Tej ntawv theej los ntawm zaj xov xwm no:
Tom qab tau tsib limtiam uas tau muaj tej xwm txheej neeg phem tua neeg phom sij tshaj plaws ntawm Australia li, ces tsev tsoom fwv teb chaws kuj tau npaj txhij yuav los kho tej cai tshiab.
Ob tsaib cai uas nyias siv nyias ntawd - yog tsab cai tswj cov kev siv riam phom thiab tsab cai txwv tsis pub sib ntxub - kuj tau txais kev pom zoo ntawm tsev kis xeev qes (House of Representatives) ... thiab thawj pwm tsav yeej ceeb toom tias yog tsis muaj peev xwm tsim tau tej cai no ces nws yuav tso tseg thiab.
Ces thiaj li tau kho ntau yam cuam tshuam txog cov kev siv phom, thiab Tony Burke uas yog tus nom tswj lub tuam chav Home Affairs tau hais tias tej cai no yog tsim tau coj los ua cai siv ces yuav pab tiv thaiv tau tej xwm txheej neeg raug tua coob li tej tau tshwm sim ntawm Bondi, uas tau muaj 15 tug neeg Australia raug neeg phem tua thaum tseem koom cov neeg Jews lub koom txoos Chanukah lub hli dhau los.
Burke hais tias “Tsis paub tias tej neeg phem tua neeg ntawm Bondi muaj phom ntau npaum li cas? Tej zaum kuj yog 6 rab?, tej zaum kuj yog 5 rab? los sis tej zaum kuj muaj 4 rab? Tab sis peb xav kom tsis txhob muaj ib rab phom hlo li. Tus leej txiv ntawd yog tias nws tsis yog ib tug pej xeem ces nws yeej tsis muaj cai yuav phom. Thiab lawv yuav tsis tau phom siv."
Txawm li cas los yeej tseem muaj ib co nom kis xeev qes (MPs) ntawm pab nom National Party thiab Queensland pab nom Liberal National Party (L-N-P) tawm tsam tsis pom zoo, thiab pheej xav kom kub siab txog tej neeg phem uas tua neeg ntawm Bondi no vim raug liam tias raug tej neeg phem Islamic State txhawb siab.
Davide Littleproud uas yog tus coj pab nom National Party yog tus ntaus thawj hlo los tawm tsam.
Littleproud hais tias “Tej no ces tsuas yog ib co tswv yim coj los ua kom lwm tus tsis txhob kub siab txog lwm yam xwb, yog ib co tswv yim coj los yeb kom tsis txhob tau daws tej teeb meem tiag tiag ntawm teb chaws no xwb, uas yog cov radical Islamists uas tau tab tom tshwm sim thiab tab tom tsim teeb meem rau ntawm peb tej kev li peb tau pom ntawm Bondi."
Thawj pwm tsav Anthony Albanese tau tsis lees paub tej lus iab liam tias tias tej cai tswj cov kev siv riam phom kom nruj tuaj ntxiv no yuav ua rau tsis kub siab txog lwm yam hauj lwm lawm.
Albanese hais tias “Cov kev los kho tej cai tswj riam phom no kheej xwb yeej pab daws tsis tau cov kev sib ntxub, thiab tej tswv yim hloov tig ua neeg phem, tab sis yog ib tug neeg uas ntxub tej neeg Jews uas tsis muaj phom ntawd ces tsuas ntxub xwb. Hos yog tus neeg ntxub tej neeg Jews es ho muaj ib rab phom thiab ces nws yuav yog ib tug neeg tua neeg lawm."
Ces tsev kis xeev siab thiaj pom zoo los tsim tej cai no siv lawm thiab yeej tau txais kev txhawb nqa los ntawm pab nom Liberals tej nom feem coob.
Lawv kuj yuav npaj ua cov hauj lwm mus yuav tej phom ntau tshaj plaws ntawm tej tswv phom rov qab thiab yuav kom tej tuam chav soj xwm ua tus txheeb tej neeg thaum lawv mus thov ntawv tso cai siv phom.
Mr Burke hais tias ua ke no los lawv yuav nrog xyuas kom sib faib tau tej xov xwm ntawm tej tuam chav tswj kev ruaj ntseg thiab lub koom haum teev xwm tej riam phom.
Nws hais tias “Txhais tias peb tej tuam chav soj xwm yuav tau tej xov xwm zoo tshaj plaws uas lawv xav tau, thiab tej nom tswv xeev los yeej yuav tau tej xov xwm zoo tshaj plaws no thiab thaum uas lawv tab tom txiav txim tias seb ib tug twg puas tsim nyog muaj ntawv tso cai siv phom los tsis tsim nyog muaj, thiab yuav pab kom lawv muaj peev xwm los ua tib zoo txheeb kom zoo tshaj plaws ua ntej yuav pub ib daim ntawv siv phom rau ib tug twg siv."
Txawm li cas los tus tsoom fwv Albanese kuj tsis kam kho ntau nqe cai uas pab nom koom tswj (Coalition) xav thov kom kho, suav cov kev them nyiaj paj tshab kom ntau ntxiv rau tej neeg tswv teb thiab tej lagluam me uas yuav yuav lawv tej phom rov qab.
Victorian Nationals MP Darren Chester uas yog ib tug nom kis xeev qes (Member of Parliament -MPs) ntawm Victoria pab nom Nationals tau cav tias tej cai no yuav rau txim yam tsis ncaj ncees rau tej neeg ua liam ua teb uas yuav tos lawv tej phom siv coj los tswj tej tsiaj qus thiab siv los pov puag lawv tus kheej.
Chester hais tias “ Yooj yooj yim xwb, tus coj tsev tsoom fwv, tej neeg Australia uas ua raws cai thiab yog neeg raug cai yeej muaj peev xwm siv tau lawv tej phom mus koom cov kev sib tw li mus tua nqaij los yog mus koom cov kev sib tw tua phom, los sis siv phom tam li yog ib tug neeg ua liaj ua teb kom ua tau lawv tej hauj lwm, txawm tias lawv muaj tej phom txog 6 rab los yeej tsis muaj teeb meem rau leej twg, thiab lawv yeej tsis hawv dab tsi rau Australia tej zejtsoom."
Tsis tas li ntawd los Bob Katter uas yog ib tug nom MP ntawm far north Queensland thiab Zali Stegall uas yog ib tug nom ntawm lub rooj nom ywj pheej los yeej tsis pom zoo thiab.
Stegall hais tias “Nod tsis yog teb chaws Meskas, nod yog teb chaws Australia. Peb yeej xav ua tib zoo los tswj kom tej tej kev siv riam phom kom nruj tiag tiag. Txawm tias kuv txhawb nqa tsab cai no, los kuv yeej nqua hu kom tsoom fwv kub siab tshaj no thiab ua tib zoo xyuas kom txheeb tau tej neeg xav thov ntawv siv thiab yuav phom ntawd kom ntxaws ntxaws tias seb lawv puas yuav tsim kev phom sij rau lwm tus, thiab kom tau txais kev nyab xeeb rau tag nrho txhua tus neeg Australia."
Tsab cai uas xav thov kho coj los txwv tsis pub sib ntxub uas yog ib tsab cai cov nyom los kuj tau txais kev pom zoo los tsim ua cai siv ntawm tsev kis xeev qes thiab, zaum no ces yog tau txais kev pab los ntawm pab nom Liberal Party tom qab tsoom fwv (Albanese) tau pom zoo rau thaum kawg rau ntau cov kev kho tsab cai no.
Cov kev pom zoo no thiaj ua rau Larissa Waters uas yog pab nom Greens tus coj npau taws heev, vim nws pab nom yeej tau xub qhia lawm tias nws tsis pom zoo nrog tsab cai no.
Waters hais tias “Tsab cai no los zoo li yeej yuav tau txais kev pom zoo ntawm tsev tsoom fwv hnub no thiab, vim ob pab nom loj yeej txhawb, ces thiaj yog ib co kev tawm tsam nrog peb cov kev tawm tau tswv yim vwj pheej thiab yuav muaj teeb meem rau peb cov kev koom los sib sau nrog lwm tus yam thaj yeeb, thiab yuav muaj teeb meem rau peb cov kev tawm tswv yim txog tej kev ua txhaum leej tib neeg tej cai thiab tej xwm txheej tua neeg npog nroj ntsuab coob heev kom tu noob."
Cov kev pauv hloov thaum kawg kuj tau ua rau ib co nom kis xeev qes uas tsis tau mus koom ob pab nom loj cov kev sib khom kuj meem txom kawg nkaus thiab.
Monique Ryan uas yog ib tug nom ywj pheej hais tias:
“Ces tam sim no thiaj coj tsab cai no mus sab laj ntawm tsev kis xeev qes thiab nyuam qhuav muab rau peb 5 ntiag tiv dhau los xwb. Peb tsuas muaj sij hawm tsawg dua 5 ntiag tiv los tham txog tsab cai no xwb. Thiaj yog tej yam tsis tsim nyog li."
Tsab cai no yuav tso cai rau tsoom fwv kom rau txim rau tej koom haum uas pheej txhawb nqa kom muaj kev sib ntxub: tej koom haum uas ASIO tau txheeb tau yeej yog cov uas yuav tsim tau teeb meem, suav lub koom haum neo-Nazi hu ua National Socialist Network, thiab lub koom haum radical Islamist hu ua Hizb ut-Tahrir uas yog cov uas tej zaum yuav tau kub siab txog.
Tej cai no los kuj yuav tso cai rau tsoom fwv tsis pub los yog thim tej visas rau tej neeg uas pheej muaj cov kev uas ntxub, tsim kev kub ntxhov thiab tsis yoog raws li teb li chaw.
Michelle Rowland uas yog Australia tus kws lij choj teb chaws hais tias tej cai no yog ib co twj muaj fwj chim heev.
“Tej koom haum no ces pheej xav ua kom muaj kev sib ntxub nthuav dav, tsim kom muaj kev sib tawg tswj thiab txhawb nqa kom tsim kev kub ntxhov, uas yeej lug thiab tsis raug txim rau lawv tej kev ua txhaum los ntev heev lawm. Peb yuav tsis cia kom lawv ua tej no ntawm peb lub teb chaws, thiab tsab cai no yuav pab kom tseem fwj muaj ib co twj los tswj thiab los rau txim rau ntau yam uas lawv ua txhaum cai."
Nws kuj tsis lees tias tej cai uas yuav siv los tswj tej koom haum no yog ib co kev tawm tsam rau cov kev tawm tau tswv yim ywj pheej, thiab hais tias tej cai no tsis yog yuav ua kom tau txais kev pab cuam rau tej laj fai kum xeeb los yog tsuas yog ib co lus hais kom zoo nkauj xwb.
“Tus coj ASIO yuav tsum xyuas kom ua tau tej hauj lwm no, los tswj tej kev txheeb tej xwm txheej no, vim rau qhov zoo li tej koom haum no kuj yuav ua rau muaj cov kev siv tej laj fai kum xeeb los tsim kev kub ntxhov los yog yuav txhawb nqa kom zejzog tsim kev kub ntxhov. Tej no yog tej xwm txheej yuav tsim sim tau ntau heev. Thiab yuav ua tib zoo los txheeb lub ntsiab lus uas cuam tshuam nrog kev ruaj ntseg thiab zej tsoom cov kev nyab xeeb."
Tej nom MPs feem coob ntawm pab nom Nationals los kuj tau tsis tawm suab, thiab David Littleproud hasi tias yeej tsis muaj sij hawm txaus los sab laj thiab ntshe yuav muaj tej teeb meem ntau yam cuam tshuam yam peb tsis nco faj.
Ua ke no los tej neeg zejzog neeg Jews yeej tau qhia txog lawv cov kev tu siab tias tsoom fwv tau tso tseg tsis rau txim rau tej neeg hais lus thuam saib tsis taus lwm tus kom thiaj tau txais kev pab los ntawm pab nom Liberals.
Allegra Spender uas yog ib tug nom ywj pheej hais tias tsab cai no tsim nyog pov puag tej neeg Australia caj ceg neeg Jews ntau tshaj no ntxiv.
“Vim li cas tej neeg thiaj li txhob txwm hais lus ntxub peb tej zejzog neeg Jews, vim peb paub tias thaum lawv siv tej lus no ces yuav ua rau lawv ua ib yam dab tsi, thiab zoo li tej no tseem tsis yog ib cov kev ua txhaum ntawm peb lub teb chaws no?"
Jewish Liberal MP Julian Leesor uas yog ib tug nom kis xeev qes ntawm pab nom Liberals thiab yog ib tug neeg Jews kuj hais tias tsab cai uas tau muaj kev pom zoo ntawm ob pab nom loj yeej yog tsab uas ua tib zoo xyuas lawm.
Tab sis nws hais tias tam sim no tsuas nyob ntawm seb tsoom fwv yuav tsim tej cai li cas los tawm tsam nrog tej tswv yim ntxub tsis nyiam neeg Jews thiab seb ho yuav siv tej cai li cas los ua tej hauj lwm no txuas ntxiv xwb.
“Yog peb ib co kev xaiv uas yeej tsis xaus rau tej cai no xwb. Tsoom fwv yuav tsum tau txov lub tswv yim tawm tsam thiab ntxub tej neeg Jews ntawm peb tej teej kawm, ntawm peb tej kev txeeg txuj, ntawm peb tej tsev kawm qib siab, ntawm tej arts ntawm tej trade unions movement, thiab ntawm nws tej lajfai kum xeeb. Vim tias tsuas yog peb ua tau li hais ntawd xwb mas thiaj daws tau tej xwm txheej no, tsis li ntawd ces ntshe tej xwm txheej tau tshwm sim ntawm Bondi tsis yog cov xwm txheej kawg, thiab ntshe tseem yog ib zaj dag neeg tham txog theem nrab xwb uas tseem yuav phem tshaj qub ntxiv."
Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page.
