Tony Burke uas yog Australia tus nom tswj lub tuam chav Department of Home Affairs hais tias tsoom fwv teb chaws Australia tseem tab tom los xyuas seb puas lees paub tej neeg txawv teb chaws tej txuj ci rau lub caij nws tau hais lus ntawm lub koom haum National Press Club ntawm tuam ceeb Canberra hnub zwj Teeb dhau los.
Nws hais tias vim yuav pab txuag tau sij hawm thiab txuag tau nyiaj rau tej neeg tsiv teb tsaws chaw muaj txuj ci paub ua hauj lwm thiab xav tuaj rau teb chaws Australia.
Nomt swv tej xov xwm teev tseg yeej qhia tias muaj tej neeg tsiv teb tsaws chaw yam tsawg li 620,000 tus pheej tsis tau siv lawv tej txuj ci raws li qhov tsim nyog thiab pheej mus ua tej hauj lwm xa khoom, tsav tsheb Uber xwb.
Mr Burke hais tias txawm tau kho cov skilled migration program lawm los kuj yeej muaj tej neeg skilled migrants tuaj coob ntxiv tsaib no lawm, ces thiaj xav yuav tau ua tib zoo xyuas kom nrhiav tau tej neeg muaj txuj ci raws li Australia xav tau. Thiab yeej lees paub tias yeej tseem muaj teeb meem rau tej tswv lagluam cov kev sponsor tej neeg no.
Nws hais tias "Yog tias tseem yuav txiav ib co visa rau ib co lagluam twg ces xav kom tshab txhais, rau qhoa tej tsev kho mob twb tsis muaj neeg txaus los ua tej hauj lwm, tej chaw qhia ntawv los twb nrhiav tsis tau lees kais txaus los qhia txhua cov sob kawm, tej construction projects, housing project los yuav tau tos ntev heev seb puas tau tej neeg ua hauj lwm tuaj ua."
Sussan Ley uas yog tus coj ntawm lwm pab nom teb chaws hais tias Australia tos tej neeg txawv teb chaws tuaj ntau heev. Nws hais tias "Tsis yog tej neeg tsiv teb tsaws chaw los yog tej zejzog neeg tsiv teb tsaws chaw cov kev txhaum dab tsi. Kuv los yeej yog ib tug neeg tsiv teb tsaws chaw thiab kuv yeej tau ntsib tej neeg tsiv teb tsaws chaw zoo txhua qhov chaw uas kuv mus. Peb yeej ris lawv tej txiaj ntsim uas tau tuaj peb txhim kho peb lub teb chaws, thiab yeej niaj hnub ua kev zoo siab. Tab sis kom peb nco tias tus tsoom fwv no cia 1 million tus neeg tsiv teb tsaws chaw tuaj rau lub caij 2 xyoos uas yog ib co neeg tuaj coob tshaj ib lub caij twg raws li tej keeb kwm tau teev tseg lawm."
Nws thiaj hais tias cov kev lees paub tej neeg skilled migrants tej txuj ci txawv teb chaws ua ntej lawv tuaj kuj yog ib lub tswv yim tej zaum yuav pab daws tau tej xwm txheej no.
Burke hais tias "Peb yeej tsis muaj ib tug tsoom fwv twg muaj peev xwm daws tau tej teeb meem no ntawm peb tiam neej no li. Tab sis yog tej yam uas yog peb daws tau ces yuav tau txiaj ntsim rau sawv daws, tsis hais tau rau tej lagluam, tej neeg tsiv teb tsaws chaw los yuav tau ua tej hauj lwm lawv xav ua ntawm Australia thiab."
Lub koom haum Activate Australia's Skills thiaj tau txheeb txog tej teeb meem ntau yam uas tseem muaj rau tej lagluam thiab tej uas muaj rau tej neeg tsiv teb tsaws chaw muaj txuj ci ntawm Asutralia thiab lub koom haum no kwv yees tias yog ua tib zoo xyuas kom siv tau tej neeg no tej txuj ci raws li qhov tsim nyog ces yuav pab tej lagluam khwv tau nyiaj txog $9 billion txhua xyoo los siv khwv tau nyiaj $25 million ib hnub twg.
Txuas ntxiv ntawd los Tony Burke uas yog Australia tus nom tswj lub tuam chav Department of Home Affairs kuj tau tias yuav nrog xyuas kom tsis txhob muaj tej xub ke rau tej neeg phem siv tau nyiaj tau los yam tsis dawb huv thiab yuav tswj tej cyrpto scams, vim thaum tej tub kawm zejzog pej kum haiv kawm tiav lawm ces tej neeg phem pheej siv lawv tej bank account mus ua txhaum cai.
Mr Burke thiaj tau nrog tej tsev kawm qib siab tham thiab tau xa tsab xo no rau tej tub kawm pej kum haiv tias "Peb tej txhab nyiaj twb tau muab 22,000 phau ntawv siv nyiaj zoo li no kaw lawm. Peb yuav tau qhia qhov tseeb rau tej tub kawm paub tias cov kev pheej cia yus tej ntaub ntawv siv nyiaj rau tej neeg phem siv tsis yog tias yog ib co kev ua txhaum cai xwb, tab sis tseem pab kom muaj ib co xub ke rau tej neeg phem siv tej xub ke no mus ua phem li siv tej me nyuam yam tsis raug kev raug cai, ua lagluam yaj yeeb txhaum cai thiab ua cov kev txhaum phem tshaj plaws thiab."
