Lub limtiam Dental Health Week (4-10 Augt) no ces lub koom haum Australian Dental Association (ADA) hais tias yeej tseem muaj Australia tej me nyuam txog li 1.5 million tus tseem tsis tau siv cov kev pab cuam rho hniav uas siv dawb (Child Dental Benefit Schedule (CDBS)) txhua lub xyoo.
Raws li tau muaj cov kev teeb txheeb nrog neeg Australia txog 25,000 tus ces pom tau tias 40 feem puas ntawm tej neeg no hais tias xav tias thaum muaj 2 xyoos tso mam coj me nyuam mus ntsib kws rho hniav, tab sis tus coj lub koom haum ADA hais tias kom coj mus ntsib thaum tus me nyuam tuaj thawj tug hniav. Thiab yeej muaj tej neeg Australia hnoob nyoog lawm txog li ntawm 2 million tus coob tuaj ntxiv yeej tau ncua tsis mus ntsib kws rho hniav vim tej nqe kim ($150 -$300). Ces tej kws rho hniav thiaj nqua hu kom tsis txhob muab lawv tej me nyuam ncua tsis coj mus ntsib kws rho hniav 'kom thiaj pab tau thaum ntxov tsis li ntawv ces yuav raug muab rho, uas yog tej yam nyuaj rau me nyuam, kws rho hniav thiab tej niam txiv.'
Cov neeg muaj cai siv cov program rho hniav pub dawb CDBS no yog cov cuab yig uas tau Medicare siv kis tig tau ib co kev pab cuam dab tsi ntawm tsoom fwv Australia, yuav tsum yog tej me nyuam hnoob nyoog qes dua 17 xyoo nqes rov qab los. Thiab yuav muaj cai tau nyiaj $1,132 rau ib tug me nyuam twg siv tau rau 2 lub xyoo. Tab sis ku pom tias tsuas muaj tej neeg muaj cai siv tau cov program rho hniav rau me nyuam yaus no txog 38 feem pua xwb.
Tsis tas li ntawd los tim cov dental care services no yog cov sib chab sib chaws, siv tsis tau haum raws li neeg txum tim tej kab lis kev cai, los yog tsis tau txais kev ntseeg siab ntawm tej neeg tsiv teb tsaws chaw thiab, ces thiaj ua rau tej neeg tsis mus siv los yog tsis mus ntsib tej kws rho hniav.
Abe Ropitini uas yog tus Executive Director uas tswj cov hauj lwm Population Health ntawm lub koom haum Victorian Aboriginal Community Controlled Health Organisation (VACCHO) thiaj hais tias peb yuav tau kub siab noj tej zaub mob zoo muaj txiaj ntsim pab rau peb lub cev kom tau txais kev noj qab nyob zoo rau qhov ncauj thiab hniav thiab.
Ropitini thiaj hais tias ''Peb yuav tau xyuas kom tau noj tej zaub mov muaj txiaj ntsim kom peb tau txais kev noj qab nyob zoo thiab noj qab haus huv. Cov kev tu saib xyuas peb lub qhov ncauj thiab tej hniav kom tau txais kev noj qab nyob zoo yeej yog tej yam tseem ceeb. Tsis muaj hmoo uas tseem muaj cov kev rho hniav no cais tsis xyaw nrog cov primiary health care thiab, tseem yog cov sib chab sib chaws, siv tsis haum raws li tej kab lis kev cai tej neeg xav siv, tej pab los sib chab sib chaws, tsis paub yuav txheeb li cas seb yus puas muaj cai siv. Ces thiaj ua rau peb ntsib tej teeb meem li tam sim no. Thiab peb yuav tau daws tej xwm txheej no.''
