tsis muaj peev txheej nyiaj txaus los pab kom thiaj qhia tau raws li Australia tej me nyuam yaus xav tau, thiab tsis muaj cov kev pab cuam pab rau tej tub kawm uas xav tau cov kev pab sib chab sib chaws. Ces thiaj ua rau peb tej lees kais yuav tau ua hauj lwm ntau heev, tsis muaj tej lees kais txaus los qhia ntawv', raws li Haythorpe hais.
'Thiab nws xav kom tsoom fwv muab tej nyiaj puag xyoo los pab cov hauj lwm kev kawm no xam tias 'yog ib cov kev nqe peev rau peb tej lagluam, tsis yog tias nqe peev rau peb haiv neeg no lub neej pem suab xwb tab sis kuj yog ib cov kev nqes peev kom peb txhua tus me nyuam muaj txoj cai tau kawm ntawv zoo tshaj plaws, yog cov kev nqes peev pab peb tej lees kais thiab tej neeg ua hauj lwm thiab tej neeg ua hauj lwm pab cov kev kawm uas pheej yuav tau ua hauj lwm ntau heev kom tau tej peev txheej los tsim tau cov kev qhia zoo rau txhua tus me nyuam', raws li Correna Haythorpe uas yog tus coj lub koom haum Australian Education Union hais.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
