Angkor Wat ces yog ib lub tsev teev hawm kab lis kev cai nto npe uas loj tshaj plaws ntawm tej tsev teev hawm ntawm tag nrho cheeb tsam teb chaws Asia. Thiab kuj yog lub wat uas muaj neeg ntoj ncig txawv teb chaws mus ncig xyuas ze txog li 2 million tus ib lub xyoos twg.
Lub koom haum Amnesty International tsab ntawv cej luam tshiab tau liam tias tsoom fwv Cambodia 'tau yuam' kom ntau caum txheeb yim neeg Cambodian uas nyob ib puag ncig lub Angkor Wat kom tsiv tawm mus nyob kom nrug ntawm lub Angkor, uas yog ib cov kev ua txhaum zej zog pej kum haiv tej cai pov puag leej tib neeg txoj cai.
Peb tau nrog tej neeg coob tshaj 100 leej tham, ces yeej tsis muaj ib tug twg yeem thiab txaus siab tawm ntawm tej chaw no mus li. Tsis tas li ntawd los kuj muaj ib txhia tau qhia rau peb tias tseem raug nom tswv tau muab lawv tej vaj tse tsoo thiab hawv kom lawv ntshai thiab kom yuav tsum tau khiav tawm ntawm tej chaw no mus nyob rau lwm qhov.Lawyer Montse Ferror, Amnesty International
Tej neeg no yeej yog tej tau tsim tej khw noj mov, tej khw muag khoom thiab ua lwm yam lagluam los tau ntau caum xyoo rau ntawm tej chaw ib ncig Angkor wat.
Tab sis nom tswv Cambodia hais tias nws tsuas uas raws li UNESCO cov kev taw qhia kom thiaj pov puag tau lub Angkor wat no xwb.
Tej neeg no yog cov neeg los nyob thiab siv tej chaw ntawd tsis raug cai. Yog li ntawd peb thiaj tshem lawv tawm rau lwm qhov, vim lawv tsis muaj ntaub ntawv ua tswv av ntawm tej chaw ntawd.Long Kosal, Deputy Directory General of APSARA
UNESCO thiaj tau qhia ib co ncauj lug rau SBS News tias 'nws nqua hu kom tsoom fwv Cambodia qhia meej tseeb tias yuav tsis yuam tej neeg tawm ntawm Angkor wat thiab nws tsis pom zoo kom siv cov kev yuam tej neeg no.'
Yog li ntawd UNESCO thiaj tau hais kom tsoom fwv Cambodia sau ib tsab ntawv cej luam qhia rau nws tias seb tus tsoom fwv no ho tau ua dab tsi los pov puag Angkor Wat thiab teb Amnesty International cov lus iab liam tias nws tau yuam tshem tej neeg tawm no xa rau nws tsis pub dhau tim 1 lub 2 hlis ntuj xyoo 2024 no.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm SBS Hmong Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
