Tom qab xaus tsov rog ntiaj teb zeeg ob lawm, xyoo 1948 UN tau muaj lub rooj sab laj los tsim tsab cai Universal Declaration of Human Rights siv thiab yeej muaj ntau lub teb chaws tau coj los siv. Vim tsab cai no tau teev tej ntsiab cai kom tag nrho tej neeg thiab txhua haiv neeg yuav tau los pov puag tib neeg txoj cai raws li cov kev pom zoo ntawm tsab cai no.
Australia lub koom haum Australian Human Rights Commission tau tsim ib daim video no qhia tias human rights yog ''Tej cai pov puag kom ib tug twg tsim nyog hwm lwm, pom lwm tus lub meej mom, thiab tau txais vaj huam sib luag thiab tau txais kev ncaj ncees."
Tab sis vim li cas Australia yeej tseem tsis tau muaj tsab cai no siv rau lub sij hawm 50 xyoo los no. 2 lub koom haum li uman Rights Law Centre thiab Whitlam Institute thiaj mus txheeb txog nqe lus nug no ces yeej txheeb tau tias zej tsoom yeej tau muaj cov kev txhawb nqa kom tsim kom tau tsab cai Human Rights Act coj los siv ntawm lub teb chaws no. Tab sis kuj tseem muaj tej neeg tsis pom zoo thiab tej xov xwm totaub yuam kev txog tsab cai no.
Professor Azadeh Dastyari ntawm Western Sydney University uas yog ib tug ntawm ntau tus tau koom sau tsab ntawv cej luam ntawm cov kev txheeb txog nqe lus nug no tau hais tias:
"Tseem muaj ib txhia hais tias cov kev tsim tsab cai human rights act siv mas yog ib cov kev pauv hloov loj dhau lawm, yog ib co phom sij heev thiab yog ib tsab cai phem uas yuav hawv tawm tsam cov kev tswj hwm democracy, tab sis qhov tseeb tiag lub teb chaws Australia uas tswj hwm liberal democracy no thiaj yog lub teb chaws hauv ntiaj teb uas tsis muaj tsab cai human rights teev zwm ntawm nws tej txhooj cai tswj haiv siv xwb."
Michelle Rowland uas yog tus kws lij choj teb chaws ntawm tus tsoom fwv Albanese tau hais tias tom qab nws yeej los ua nom thawj thawj 100 hnub ces nws yuav los ua tib zoo txheeb kom seb puas tsim tau tsab cai Human Rights Act siv. Tab sis yeej tseem tsis tau muaj peev xwm ua tau li hais ntawd li.
Caitlin Reiger uas yog tus coj lub koom haum Human Rights Law Centre hasi tias muaj ntau yam qhia tias vim li cas thiaj xav kom kub siab los tsim kom tau tsab cai no siv.
"Yeej tau muaj ntau cov kev txib royal comissions mus txheeb ntau yam teeb meem ntau xyoo dhau los no tsis hais txheeb tej Robodebt, txheeb tej neeg puas cev, cov kev tu tsom kwv tej laus ces yeej pom tau tias peb yeej muaj ib co kev pov puag tej neeg no tej cai. Tab sis vim tsis muaj tsab cai no siv ces thiaj ua rau tsis tau txais kev pov puag rau tej neeg txoj cai. Vim yog muaj tsab cai no siv ces yuav ua rau tsoom fwv yuav tau kub siab los lis nws tej dej num thiab kub siab txog tag nrho nws tej kev txiv txim siab uas nws tau ua tias yuav muaj teeb meem rau zej tsoom, tsis yog twb muaj teeb meem lawm es mam li los daws tej xwm txheej no tom qab."
Ms Reiger hais tias cov kev tsim tsab cai Human Rights Act no tsab cai yuav muaj peev xwm los daws tau tej teeb meem ntau yam uas yuav muaj txuas ntxiv rau yav pem suab zoo dua.
"Vim tias yog ib co kev npaj rau tag nrho lwm cov kev sab laj, tsis hais kev ntseeg, kev faib cais, kev cais ib tsav neeg twg, tej cai muaj cai tau txais kev kho mob thiab tau txais kev noj qab nyob zoo, mus txog cov kev muaj cai tau vaj tse nyob uas tsim nyog teev ntawm tsab cai Human Rights Act no."
